1. Aole nae e like ka pouli e like me ia ma kona kaumaha nui, ia ia i kinohi i hoopilikia iki ai i ka aina o Zebulona, a me ka aina o Napetali, a mahope iho i hoopilikia nui ai ma ka aoao o ke Kai Ula ma kela aoao o Ioredane ma Galila ia o na lahuikanaka.

2. O na kanaka i hele ma ka pouli, ua ike lakou i ka malamalama nui; o ka poe i noho ma ka aina o ke aka o ka make, maluna o lakou i alohi mai ai ka malamalama.

3. Ua hoonui oe i ka lahuikanaka, a hoomahuahua hoi i ka olioli; ke olioli nei lakou imua ou e like me ka olioli ana i ka hoiliili ai ana, e like me na hauoli ana o na kanaka, ia lakou i puunauwe ai i ka waiwai pio.

4. No ka mea, ua haki oe i ka auamo o kona kaumaha, a me ke kookoo o kona poohiwi, ka laau hahau o kona mea hooluhi hewa.

5. No kela kaua keia kaua o ke kanaka me ka wawa haunaele, a me na aahu, i opeope pu ia me ke koko; aka o keia me ka aa ana auanei a me ka wahie o ke ahi.

6. No ka mea, ua hanau ia mai he keiki na kakou, na kakou i haawi ia mai ai he keikikane; a maluna o kona poohiwi ke aupuni; a e kapa ia kona inoa o Kupaianaha, o Kakaolelo, o ke Akua mana, o ka Makua mau loa, o ke Alii o ka Malu.

7. Aole e pau ka mahuahua ana o kona aupuni a me ka malu, maluna o ka noho alii o Davida, a ma kona aupuni, e hooponopono ia mea, a e hookupaa ia ia me ka hoopono a me ka maikai mai keia wa aku a i ke ao pau ole. No ka ikaika o ka Haku o na Lehulehu e hana i keia.

8. Hoouna ae la ka Haku i kana olelo i ko Iakoba a ua haule ia maluna o ka Iseraela.

9. A e ike auanei na kanaka a pau, oia, o Eperaima a me ka poe e noho ana ma Samaria, ka poe i olelo iho ma ka hookiekie a me ka hookano o ka naau,

10. Ua hiolo na pohaku lepo ula, aka e kukulu no makou me na pohaku i kalai ia; ua kua ia ilalo na laau sukumorea, aka e hoolilo makou ia lakou i mau laau kedera.

11. Nolaila, na ka Haku no e hoala mai i na enemi o Rezina e ku e ia ia, a e hui pu i kona poe enemi;

12. O ko Suria mamua, a o ko Pilesetia poe ihope; a e hoopau lakou i ka Iseraela me ka waha hamama. Aole nae i huli aku kona huhu no keia mau mea a pau, aka ua o ia kona lima i keia manawa.

13. No ka mea, aole i huli na kanaka i ka mea nana lakou i hahau, aole hoi lakou i imi i ka Haku o na Lehulehu.

14. Nolaila, e oki ai ka Haku, mai ka Iseraela aku, i ke poo a me ka huelo, i ka lala a me ka naku i ka la hookahi.

15. O ka mea kahiko oia ke poo; a o ke kaula i ao mai i ka wahahee, oia ka huelo.

16. No ka mea, o na alakai o keia poe kanaka ke alakai hewa nei lakou ia lakou la; a o ka poe i alakai ia e lakou ua luku ia lakou.

17. Nolaila, e olioli ole ka Haku i ko lakou poe opiopio, aole hoi ia e aloha aku i ka poe makua ole a me na wahinekanemake o lakou; no ka mea, he hookamani a he mea hana hewa kela mea keia mea o lakou, a olelo ae na waha a pau i ka lapuwale. Aole nae i huli aku kona huhu no keia mau mea a pau, aka ua o ia kona lima i keia manawa.

18. No ka mea, e a ana ka hewa e like me ke ahi; e hoopau no ia i ka nahele ooi, a me ka laau kalakala, a e a ia maloko o ka ululaau paapu, a e pii lakou e like me ka punohu ana o ka uwahi.

19. Ma ka ukiuki o ka Haku o na Lehulehu, ua hoopoeleele ia ka aina, a e lilo na kanaka e like me ka wahie i ke ahi; aohe kekahi kanaka e hookoe i kona hoahanau.

20. A e kaili oia ma ka lima akau, a e pololi nae; a e ai hoi ia ma ka lima hema, aole nae lakou maona; e ai no kela mea keia mea i ka io o kona lima ponoi;

21. O Manase ia Eperaima; a o Eperaima hoi ia Manase; e hui no laua e ku e ia Iuda. Aole nae i huli aku kona huhu no keia mau mea a pau, aka ua o ia no kona lima i keia manawa.