1. Aka, aia hoi, ma na la hope, ma na la o ka poe Genetile; he oiaio, o na lahuikanaka a pau o ka poe Genetile, a me ka poe Iudaio hoi, o ka poe e hele mai auanei maluna o keia aina, a me ka poe e noho ana auanei maluna o na aina e; oiaio, maluna o na aina a pau o ka honua; aia hoi, e ona auanei lakou me ka hana ino, a me kela ano keia ano o na mea hoopailua;

2. A hiki mai ia la, e hele mai ai ka Haku o na Lehulehu ia lakou, me ka hekili a me ka olai, a me ka uwalaau nui, a me ka makani ino ikaika a me ka ino, a me ka lapalapa o ke ahi e hoopau ana;

3. A o na lahuikanaka a pau e kaua aku ana ia Ziona, a e hoopilikia aku ana iaia, e like auanei lakou me ka moeuhane o kahi hihio o ka po; oiaio, e like auanei ia ia lakou me ka moeuhane ana o ka mea pololi, aia hoi, ke ai la oia, aka i kona ala ana ae ua hakahaka kona naau; e like hoi me ka moeuhane ana o ka mea makewai, aia hoi, ke inu la, aka i kona ala ana ae, aia hoi, ua nawaliwali, a ua ikaika loa ka makemake o kona naau; oiaio, pela auanei ka lehulehu o na lahuikanaka a pau e kaua aku ana i ka mauna o Ziona;

4. No ka mea, aia hoi, e oukou ka poe e hana nei i ka ino, e pihoihoi oukou a e kahaha, no ka mea, e uwe aku oukou, a e hooho; oiaio, e ona auanei oukou, aole nae i ka waina; e hikaka auanei oukou, aole nae i ka wai ona;

5. No ka mea, aia! Ua ninini mai la ka Haku maluna o oukou i ka manao hiamoe loa. No ka mea, aia hoi, ua hoopili oukou i ko oukou mau maka, a ua hoomalau aku oukou i na kaula, a ua uhi oia i ko oukou poe alii, a me na mea nana Urima no ka oukou hana ino.

6. Eia kekahi, e hoopuka mai ka Haku ke Akua ia oukou i na olelo o kekahi buke, a o na olelo hoi lakou a ka poe i hiamoe.

7. Aia hoi, e sila ia ua buke nei; a iloko o ka buke he hoike ana mai ke Akua mai, mai ka hookumu ia ana mai o ke ao nei, a hiki i ka hopena ona.

8. Nolaila, no na mea i sila ia, aole e haawi ia na mea i sila ia i ka la o ka hana hewa a me na mea hoopailua o na kanaka. Nolaila, e aua ia ka buke ia lakou.

9. Aka, e haawi ia ka buke i kahi kanaka, a e haawi aku oia i na olelo a ka buke, oia hoi na olelo a ka poe i hiamoe ma ka lepo; a e haawi aku no ia i keia mau olelo ia hai;

10. Aka o na olelo i sila ia, aole oia e haawi aku, aole hoi e haawi aku i ka buke. No ka mea, e sila ia ka buke e ka mana o ke Akua, a o ka hoikeana i sila ia, e malama ia iloko o ka buke, a hiki mai ka manawa ku pono o ka Haku, i puka mai ai lakou; no ka mea, aia hoi, ke hoike mai nei lakou i na mea a pau mai ka hookumu ia ana mai o ke ao nei, a hiki i ka hopena ona.

11. A e hiki mai ana ka la e heluhelu ia ai na olelo o ka buke i sila ia, maluna o na kua hale; a e heluhelu ia lakou mamuli o ka mana o Kristo; a e hoike ia na mea a pau i na keiki a kanaka i hana e ia ai iwaena o na keiki a kanaka, a e hana ia aku ana auanei a hiki loa i ka hopena o ka honua nei.

12. Nolaila, ma kela la, i ka wa e haawi ia aku ai ka buke i ke kanaka aʻu i olelo aku nei, e huna ia ka buke mai na maka mai o ko ke ao nei, i ike ole ia ai ia e na maka o na kanaka, koe na mea hoike ekolu, o lakou auanei ke ike ia mea ma ka mana o ke Akua, okoa ka mea i haawi ia ai ia ia ka buke; a e hoike aku no lakou no ka oiaio o ka buke, a me na mea oloko;

13. Aole mea e ae e ike i ka buke, koe he kakaikahi wale no, e like me ka makemake o ke Akua, e hoike aku no kana olelo i na keiki a kanaka; no ka mea, ua olelo mai la ka Haku ke Akua, E olelo auanei na olelo a ka poe pono me he mea la mai ka make mai.

14. Nolaila, e hoomaka no ka Haku ke Akua e hoopuka mai i na olelo o ka buke; a ma na waha o na hoike i ku pono i kona manao, e hookupaa oia i kana olelo; a auwe ka mea nana e hoomalau i ka olelo a ke Akua.

15. Aka, aia hoi, e hiki mai auanei keia, e olelo aku ka Haku ke Akua, i ka mea i haawi ia ai ia ia ka buke, E lawe aku oe i keia mau olelo i sila ole ia, a e haawi aku ia hai, nana e hoike aku i ka mea i ao nui ia, me ka olelo aku, E heluhelu i keia, ke noi aku nei au ia oe. A e i mai auanei ka mea i ao nui ia, E lawe mai i ka buke, a e heluhelu no au ia mau mea.

