1. Ano hoi, aole kekahi mea ola mawaena o ka poe kanaka a pau o ko Nepai poe, i kanalua iki i na olelo a ka poe kaula hemolele a pau, ka poe i olelo mai; no ka mea, ike iho la lakou he mea e pono ai e hooko ia ia mau mea;

2. A ike iho la lakou he mea pono ua hiki mai o Kristo, no ka nui o na hoailona i haawi ia mai ai, e like me na olelo a ka poe kaula hemolele, a no na mea i hiki mai ai i keia manawa, ua ike lakou he mea e pono ai e hiki mai auanei na mea a pau e like me ka mea i olelo ia;

3. Nolaila, haalele aku la lakou i ko lakou mau hewa a pau, a me ko lakou mau mea hoopailua, a me ko lakou mau moekolohe, a hookauwa aku la na ke Akua me ka ikaika loa i ke ao a i ka po.

4. Ano, eia kekahi, ia lakou i hoopio aku ai i ka poe powa a pau, i pakele ole ai kekahi mea i pepehi ole ia, hahao iho la lakou i ko lakou poe pio iloko o ka halepaahao, a kena ae la e hai ia aku ka olelo a ke Akua ia lakou; a o ka poe a pau i mihi i ko lakou mau hewa a komo iloko o kekahi berita e pepehi kanaka hou ole aku, ua hookuu ia aku;

5. Aka o ka poe a pau i komo ole iloko o kekahi berita, a i hoomau i na manao pepehi kanaka malu iloko o ko lakou mau naau; he oiaio, o ka poe a pau i ike ia e hoopuka mai ana i na olelo hooweliweli e ku e i ko lakou poe hoahanau, ua hoohewa ia a hoopai ia aku mamuli o ke kanawai.

6. A pela lakou i hoopau ai i kela mau hui pu hewa, malu a ino loa, iloko o ia mea i hana ia ai ka hewa nui, a me na pepehi kanaka he nui.

7. A pela i hala aku ai ka makahiki iwakaluakumamalua, a me ka iwakaluakumamakolu no hoi, a me ka iwakaluakumamaha, a me ka iwakaluakumamalima; a pela i hala aku ai ka makahiki he iwakaluakumamalima;

8. A he nui na mea i ikea, e manao ia paha ma na maka o kekahi poe he mau mea he nui a kupaianaha hoi; aole nae i hiki ia mau mea a pau ke palapala ia ma keia buke; he oiaio, aole i hiki i ka hapa-haneri o na mea i hana ia mawaena o na kanaka he nui loa me neia, no na makahiki he iwakaluakumamalima, ke hookomo ia iloko o ua buke nei;

9. Aka hoi, aia no na mooolelo i piha me na hana a pau o keia poe kanaka; a ua haawi ia mai e Nepai he mooolelo pokole me ka oiaio nae;

10. Nolaila, ua hana au i kaʻu mooolelo o keia mau mea mamuli o ka mooolelo a Nepai, i kahakaha ia maluna o na papa i kapa ia na papa o Nepai.

11. A, aia hoi, ke kakau nei au i ka mooolelo maluna o na papa aʻu i hana ai me koʻu mau lima ponoi iho.

12. A, aia hoi, owau nei ua kapa ia mai o Moramona, i kapa ia mamuli o ka aina o Moramona, o ka aina ia kahi a Alama i kukulu mua ai i ka ekalesia mawaena o na kanaka; he oiaio, o ka ekalesia mua ia i kukulu ia mawaena o lakou mahope iho o ko lakou lawehala ana.

13. Aia hoi, he haumana no au na Iesu Kristo, ke Keiki a ke Akua. Ua kahea ia mai au e ia e hai aku i kana olelo mawaena o kona poe kanaka, i hiki ia lakou ke loaa ke ola mau loa.

14. A ua lilo i mea e pono ai naʻu, e like me ka makemake o ke Akua, i ko ai na pule a ka poe i hala aku la mai anei aku, ka poe hemolele, e like me ko lakou manaoio, e kakau aku i mooolelo o keia mau mea i hana ia;

15. He oiaio, he mooolelo uuku o na mea i hana ia, mai ka wa mai a Lehi i haalele aku ai ia Ierusalema, a hiki wale mai i keia wa e noho nei;

16. Nolaila, ke hana nei au i kaʻu mooolelo, mai na mooolelo mai i haawi ia mai e ua poe la i noho mamua aku oʻu nei, a hiki mai i ka hoomaka ana o kuu mau la;

17. Alaila ke hana nei au i kekahi mooolelo o na mea aʻu ike ai me kuu mau maka ponoi.

18. A ua ike au o ka mooolelo aʻu e hana nei, he mooolelo pololei a oiaio ia; aka hoi, he nui na mea i hiki ole ia makou mamuli o ka makou olelo, ke kakau iho.

19. Ano, ke hoopau aku nei au i kaʻu olelo noʻu iho, a ke hoomaka nei e kakau iho i kaʻu mooolelo no na mea i hana e ia mamua aku oʻu nei;

20. Owau no o Moramona, a he mamo io na Lehi. He kumu no koʻu e hoomaikai aku ai i kuu Akua a i kuu Mea e Ola ai o Iesu Kristo, no kona lawe ana mai i ko makou poe kupuna mailoko mai o ka aina o Ierusalema, (a ua ike ole kekahi ia mea, oia wale no a me ua poe la ana i lawe mai ai mailoko mai o ua aina la,) a no kona haawi ana mai iaʻu a me kuu poe kanaka i ka ike nui, i ka hoola ia ana o ko makou mau uhane.

21. He oiaio, ua hoopomaikai mai oia i ko ka hale o Iakoba, a ua aloha mai oia i na hua a Iosepa.

22. A i ka malama ana o na mamo a Lehi i kana mau kauoha, ua hoalohaloha mai a hoopomaikai mai no hoi oia ia lakou, e like me kana olelo;

23. He oiaio, a e kai hou mai auanei oia i kekahi koena o na hua a Iosepa, i ka ike i ka Haku, i ko lakou Akua;

24. A he oiaio, me ka Haku e ola nei, e houluulu mai oia mai na kihi eha mai o ka honua, i ke koena a pau o na hua o Iakoba, ka poe i hoopuehu ia aku maluna iho o ka ili a pau o ka honua nei;

25. A me ia i hana berita mai ai me ko ka hale a pau o Iakoba, pela io no e ko auanei, ma kona manawa ku pono, ka berita ana i berita mai ai me ko ka hale o Iakoba, i ka hoihoi hou ana mai i ko ka hale a pau o Iakoba i ka ike i ka berita ana i berita mai ai me lakou;

26. Alaila, e hoomaopopo lakou i ko lakou Mea Hoolapanai, oia no o Iesu Kristo, ke Keiki a ke Akua; alaila, e houluulu ia lakou mai na kihi eha mai o ka honua nei, i ko lakou aina iho, mailaila aku lakou i hoopuehu ia aku ai, he oiaio, me ka Haku e ola nei, pela io no auanei. Amene.