1. Ano, aia hoi, e koʻu poe hoahanau, e like me kaʻu i olelo aku ai e wanana ana au, aia hoi, eia no kaʻu wanana: E hiki io mai no na mea a ua kaula nei, o Zenosa i olelo mai ai, no ko ka hale o Iseraela, ma ua olelo nei ua hoohalike mai oia ia lakou i ka laau oliva kahu.

2. A ma ka la ana e hohola hou mai ai i kona lima i ka lua o ka manawa e hoola i kona poe kanaka, oia no ka la, he oiaio, oia no ka manawa hope, e hele aku ai na kauwa a ka Haku ma o kona mana, e kipulu a e paipai i kona pawaina; a mahope iho o ia mea e hiki koke mai ana ka hopena.

3. E! Nani ka pomaikai o lakou ka poe i hana molowa ole iloko o kona pawaina; e, nani hoi ka poino o lakou ka poe e hoolei ia aku mawaho, iloko o ko lakou wahi iho! A e puhi ia auanei ka honua i ke ahi.

4. E! Nani ka lokomaikai o ke Akua ia kakou; no ka mea, ke hoomanao mai la oia i ko ka hale o Iseraela, o na aa a me na lala pu; a ke kikoo mai nei oia i kona mau lima ia lakou, a pau loa ka la; a he lahuikanaka ai oolea a me ka pakike lakou; aka o ka poe e hoopaakiki ole i ko lakou mau naau, e hoola ia mai auanei lakou iloko o ke aupuni o ke Akua.

5. Nolaila, e oʻu poe hoahanau i aloha ia, ke noi nei au ia oukou me na olelo kuoo, e mihi, a e hele mai me ka manao ikaika o ka naau, a e pili aku i ke Akua me ia e pili nei ia oukou. A oiai kona lima aloha i kikoo mai ai ia oukou ma ka malamalama o ka la, mai hoopaakiki oukou i ko oukou mau naau.

6. He oiaio, i keia la, ke hoolohe oukou i kona leo, mai hoopaakiki i ko oukou mau naau; no ke aha la oukou e make ai?

7. No ka mea, aia hoi, mahope iho o ko oukou hanai ia ana me ka olelo maikai a ke Akua, a pau loa ae la ka la, e hoohua mai anei oukou i na hua ino, i kua ia ai oukou ilalo a e hoolei ia aku iloko o ke ahi?

8. Aia hoi, e hoomalau anei oukou i keia mau olelo? E hoomalau anei oukou i na olelo a ka poe kaula? A e hoomalau anei oukou i na olelo a pau i olelo ia ai no Kristo, mahope iho o ka olelo ana a keia poe he nui loa nona; a e hoole aku i ka olelo maikai a Kristo a me ka mana o ke Akua, a me ka haawina o ka Uhane Hemolele, a e kinai i ka Uhane Hemolele? A e hoomaewaewa anei i ke kumu manao nui o ka hoolapanai ana i hooholo ia ai no oukou?

9. Aole anei oukou i ike, ina e hana oukou i keia mau mea, na ka mana o ka hoolapanai ana a me ke alahouana iloko o Kristo e kai mai ia oukou, e ku me ka hilahila a me ka hewa weliweli imua o kahi hookolokolo o ke Akua?

10. A e like me ka mana o ka hoopai pono, no ka mea, aole e hiki ke hoole ia ka hoopai pono, e hele aku oukou e pono ai iloko o kela loko ahi a me ke kukae pele, o kona lapalapa he pio ole ia, a o kona uahi e pii ana ia, ia ao aku ia ao aku, a o ua loko ahi la a me ke kukae pele, o ka ehaeha pau ole ia.

11. Nolaila, e koʻu poe hoahanau, e mihi oukou, a komo iloko ma ka puka pololei, a e hoomau iloko o ke ala i ololi, a hiki i ka wa e loaa ai ia oukou ke ola mau loa.

12. E, e naauao oukou; heaha la kaʻu e olelo hou ai?

13. Eia ka hope, ke uwe nei au ia oukou me kuu aloha, a hiki i ka wa e halawai pu ai au me oukou imua o kahi hookolokolo o ke Akua, e hoowalania ana ua wahi hookolokolo nei i ka poe hewa me ka makau weliweli a me ka hopohopo. Amene.