16. Ano, i loaa ai ka hoonani ia mai o ko ke ao nei, a i loaa ka waiwai, e olelo auanei lakou i keia, aole no ka hoonani ia mai o ke Akua.

17. A e i ae ke kahana, Ua hiki ole iaʻu ke lawe mai i ka buke, no ka mea, ua sila ia.

18. Alaila, e i mai ka mea aoia, Ua hiki ole iaʻu ke heluhelu ia mea.

19. Nolaila, e hiki mai no keia, e haawi hou no ka Haku ke Akua i ka buke a me na olelo oloko, i ka mea i ao ole ia; a e olelo mai auanei ke kanaka i ao ole ia, Aole au i ao nui ia.

20. Alaila, e olelo aku ka Haku ke Akua ia ia, E heluhelu ole ka mea i ao nui ia ia mau mea, no ka mea, ua hoolei aku lakou ia mau mea, a ua hiki iaʻu ke hana i kaʻu hana iho; nolaila, e heluhelu no auanei oe i na olelo aʻu e haawi aku ai ia oe.

21. Mai hoopa i na mea i sila ia, no ka mea, e hoopuka ia aku ia mau mea i koʻu manawa ku pono; no ka mea, e hoike aku au i na keiki a kanaka, ua hiki iaʻu ke hana i kaʻu hana iho.

22. Nolaila, ia oe i heluhelu ai i na olelo aʻu i kauoha aku ai ia oe, a loaa ia oe na hoike aʻu i olelo mua ai ia oe, alaila, e sila hou aku oe i ka buke, a e huna ia mea iaʻu, i malama ai au i na olelo au i heluhelu ole ai, a hiki mai ka wa ku pono i koʻu naauao, e hoike aku i na mea a pau i na keiki a kanaka.

23. No ka mea, owau no ke Akua; a he Akua no owau o na hana mana; a e hoike aku no au i ko ke ao nei, oia mau no wau, inehinei, a i keia la, a i ka wa pau ole; a, aole wau e hana iwaena o na keiki a kanaka, ke ole like me ko lakou manaoio.

24. Eia hou, e hiki mai keia, e olelo auanei ka Haku ia ia, i ka mea e heluhelu ana i na olelo i haawi ia ai ia ia,

25. No ka hookokoke ana mai o keia poe kanaka iaʻu me ko lakou waha, a i hoomaikai mai ai iaʻu me ko lakou mau lehelehe, aku ua hoomamao aku i ko lakou naau mai oʻu aku nei, a o ko lakou makau iaʻu ua ao ia aku e na kauoha a kanaka,

26. Nolaila, e hana aku ai au iwaena o keia poe kanaka i kahi hana kupanaha; oiaio, i kahi hana kupanaha a he mea e kahaha ai hoi; no ka mea, e pau auanei ke akamai o ko lakou poe akamai a aoia, a e pee auanei ka naauao o ko lakou poe naauao.

27. A auwe ka poe e imi hohonu ana e huna i ko lakou manao ana mai ka Haku aku. A aia ma ka pouli ka lakou hana ana; a olelo mai hoi lakou, Owai la ka mea e nana mai nei ia makou; a owai la ka mea e ike mai nei ia makou? A olelo hou lakou, He oiaio, e manaoio ia e like me ka palolo o ka mea kawili, ka oukou hookahuli ana i na mea iluna a ilalo. Aka, aia hoi, e hoike auanei au ia lakou, wahi a ka Haku o na Lehulehu, ua ike au i ka lakou mau hana a pau. No ka mea, e olelo anei ka mea i hana ia i ka mea nana ia i hana, Aole ia i hana mai iaʻu? E olelo anei ka mea i kapili ia i ka mea nana ia i kapili, aole ona ike?

28. Aka hoi, wahi a ka Haku o na Lehulehu, E hoike no au i na keiki a kanaka, he manawa uuku i koe, a e hoolilo ia o Lebanona i mahinaai hua nui; a e manao nui ia ka mahinaai hua nui me he ululaau la.

29. A ma ia la e lohe ai na mea kuli i na olelo o ka buke; a e ike ai na maka o na mea makapo noloko mai o ka pouli a me ka poeleele;

30. A e mahuahua auanei hoi ka poe haahaa, a iloko o ka Haku hoi ko lakou olioli; a e hauoli ka poe hune iwaena o na kanaka, iloko o ka Mea Hemolele o ka Iseraela.

31. No ka mea, he oiaio no ma ke ola o ka Haku, e ike auanei lakou e hoolilo ia ana ka mea ikaika i mea ole, a e hoopau ia ka mea hoowahawaha, a e hooki ia aku ka poe a pau i makaala i ka hewa;

32. A me ka poe i hoohewa mai i ke kanaka no ka olelo hookahi, a e hoopahele hoi i ka mea e ao ana ma na pukapa, a e hoohuli ae i ka mea pono no ka mea ole.

33. Nolaila, penei wahi a ka Haku, nana i hoola ia Aberahama, no ko ka hale o Iakoba, Aole o Iakoba e hilahila ano, aole hoi e mae wale hou kona maka.

34. Aka ia ia e ike ai i na keiki ana, i ka hana a koʻu mau lima, iwaena konu ona, e hoolaa mai no lakou i koʻu inoa, a e hoolaa i ka Mea Hemolele o ka Iakoba, a e makau i ke Akua o ka Iseraela.

35. O lakou hoi ka poe i lalau ma ka uhane e hiki auanei i ka ike, a e ao hoi ka poe ohumu, a e loaa ia lakou ka ike.