1. A eia kekahi, i ka wa e hele ana ka poe haumana a Iesu a e hai ana i na mea a lakou i lohe ai a i ike ai hoi, a e bapetizo ana ma ka inoa o Iesu, hiki mai keia, ua houluulu ia mai ka poe haumana i kahi hookahi, a ua hui ia ma ka pule ikaika a me ka hookeai.

2. A hoike hou mai la o Iesu ia ia iho ia lakou, no ka mea, e pule ana lakou i ka Makua, ma kona inoa; a hele mai la o Iesu a ku iho la mawaena konu o lakou, a olelo mai la ia lakou: Heaha ka oukou makemake aʻu e haawi aku ai ia oukou;

3. A i aku la lakou ia ia: E ka Haku e, ke makemake nei makou e hai mai oe ia makou i ka inoa a makou e kapa aku ai i keia ekalesia; no ka mea, aia no na hoopaapaa ana mawaena o na kanaka no keia mea.

4. A i mai la ka Haku ia lakou: Oiaio, he oiaio kaʻu e olelo aku nei ia oukou, heaha la ka na kanaka mea e ohumu nei a e hoopaapaa nei no keia mea?

5. Aole anei lakou i heluhelu i na palapala hemolele, e olelo ana, he mea e pono ai no oukou e lawe maluna o oukou i ka inoa o Kristo, oia no hoi koʻu inoa? No ka mea, ma keia inoa oukou e kapa ia mai ai ma ka la hope;

6. A o ka mea e lawe ana maluna iho ona i koʻu inoa, a e hoomau ana i ka hopena, oia ke hoola ia ma ka la hope;

7. Nolaila, o kela mea keia mea a oukou e hana ai, e hana oukou ia mea ma kuu inoa; nolaila, e kapa no oukou i ka ekalesia ma koʻu inoa; a e kahea aku oukou i ka Makua ma koʻu inoa, i hoopomaikai mai ai oia i ka ekalesia noʻu nei;

8. A pehea la koʻu ekalesia ia, ke kapa ole ia oia ma koʻu inoa? No ka mea, ina e kapa ia kekahi ekalesia ma ko Mose inoa, alaila, o ko Mose ekalesia no ia; a, ina e kapa ia ia ma ka inoa o kekahi kanaka, alaila, he ekalesia ia no kekahi kanaka; aka, ina e kapa ia ia ma koʻu inoa, alaila, o koʻu ekalesia no ia, ina paha i kukulu ia oia maluna o koʻu euanelio.

9. He oiaio kaʻu e olelo aku nei ia oukou, ua kukulu ia oukou maluna o koʻu euanelio; nolaila, e kapa aku oukou i na mea a oukou e kapa aku ai, ma koʻu inoa; nolaila, ina e hea aku oukou i ka Makua, no ka ekalesia, ina ma koʻu inoa ia, alaila, e hoolohe mai no ka Makua i ka oukou;

10. A ina paha i kukulu ia ka ekalesia ma koʻu euanelio, alaila, e hoike mai no ka Makua i kana mau hana iho iloko o ka ekalesia;

11. Aka, ina aole ia i kukulu ia maluna o koʻu euanelio, a ua kukulu ia maluna iho o na hana a kanaka, a i ole ia, maluna iho o na hana o ke diabolo, he oiaio kaʻu e olelo aku nei ia oukou, he lealea ka lakou ma ka lakou hana no kekahi manawa, a mahope e hiki mai ana ka hopena, a kua ia lakou ilalo a hoolei ia aku iloko o ke ahi, kahi e hiki ole ai ke hoi mai mailaila mai;

12. No ka mea, e hahai ana ka lakou mau hana ia lakou, no ka mea, no ka lakou mau hana lakou i kua ia ai ilalo; nolaila, e hoomanao i na mea aʻu i hai aku ai ia oukou.

13. Aia hoi, ua haawi aku au i koʻu euanelio ia oukou, a eia ka euanelio aʻu i haawi aku ai ia oukou, i hele mai au iloko o ke ao nei e hana i ka makemake o koʻu Makua, no ka hoouna ana o koʻu Makua iaʻu;

14. A hoouna mai la koʻu Makua iaʻu, i hiki iaʻu ke kaulia ae maluna o ke kea; a mahope iho o koʻu kaulia ana maluna o ke kea, i hiki ai iaʻu ke kauo mai i na kanaka a pau ioʻu nei; e like me au i hookiekie ia ai iluna e na kanaka, pela hoi na kanaka e hookiekie ia ai iluna e ka Makua, e ku imua oʻu, e hookolokolo ia no ka lakou mau hana, ina paha he maikai ia mau mea, ina paha he ino;

15. A no keia kumu wau i kaulia ai iluna; nolaila, e like me ka mana o ka Makua, e kauo mai auanei au i na kanaka a pau ioʻu nei, e hookolokolo ia ai lakou e like me ka lakou mau hana.

16. A e hiki mai ana keia, o ka mea e mihi a e bapetizo ia ma koʻu inoa, e hoopiha ia oia; a ina e hoomau oia a hiki i ka hopena, aia hoi, oia kaʻu e hoohewa ole ai imua o koʻu Makua, ma ua la la iaʻu e ku ai e hookolokolo i ko ke ao nei.

