1. Ano, ke olelo nei au, o Nepai, no na wanana a koʻu makuakane i olelo mai ai, no Iosepa, ka mea i lawe ia iloko o Aigupita;

2. No ka mea, aia hoi, wanana io mai la oia no kana hua a pau. A o na wanana ana i kakau mai ai, ua kakaikahi na wanana i oi aku mamua o kana. A wanana mai la oia no makou, a no na hanauna e aku o makou; a ua kakau ia lakou maluna o na papa keleawe.

3. Nolaila, mahope iho o ka pau ana o ka olelo a koʻu makuakane no na wanana a Iosepa, kahea ae la oia i na keiki a Lamana, i kana mau keikikane, a me kana mau kaikamahine, a i aku la ia lakou: Aia hoi, e aʻu mau moopunakane, a me aʻu mau moopunawahine, na keikikane a me na kaikamahine a kaʻu makahiapo, ke makemake nei au ia oukou e haliu mai i ka pepeiao i kaʻu mau olelo;

4. No ka mea, ua olelo mai ka Haku, Ina e malama oukou i kaʻu mau kauoha, e pomaikai auanei oukou ma ka aina; a ina e malama ole oukou i kaʻu mau kauoha, e hooki ia aku auanei oukou mai koʻu alo aku.

5. Aka hoi, e kaʻu mau moopunakane a me kaʻu mau moopunawahine, aole i hiki iaʻu ke iho ilalo i koʻu luakupapau, ke waiho ole au he hoopomaikai ana maluna o oukou; no ka mea, ua ike au, ina e ao ia oukou ma ke ala e pono ai oukou ke hele, aole auanei oukou e hele hewa malaila aku.

6. Nolaila, ina i hoomainoino ia oukou, aia hoi, ke waiho nei au i koʻu hoopomaikai ana maluna o oukou, i lawe ia aku ai ka hoomainoino mai o oukou aku, a e hooko ia maluna o na poo o ko oukou mau makua.

7. Nolaila, no koʻu hoopomaikai ana, aole e ae aku ka Haku ke Akua e anai loa ia oukou; nolaila, e aloha no oia ia oukou, a i ka oukou poe hua a mau loa aku.

8. Eia kekahi, mahope iho o ka pau ana o ka olelo ana a koʻu makuakane i na keikikane a me na kaikamahine a Lamana, kono ae la oia i na keikikane a me na kaikamahine a Lemuela, e lawe ia mai imua ona.

9. A olelo ae la oia ia lakou, i ka i ana: Aia hoi, e na moopunakane aʻu a me na moopunawahine aʻu, na keikikane a me na kaikamahine a ka lua o kaʻu mau keikikane; aia hoi, ke waiho nei au ia oukou i ka hoopomaikai hookahi ana no, me au i waiho aku ai i na keikikane a me na kaikamahine e a Lamana; nolaila, aole oukou e anai loa ia; aka ma ka hopena e hoopomaikai ia ka oukou poe hua.

10. Eia kekahi, i ka wa i pau ai ka olelo ana a koʻu makuakane ia lakou, aia hoi, olelo ae la oia i na keikikane a Isemaela, he oiaio, a i ko kona hale a pau.

11. A pau kana olelo ia lakou, olelo ae la oia ia Sama, i ka i ana: Pomaikai ooe, a me kau hua: no ka mea, e noho no oe ma ka aina, e like me kou kaikaina o Nepai. A e helu pu ia kau poe hua me kana poe hua; a e like auanei oe me kou kaikaina, a e alikealike kau poe hua i kana poe hua; a e hoopomaikai ia oe ma kou mau la a pau.

12. Eia kekahi, mahope iho o ka olelo ana a koʻu makuakane, o Lehi, i ko kona hale a pau, e like me na manao o kona naau, a me ka Uhane o ka Haku iloko ona, elemakule loa iho la ia. Eia kekahi, make iho la ia, a ua kanu ia iho la.

13. Eia kekahi, aole he nui na la mahope iho i kona make ana, huhu mai la o Lamana laua me Lemuela, a me na keikikane a Isemaela iaʻu, no ka paipai ana o ka Haku;

14. No ka mea, ua koi ia mai la au, o Nepai, e olelo aku ia lakou, e like me kana olelo. No ka mea, ua olelo aku la au i na mea he nui wale ia lakou, a pela hoi koʻu makuakane, mamua o kona make ana; a ua kakau ia he nui o ua mau olelo nei maluna o koʻu mau papa e ae; no ka mea, o ka mooolelo nui ae ua kakau ia maluna o koʻu mau papa e ae.

15. A maluna o keia mau papa, ke kakau nei au i na mea o koʻu naau, a he nui no hoi o na palapala hemolele i kahakaha ia maluna o na papa keleawe; no ka mea, ke hauoli nei kuu naau i na palapala hemolele, a ke noonoo nei koʻu naau ia mau mea, a ke palapala nei ia mau mea no ka hoonaauao ia ana a no ka hoopomaikai ia ana o kaʻu poe keiki.

16. Aia hoi, e olioli ana koʻu uhane ma na mea a ka Haku; a e noonoo mau ana koʻu naau i na mea aʻu i ike ai a i lohe ai hoi.

