1. Ano, ua hiki ole iaʻu, ia Nepai, ke kakau iho i na mea a pau i ao ia iwaena o koʻu poe kanaka; aole hoi au ikaika ma ke kakau ana, e like me ka olelo ana; no ka mea, i ka wa a ke kanaka i olelo aku ai ma ka mana o ka Uhane Hemolele, na ka mana o ka Uhane Hemolele i halihali ia mea iloko o na naau o na keiki a kanaka.

2. Aka hoi, ua nui wale ka poe e hoopaakiki ana i ko lakou mau naau e ku e i ka Uhane Hemolele, i loaa ole ai ia ia kau wahi iloko o lakou; nolaila, ke hoolei aku nei lakou i na mea he nui i palapala ia, a manaoio ia mau mea me he mau mea ole la.

3. Aka, owau, o Nepai, ua kakau au i na mea aʻu i kakau ai; a ke manao nei au ia mea he mea pomaikai nui, a nui ae i koʻu poe kanaka. No ka mea, ke pule mau nei au no lakou ma ke ao, a e hoopulu ana koʻu mau maka i kuu uluna ma ka po, no lakou; a ke kahea nei au i koʻu Akua ma ka manaoio, a ua ike au e hoolohe no oia i kuu hea ana;

4. No ka mea, ua ike au e hoolaa no ka Haku ke Akua i kaʻu mau pule no ka pomaikai o koʻu poe kanaka. A e hoolilo ia auanei na olelo aʻu i kakau ai me ka nawaliwali, i mea ikaika ia lakou; no ka mea, e hoohuli ana ia ia lakou e hana pono; ke hoike aku nei ia ia lakou no ko lakou poe kupuna; a ke olelo nei ia no Iesu, a ke hoohuli nei ia lakou e manaoio ia ia, a e hoomau a hiki i ka hopena, oia no ke ola mau loa.

5. A ke olelo ikaika nei ia e ku e ana i ka hewa, e like me ke akaka o ka oiaio; no ia mea, aole e huhu ana kekahi kanaka ma na olelo aʻu i kakau ai, ke ole no ka uhane o ke diabolo ia.

6. Ke hauoli nei au ma na mea moakaka; ke hauoli nei au ma ka oiaio; ke hauoli nei au i koʻu Iesu, no ka mea, ua hoolapanai oia i koʻu uhane mai gehena mai.

7. Iaʻu no ke aloha no koʻu poe kanaka, a me ka manaoio nui iloko o Kristo, e halawai auanei au me na uhane kina ole he nui ma kona noho hookolokolo.

8. Iaʻu ke aloha no ka Iudaio; ke i aku nei au ka Iudaio, no ka mea, ke olelo nei au no lakou, ka poe nolaila mai au.

9. Iaʻu hoi ke aloha no ka poe Genetile. Aka hoi, aole iaʻu ka manaolana no kekahi mea o ua poe nei, ke hoolaulea ole ia lakou ia Kristo, a e komo iloko o ka puka ololi, a e hele ma ke ala pololei, e hiki aku ai i ke ola, a e hoomau iloko o ke ala a hiki i ka hopena o ka la o ka noho hoao ana.

10. Ano, e oʻu poe hoahanau i aloha ia, a me ka Iudaio hoi, a me oukou, e ko na welau o ka honua nei a pau, e hoolohe mai i ua mau olelo nei, a e manaoio oukou ia Kristo: a ina e manaoio ole oukou i ua mau olelo nei, e manaoio oukou ia Kristo. A ina e manaoio auanei oukou ia Kristo, alaila, e manaoio no hoi oukou i ua mau olelo nei; no ka mea, o lakou no na olelo a Kristo, a ua haawi mai oia ia mau mea iaʻu; a e ao ana ia mau mea i na kanaka a pau e hana pono lakou.

11. A ina aole ua mau olelo nei na Kristo mai, e noonoo pono oukou; no ka mea, na Kristo e hoike mai ia oukou, ma ka la hope, me ka mana a me ka nani nui, nana no ua mau olelo nei; a e ku oukou me au nei, he maka no he maka, imua o kona wahi hookolokolo; a e ike auanei oukou ua kauoha ia au e ia e kakau i keia mau mea, me koʻu nawaliwali nae;

12. A ke pule nei au i ka Makua ma ka inoa o Kristo, e hoola ia mai ka nui o kakou, i ole kakou a pau loa, iloko o kona aupuni, ma kela la nui mahope.

13. Ano, e koʻu poe hoahanau i aloha ia, o ka poe a pau o ko ka hale o Iseraela, a me ko na welau o ka honua, ke olelo aku nei au ia oukou, me he leo la o kekahi e hea ana mai ka lepo mai: E aloha auanei oukou a hiki wale mai ua la nui la;

14. A o oukou hoi, e ka poe i hoao ole i ka lokomaikai o ke Akua, a malama ole i na olelo a ka poe Iudaio, a me kaʻu mau olelo no hoi, a me na olelo e puka mai ana noloko mai o ka waha o ke Keikihipa a ke Akua, aia hoi, ke uwe nei au i ke aloha mau loa ia oukou, no ka mea, na keia mau olelo oukou e hoohewa aku ma ka la hope;

15. No ka mea, o ka mea aʻu e sila ai ma ka honua nei, e lawe ia auanei ia e ku e ia oukou ma ka noho hookolokolo; no ka mea, pela ka Haku i kauoha mai ai iaʻu, a he pono iaʻu ke hoolohe. Amene.