17. A o ka mea e hoomau ole ana a hiki i ka hopena, oia ke kua ia no hoi ilalo, a hoolei ia aku iloko o ke ahi, kahi e hiki ole ai ia lakou ke hoi mai mailaila mai, no ka hoopai o ka Makua;

18. A oia no ka olelo ana i haawi mai ai i na keiki a kanaka. A no keia kumu ke hooko nei oia i na olelo ana i haawi mai ai, a ke wahahee ole nei oia, aka ke hooko mai nei i kana mau olelo a pau;

19. A, aole e hiki i kekahi mea paumaele ke komo iloko o kona aupuni; nolaila, aohe mea e komo ana i kona maha, ke ole ka poe i holoi i ko lakou mau aahu iloko o koʻu koko, no ko lakou manaoio, a me ka mihi i ko lakou mau hewa a pau, a me ko lakou malama pono a hiki i ka hopena.

20. Ano, eia ke kauoha, e mihi oukou, e ko na welau o ka honua, a e hele mai ioʻu nei, a e bapetizo ia ma koʻu inoa, i hoomaemae ia ai oukou ma ka loaa ana ka Uhane Hemolele, i ku kina ole ai oukou imua oʻu ma ka la hope.

21. Oiaio, he oiaio kaʻu e olelo aku nei ia oukou, oia no koʻu euanelio; a ua ike oukou i na hana e pono ai oukou ke hana ma koʻu ekalesia; no ka mea, o na hana a oukou i ike mai ai iaʻu e hana ana, oia no ka oukou hoi e hana ai; no ka mea, o ka mea a oukou i ike mai ai iaʻu e hana ana, oia hoi ka oukou e hana ai;

22. Nolaila, ina e hana oukou i keia mau mea, pomaikai oukou, no ka mea e hookiekie ia ae oukou iluna ma ka la hope.

23. E kakau iho i na mea a oukou i ike ai a i lohe ai, koe nae ua mau mea la i papa ia;

24. E kakau iho i na hana a keia poe kanaka, e like auanei ia me ka mea i kakau e ia no na mea i hala aku;

25. No ka mea hoi, noloko mai o na buke i kakau e ia, a e kakau ia auanei no hoi, e hookolokolo ia ai auanei keia poe kanaka, no ka mea, ma o ua mau mea la e ike ia ai auanei ka lakou mau hana e na kanaka.

26. A, aia hoi, ua kakau ia na mea a pau e ka Makua; nolaila, noloko mai o na buke e kakau ia e hookolokolo ia ai ko ke ao nei.

27. A e ike oukou e lilo auanei oukou i poe lunakanawai no keia poe kanaka, e like me ka hoopono aʻu e haawi aku ai ia oukou, a he pololei ia; nolaila, ea, heaha la ko oukou ano e pono ai? He oiaio kaʻu e olelo aku nei ia oukou, e like me au nei.

28. Ano, ke hele nei au i ka Makua la. A he oiaio kaʻu e olelo aku nei ia oukou, o na mea a oukou e noi aku ai i ka Makua, ma koʻu inoa, e haawi ia mai ia ia oukou;

29. Nolaila, e noi, a e loaa no ia oukou; e kikeke, a e wehe ia ia ia oukou; no ka mea, o ka mea e noi ana, e haawi ia ana nana, a i ka mea kikeke, e wehe ia nona.

30. Ano hoi, ua nui koʻu olioli, a hiki i ka piha ana, no oukou a me keia hanauna hoi; he oiaio, a ke hauoli nei no hoi ka Makua, a me na anela hemolele a pau no hoi, no oukou a me keia hanauna; no ka mea, aole i lilo kekahi o lakou.

31. Aia hoi, ke makemake nei au e hoomaopopo oukou, no ka mea, no ka poe e ola nei, i keia manawa, o keia hanauna kaʻu e olelo nei; a, aole i lilo kekahi o lakou; a no lakou ua piha loa au i ka olioli.

32. Aka hoi, ua kaumaha au no ka ha o ka hanauna mai keia hanauna aku, no ka mea, ua alakai pio ia aku lakou e ia, e like hoi me ke keiki o ka make; no ka mea, e kuai lakou iaʻu no ke kala, a no ke gula, a no na mea e hoino ia e ka mu, a me na mea hoi a na aihue e hiki ai ke wawahi a ke aihue. A ma kela la e hoopai aku au ia lakou, ma ka hoohuli ana i ka lakou mau hana maluna iho o ko lakou mau poo iho.

33. A eia kekahi, ia Iesu i hoopau ai i keia mau olelo, i mai la oia i kana poe haumana: E komo ae oukou ma ka puka pilikia; no ka mea, he pilikia ka puka, a he ololi hoi ke ala e hiki aku ai i ke ola, a kakaikahi wale ka poe loaa ia; aka, he akea ka puka, a he palahalaha hoi ke ala e hiki aku ai i ka make, a he nui wale hoi ka poe e hele iloko olaila, a hiki aku i ka wa e hiki mai ai ka po, ka manawa e hiki ole ai i kekahi kanaka ke hana.