Ka Buke A Iakoba
Ke Kaikaina O Nepai

1. Eia hoi, ua hala aku la na makahiki he kanalimakumamalima, mai ka manawa mai o Lehi i haalele aku ai ia Ierusalema; nolaila, haawi mai la o Nepai iaʻu, ia Iakoba, i kauoha no na papa uuku, maluna o lakou i kahakaha ia ai keia mau mea.

2. A haawi mai la oia iaʻu, ia Iakoba, i kauoha i kakau iho ai au maluna o keia mau papa, i na mea kakaikahi o na mea aʻu i manao ai he maikai loa; i kakau uuku wale no au, no ka mooolelo o keia poe kanaka i kapa ia o ka poe kanaka o Nepai.

3. No ka mea, i mai la oia e kahakaha ia ka mooolelo o kona poe kanaka maluna o kona mau papa e ae, a naʻu e malama i keia mau papa, a e haawi aku i kaʻu poe hua, mai ia hanauna aku ia hanauna aku.

4. A ina he olelo i hai ia a i laa, a he hoikeana, a he wanana paha i nani, naʻu e kahakaha iho i na mea nui o ia mau mea maluna o keia mau papa, a e palapala nui no ia mau mea e like me ka mea e hiki ai, no Kristo, a no ka pomaikai o ko makou poe kanaka;

5. No ka mea, no ka manaoio a makemake nui, ua hoike ia mai ia makou no ko makou poe kanaka, i na mea e hiki mai ana maluna o lakou.

6. A ua loaa ia makou hoi na hoikeana he nui, a me ka Uhane o ka wanana nui; nolaila, ua ike makou no Kristo a no kona aupuni, e hiki mai ana auanei.

7. Nolaila, ua lawelawe molowa ole makou mawaena o ko makou poe kanaka, i hoohuli mai ai makou ia lakou e hele mai io Kristo la, a e loaa ka lokomaikai o ke Akua, i komo ai lakou iloko o kona maha, o hoohiki mai paha oia iloko o kona huhu, aole lakou e komo iloko, e like me ka hoonaukiuki ana ma na la o ka hoao ia ana, oiai na mamo o ka Iseraela i noho ai ma ka waonahele.

8. Nolaila, o ko makou makemake i ke Akua, e hiki ia makou ke hoohuli i na kanaka a pau, i kipi ole ai i ke Akua, i hoonaukiuki ole aku ai ia ia e huhu mai, aka, i manaoio ai na kanaka a pau ia Kristo, a e nana i kona make, a e hapai i kona kea, a e hoomanawanui i ka hoohilahila ia mai e ko ke ao nei; nolaila, ke lawe nei au, o Iakoba, maluna oʻu e hooko i ke kauoha a koʻu kaikuaana, a Nepai.

9. Ano, ua elemakule o Nepai, a ua ike oia aole liuliu a e make ana oia; no ia mea, poni iho la ia i kekahi kanaka i alii a i luna hoi maluna o kona poe kanaka ano, e like me ka noho alii ana o na alii.

10. Ua aloha nui loa ia o Nepai e na kanaka, he mea hoomalu nui ia ia lakou, ua kaua aku oia me ka pahikaua a Labana i maluhia ai lakou, a ua hana oia i kona mau la a pau no ko lakou pomaikai;

11. No ia mea, ua makemake na kanaka e hoomanao i kona inoa. A o ka mea e noho alii ana ma kona hakahaka, ua kapa ia e na kanaka, o Nepai elua, o Nepai ekolu, a pela aku e like me ka noho alii ana o na alii; a pela lakou i kapa ia ai e na kanaka, ina paha o ko kela inoa ko keia inoa.

12. Eia kekahi, make aku la o Nepai.

13. Ano, o na kanaka aole no ko Lamana poe, no ko Nepai poe lakou; aka hoi, ua kapa ia ko Nepai, ko Iakoba, ko Iosepa, ko Zorama, ko Lamana, ko Lemuela, a me ko Isemaela.

14. Aka aole au, o Iakoba, e kapa aku ia lakou ma neia hope aku ma keia mau inoa, aka, e kapa aku au i ka poe i imi e luku mai i ka poe kanaka o Nepai, o ko Lamana poe; a o ka poe i oluolu ia Nepai, e kapa no au ia lakou o ko Nepai poe, a i ole ia, o ka poe kanaka o Nepai, e like me na au o na alii.

15. Ano, eia kekahi, hoomaka iho la ka poe kanaka o Nepai malalo iho o ka noho alii ana o ke alii alua, e hoopaakiki i ko lakou mau naau, a e hookuu ia lakou iho ma kekahi mau hana ino, e like me Davida i ka wa kahiko, a me Solomona hoi, kana keiki, e makemake ana i na wahine a me na haiawahine he nui;

16. He oiaio, a hoomaka iho la lakou e imi i ka gula a me ke kala he nui, a hoomaka iho la e hookiekie ia iluna me ka haaheo;

17. Nolaila, haawi aku la wau, o Iakoba, i keia mau olelo ia lakou i koʻu ao ana ia lakou iloko o ka luakini, oiai ua loaa e iaʻu mamua kaʻu olelo mai ka Haku mai.

18. No ka mea, ua hoolaa ia mai la wau, o Iakoba, a me koʻu kaikaina o Iosepa, e ka lima o Nepai, i mau kahuna, a i mau kumu ao i keia lahuikanaka.

19. A ua hoonani mau maua i ko maua oihana imua o ka Haku, e auamo ana maluna o maua iho i ke koikoi o ia hana, e lawe ana i na hala o na kanaka maluna o ko maua mau poo iho, ina aole maua e ao aku ia lakou i ka olelo a ke Akua me ka molowa ole; no ia mea, ma ka hana ana me ko maua ikaika a pau, i kau ole mai ai ko lakou koko maluna o ko maua aahu, i ole pela, e kau mai auanei ko lakou koko maluna o ka maua aahu, a, aole maua e loaa me ke kina ole ma ka la mahope.