1. Alaila, e mele aku no au i kuu hiwahiwa i ka mele o kuu hiwahiwa no kona pawaina. He pawaina ka kuu hiwahiwa aia ma kahi puu hua nui;

2. A hana iho la ia i pa a puni, a hoolei aku la i na pohaku ona, a malaila ia i kanu ai i kumu waina maikai, a kukulu no hoi i hale kiai iwaena ona, a hana iho la hoi i wahi kaomi waina malaila; a kakali iho la oia no ka hua ana mai i na hua waina, aka hua mai la ia i ka hua malili.

3. Ano, e na kamaaina o Ierusalema, a me na kanaka o Iuda ke noi nei au ia oukou, e hooponopono, iwaena oʻu a me koʻu pawaina.

4. Heaha ka mea hou e hiki iaʻu ke hana no koʻu pawaina, i hana ole ia e au iloko ona? Nolaila, iaʻu i kakali ai nona e hua mai i ka hua waina, hua mai ai i na hua malili.

5. Ano, e hai aku no au ia oukou i koʻu mea e hana ai i koʻu pawaina; e wawahi au i kona pa e ulu ana, a e pau ia i ka ai ia; a e hoohiolo au i kona pa pohaku, a e pau no ia i ka hehi ia;

6. A e hooneoneo au ia wahi, aole ia e paipai ia, aole hoi e olaolaoia; aka e ulu no ke kakalaioa malaila a me ka laau kalakala; a naʻu no e kauoha i na ao, i ua ole mai lakou i ka ua maluna ona.

7. No ka mea, o ka pawaina o ka Haku o na Lehulehu oia ko ka hale o Iseraela, a o na kanaka o Iuda hoi kona mea kanu e olioli ai; kakali iho la oia i ka hoopono, aia ka, he hooluhi hewa ana; kakali no i ka maikai, aia ka, he uwa ana.

8. Auwe ka poe i hoopili i kekahi hale i kekahi hale, a koe ole kahi kaawale, i noho lakou wale no iwaena konu o ka aina!

9. Ma kuu mau pepeiao, wahi a ka Haku o na Lehulehu, he oiaio no e lilo ana na hale he nui loa i neoneo, a kanaka ole hoi na kulanakauhale nui a maikai.

10. Oiaio e hua mai ana na eka pawaina he umi i hookahi bata, a o ka omera hua e hoohua mai ia i hookahi epa.

11. Auwe ka poe e ala ana i kakahiaka nui, e inu i ka mea awaawa; a hoomau a poeleele, i wela ai lakou i ka waina!

12. A o ka mea kani, a me ka lira, o ka pahu kani, a me ka hookiokio, a o ka waina kekahi ma ka lakou ahaaina; aka aole o lakou manao i ka hana a ka Haku, o ka hana hoi a kona mau lima, aole lakou i ike.

13. Nolaila, hele pio aku la koʻu poe kanaka, no ka mea, aole o lakou ike; a make no ko lakou poe hanohano i ka pololi, a maloo ko lakou lehulehu i ka makewai.

14. Nolaila, ua hoomahuahua ka po ia ia iho, a i hamama nui loa i kona waha; a o ko lakou nani, a me ko lakou lehulehu, a o ko lakou hanohano, a me ka mea e hauoli ana, e poho ilalo iloko ona.

15. E hookulou ia ilalo ke kanaka uuku, a e hoohaahaa ia ke kanaka nui, a e hoohaahaa ia na maka o ka poe haaheo;

16. Aka e hapai nui ia ka Haku o na Lehulehu i ka hoopono, a e hoano ia ke Akua, ka Mea Hemolele i ka pololei.

17. Alaila e ai no na keikihipa mamuli o ko lakou ano, a e ai no na malihini i na wahi neoneo o na mea momona.

18. Auwe ka poe kauo i ka hana ino me na kaula o ka lapuwale, a me ka hewa hoi me he mea la me ke kaula o ke kaa;

19. Ka poe i olelo, E hana wikiwiki oia, e hoolale i kana hana, i ike makou ia mea; e neenee hoi a e hooko ia ka manao paa o ka Mea Hemolele o ka Iseraela, i hoomaopopo makou ia mea.

20. Auwe ka poe i kapa aku i ka hewa he maikai, a i ka maikai he hewa; ka poe i hoolilo i ka pouli i malamalama, a i ka malamalama hoi i pouli; a hoolilo i ka mea awaawa i ono, a i ka mea ono i awaawa!

21. Auwe ka poe akamai ma ko lakou mau maka iho, a naauao hoi i ko lakou nana iho!

22. Auwe ka poe ikaika i ka inu waina, a me na kanaka ikaika i ke kaawili i wai awaawa e inu ai;

23. Ka poe i hoapono aku i ka poe hewa no ke kipe ia, a kaili aku i ka hoapono o ka mea i pono mai ona aku la!

24. Nolaila, e like me ka ai ana o ke ahi i ka opala, a me ka pau ana o ka mauu i ka lapalapa o ke ahi, e lilo ko lakou kumu i ka popo, a e lele iluna ko lakou pua e like me ka huna lepo; no ka mea, ua hoolei aku lakou i na kanawai o ka Haku o na Lehulehu, a ua hoowahawaha hoi i ka olelo a ka Mea Hemolele o ka Iseraela.

25. Nolaila, i hoaa ia ai ka inaina o ka Haku i kona poe kanaka, a ua o aku oia i kona lima e ku e ia lakou, a ua hahau no oia ia lakou; a haalulu iho la na mauna, a ua haehae ia ko lakou mau kupapau iwaena o na alanui. Aole nae i huli kona huhu no keia mau mea a pau, aka ua o ia no kona lima i keia manawa.

26. A e kau no oia i kahi hae i na lahuikanaka mai kahi loihi mai, a e kahea ae ia lakou mai ka welau mai o ka honua; aia hoi, me ka wikiwiki loa lakou e hele mai ai; aohe mea o lakou e maloeloe, aohe mea kulanalana iwaena o lakou;

27. Aohe mea e luluhi na maka, aohe mea e hiamoe; aole hoi e wehe ia na kaei o ko lakou mau puhaka, aole e moku ke kaula o ko lakou mau kamaa;

28. A e hookala ia ko lakou mau pua, a e lena ia ko lakou mau kakaka a pau, a e like na maiuu o ko lakou mau lio me ka pohaku paea, a o ko lakou huila kaa me ka puahiohio, a o ko lakou uwo ana me ko ka liona.

29. E uwo no lakou e like me na liona hou; oiaio, e uwo auanei lakou, a e hopu aku i na mea pio, a e lawe aku me ka malu, aohe mea nana e hoopakele.

30. A ia la la e uwo ku e aku no lakou ia lakou la e like me ka halulu ana o ke kai; a ina e nana lakou i ka aina, aia hoi, he pouli a he kaumaha, a ua hoopouli ia ka malamalama ma na lani ona.