1. Aia hoi, i ka wa a Iesu i olelo mai ai i ua mau olelo nei, alawa hou ae la oia i o ia nei maluna o na kanaka, a olelo mai la ia lakou, aia hoi, ua kokoke mai kuu manawa.

2. Ke ike nei au ua nawaliwali oukou, ua hiki ole ia oukou ke hoomaopopo mai i kaʻu mau olelo a pau i kauoha ia mai ai au, e ka Makua, e olelo aku ia oukou i keia manawa;

3. Nolaila, e hele oukou i ko oukou mau wahi, a e hoomanao iho i na mea aʻu i olelo aku ai, a e noi aku i ka Makua, ma koʻu inoa, i hiki ia oukou ke hoomaopopo; a e hoomakaukau i ko oukou mau naau no ka la apopo, a e hele hou mai au io oukou la.

4. Aka, e hele ana au ano i ka Makua la, a e hoike aku ana no hoi iaʻu iho i na ohana nalowale o ka Iseraela, no ka mea, aole lakou i nalowale i ka Makua, no ka mea, ua ike oia i kahi ana i lawe aku ai ia lakou.

5. A eia kekahi, ia Iesu i olelo mai ai pela, alawa hou ae la oia i kona mau maka i o ia nei maluna o na kanaka, a ike aku la ua kahe ka waimaka o lakou, a haka pono ae la lakou ia ia, me he mea la e noi aku ana lakou ia ia e noho iki hou me lakou.

6. A i aku la oia ia lakou: Aia hoi, ua piha ka naau oʻu me ke aloha aku ia oukou;

7. Ina he poe mai mawaena o oukou, e lawe mai ia lakou ia nei. Ina he poe oopa, makapo, hapakue, mumuku, lepera, a me ka poe lolo, a kuli, a me ka poe i hoeha ia ma kela ano keia ano, e lawe mai ia lakou ia nei, a e hoola aku au ia lakou, no ka mea, he aloha koʻu no oukou; ua piha ka naau oʻu me ka lokomaikai;

8. No ka mea, ke ike nei au e makemake ana oukou, e hoike aku au ia oukou i ka mea aʻu i hana aku ai i ko oukou poe hoahanau ma Ierusalema, no ka mea, ke ike nei au ua lawa, ko oukou manaoio, e hoola aku ai au ia oukou.

9. A eia kekahi, ia ia i olelo mai ai pela, hele lokahi aku la na kanaka a pau, me ko lakou poe mai, a me ko lakou poe i hoeha ia, a me ko lakou poe oopa, a me ko lakou poe makapo, a me ko lakou poe aa, a me ka poe a pau i hoeha ia ma kela ano keia ano; a hoola mai la oia ia lakou, i kela mea keia mea i ka lawe ia ana o lakou io na la;

10. A kulou iho la lakou a pau, o ka poe i hoola ia, a me ka poe ola no hoi, ma kona mau wawae, a hoomana aku la ia ia; a honi iho la ka poe a pau i hiki no ka paapu o na kanaka, i kona mau wawae, a hoauau iho la i kona mau wawae me ko lakou waimaka.

11. A eia kekahi, kauoha mai la oia e lawe ia aku ka lakou poe keiki uuku.

12. A lawe ae la lakou i ka lakou poe keiki uuku, a hoonoho iho la ia lakou ilalo ma ka honua a puni ia, a ku iho la o Iesu iwaena konu; a emi ihope na kanaka a lawe ia ae la lakou a pau io na la.

13. A eia kekahi, ia lakou a pau i lawe ia aku ai, a ku iho la no o Iesu mawaena konu, kauoha mai la oia i na kanaka e kukuli iho ilalo ma ka honua.

14. A eia kekahi, ia lakou i kukuli iho ai ilalo ma ka honua, uhu iho la o Iesu iloko ona iho a i aku la: E ka Makua, ua pilikia mai au no ka hewa o ka poe kanaka o ko ka hale o Iseraela.

15. A ia ia i olelo mai ai i ua mau olelo nei, kukuli iho la no hoi oia ma ka honua; a, aia hoi, pule aku la oia i ka Makua, a o na mea ana i pule aku ai, ua hiki ole ke palapala ia, a hoike ae la na kanaka, ka poe i lohe ia ia.

16. A mamuli o keia ano lakou i hoike aku ai: Aole i ike iki ka maka, aole hoi i lohe ka pepeiao, mamua, i na mea nui a kupanaha e like me ka makou i ike ai a i lohe ai ia Iesu i olelo aku ai i ka Makua;

17. Aole e hiki i kekahi alelo ke olelo, aole no hoi e hiki ke palapala ia e kekahi kanaka, aole hoi e hiki i na naau o na kanaka ke hoomaopopo i na mea nui a kupanaha, e like me ka makou i ike ai a i lohe ai no hoi ia Iesu e olelo ana; a ua hiki ole no hoi i kekahi mea ke hoomaopopo i ka olioli i hoopiha mai ai i ko makou mau naau, i ka manawa a makou i lohe ai ia ia e pule ana no makou i ka Makua.

18. A eia kekahi, ia Iesu i hoopau ai i ka pule ana i ka Makua, ala ae la ia; aka, no ka olioli nui o na kanaka, ua ilihia lakou.

19. A eia kekahi, olelo mai la o Iesu ia lakou, a kena mai la ia lakou e ala ae.

20. A, ala ae la lakou mai ka honua ae, a i mai la oia ia lakou: Pomaikai oukou no ko oukou manaoio. Ano hoi, o kuu olioli ua piha.

21. A ia ia i olelo mai ai i keia mau olelo, uwe iho la ia, a hoike ae la na kanaka no ia mea, a lawe pakahi ae la oia i ka lakou poe keiki, a hoopomaikai iho la ia lakou, a pule aku la i ka Makua no lakou.

22. A ia ia i hana ai i keia, uwe hou iho la oia,

23. A olelo mai la ia i na kanaka, a i mai la ia lakou: E nana i ka oukou poe uuku.

24. A ia lakou i nana aku ai e ike, leha ae la lakou i ko lakou mau maka i ka lani, a ike aku la lakou i na lani e hamama ana, a ike aku la lakou i na anela e iho mai ana mailoko mai o ka lani me he mea la, mawaena o ke ahi;

25. A iho mai la lakou ilalo a hoopuni ae la i ua poe uuku la a puni, a ua hoopuni ia lakou me ke ahi; a lawelawe ae la ka poe anela ia lakou, a ike a lohe a hoike ae la na kanaka; a ua ike lakou ua oiaio ko lakou hoike ana, no ka mea, lohe aku la a ike aku la lakou a pau, o kela kanaka keia kanaka nona iho; a elua tausani a me na haneri elima paha ka nui o lakou; a he poe kane, wahine a me na kamalii lakou.