17. Aka hoi, nani ka lokomaikai o ka Haku, i ka hoike ana mai iaʻu i kana mau hana nui a kupanaha, ke hooho nui aku nei kuu naau: Auwe hoi au ke kanaka poino; he oiaio, ke kanikau nei koʻu naau no koʻu io. Ke ehaeha nei koʻu uhane no kaʻu hana ino.

18. Ua hoopuni ia au no na hoowalewale a me na hewa, e hoopuni wale mai ana iaʻu.

19. A iaʻu ka makemake e hauoli, e uwe ana koʻu naau no koʻu mau hewa; aka hoi, ke ike nei au i ka mea aʻu i paulele aku ai.

20. O koʻu mea kokua oia no koʻu Akua; ua alakai mai la oia iaʻu iwaena o koʻu popilikia ma ka waonahele; a ua hoola mai la oia iaʻu maluna o na kai hohonu loa.

21. Ua hoopiha mai oia iaʻu me kona aloha, oia, i ka hoopau ana i koʻu io.

22. Ua hoohoka aku la oia i koʻu mau enemi, i ka hoohaalulu ana ia lakou imua oʻu.

23. Aia hoi, ua hoolohe mai oia i koʻu kahea ana ma ke ao, a ua haawi mai la oia i ka ike iaʻu ma na hihio, i ka po.

24. A ma ke ao ua mahuahua aku la koʻu wiwo ole ma ka pule ikaika imua ona; he oiaio, ua hookiekie aku la au i koʻu leo iluna; a iho mai la na anela a lawelawe mai la iaʻu.

25. A maluna o na eheu o kona Uhane i lawe ia aku ai kuu kino maluna o na mauna kiekie. A ua ike koʻu mau maka i na mea nui; he oiaio, i oi aku i ka mea ku pono no kanaka; nolaila, ua kauoha ia mai la au e kakau ole ia mau mea.

26. E! Ina ua ike au i na mea nui e like me neia; ina o ka Haku ma kona manao haahaa i na keiki a kanaka, i hele mai i na kanaka me ke aloha nui e like me neia, no ke aha la i uwe ai koʻu naau, a kakali koʻu uhane ma ke awawa o ke kaumaha, a wiwi koʻu kino, a emi koʻu ikaika, no koʻu popilikia?

27. A no ke aha la au i ae aku ai i ka hewa no koʻu kino? Oiaio, no ke aha la i ae aku ai au i na mea hoowalewale, i loaa ai i ka mea ino kau wahi ma koʻu naau, e hoopau i koʻu maluhia, a e hookaumaha i koʻu uhane? No ke aha la au i huhu ai no koʻu enemi?

28. E ala, e kuu uhane! Mai luhe hou aku i ka hewa. E hauoli, e koʻu naau, a mai haawi hou i kau wahi no ka enemi o koʻu uhane.

29. Mai huhu hou no koʻu mau enemi. Mai hoalualu i kuu ikaika, no koʻu popilikia.

30. E hauoli, e kuu naau, a e kahea aku i ka Haku, a e i aku: E ka Haku, e hiilani no au ia oe no ka wa pau ole; he oiaio, e hauoli koʻu uhane iloko ou, e koʻu Akua, a o ka pohaku hoi o koʻu ola.

31. E ka Haku, e hoolapanai anei oe i koʻu uhane? E hoopakele anei oe iaʻu noloko mai o na lima o koʻu poe enemi? E hana mai anei oe iaʻu i haalulu ai au i ka ike aku i ka hewa?

32. E pani mau ia anei na ipuka o ka po imua oʻu, no ka mea, ua nahae koʻu naau, a ua mihi koʻu uhane? E ka Haku, aole anei oe e pani i na ipuka o koʻu pono imua oʻu, i hele au ma ke kuamoo o ke awawa haahaa, i pololei au ma ke alanui akaka?

33. E ka Haku, e puliki mai anei oe iaʻu a puni i ka aahu o kou pono? E ka Haku, e hana mai anei oe i ala noʻu e pakele ai imua o koʻu poe enemi? E hana mai anei oe i koʻu kuamoo i pololei imua oʻu? E waiho ole anei i mea hina ma koʻu ala? Aka ina ooe e hoomakaukau i koʻu ala imua oʻu, a e keakea ole i koʻu ala, aka i na ala o koʻu enemi.

34. E ka Haku, ua paulele au ia oe a e paulele au ia oe a mau loa aku. Aole au e hilinai i ka lima o ka io; no ka mea, ua ike au, poino ke kanaka i hilinai i ka lima o ka io. Oiaio, poino ke kanaka i hilinai i ke kanaka, a i lilo ka io i ikaika nona.

35. Oiaio, ua ike au e haawi lokomaikai mai ke Akua i ka mea noi. Oiaio, e haawi mai no koʻu Akua iaʻu, ke ole au e nonoi hewa; nolaila, e hookiekie no au i koʻu leo iluna iou la; oiaio, e kahea aku no au ia oe, e kuu Akua, ka pohaku o koʻu pono. Aia hoi, e pii mau loa no koʻu leo iou la, e kuu pohaku a me koʻu Akua mau loa. Amene.