1. Eia hoi kekahi, kahea nui aku la au, o Nepai, i ka Haku koʻu Akua, no ka huhu o koʻu mau hoahanau.

2. Aka hoi, mahuahua no ko lakou huhu iaʻu; a imi mai la lakou e lawe aku i koʻu ola.

3. Oiaio, ohumu mai la lakou noʻu nei, i ka i ana: Ke manao nei ko kakou kaikaina e alii ae maluna o kakou; a nui ka pilikia i loaa ia kakou nona; nolaila, ano e pepehi kakou ia ia, i ole pilikia hou kakou no kana olelo. No ka mea, aia hoi, aole kakou i makemake ia ia i alii no kakou; no ka mea, no kakou, no na kaikuaana ia, e noho alii maluna o keia lahuikanaka.

4. Ano, aole au e kakau ana maluna o na papa nei, i na olelo a pau a lakou i ohumu mai ai noʻu nei. Aka, ua lawa kaʻu olelo ana, ua imi lakou e lawe aku i koʻu ola.

5. Eia kekahi, hoike mai la ka Haku iaʻu, e hele au, o Nepai, mai o lakou aku, a e holo aku i ka waonahele, a me ka poe a pau e makemake ana e hele pu me au.

6. Nolaila, lawe aku la au, o Nepai, i koʻu ohana, a me Zorama hoi a me kona ohana, a me Sama, koʻu kaikuaana, a me kona ohana, a me Iakoba laua me Iosepa, koʻu mau kaikaina, a me koʻu mau kaikuahine, a me ka poe a pau i makemake e hele pu me au. A o ka poe a pau i hele pu me au, oia ka poe i manaoio i na olelo ao a me na hoikeana a ke Akua; nolaila, hoolohe mai la lakou i kaʻu mau olelo.

7. A lawe aku la makou i ko makou mau halelewa a me na mea i hiki ia makou, a hele aku la makou ma ka waonahele no na la he nui loa. A mahope iho o ko makou hele ana no na la he nui loa, kukulu iho la makou i ko makou mau halelewa.

8. A ua makemake iho la koʻu poe kanaka, e kapa makou ia wahi o Nepai; nolaila, kapa aku la makou ia wahi o Nepai.

9. A o ka poe a pau me au, lawe aku la maluna o lakou e kapa aku ia lakou iho ka poe kanaka o Nepai.

10. A ua makaala makou e malama i na hoopono, a me na kanawai, a me na kauoha a ka Haku, ma na mea a pau e like me ke kanawai o Mose.

11. A o ka Haku kekahi pu me makou; a pomaikai nui loa iho la makou; no ka mea, lulu iho la makou i na hua, a ua ohi hou mai la makou me ka lako. A hoomaka makou e hanai i na pua a me na ohana, a me na holoholona o kela ano a me keia ano.

12. A ua lawe pu no hoi au, o Nepai, i na mooolelo i kahakaha ia maluna o na papa keleawe; a me ka mea poepoe no hoi, oia no ka panana, i hoomakaukau ia no koʻu makuakane, e ka lima o ka Haku, e like me ka mea i palapala ia.

13. Eia kekahi, hoomaka iho la makou e hoopomaikai nui loa ia, a e mahuahua ma ka aina.

14. A lawe aku la wau, o Nepai, i ka pahikaua a Labana, a mamuli o kona ano, hana iho la au i na pahikaua he nui loa, o hiki mai auanei paha ka lahuikanaka i kapa ia, i keia manawa, ko Lamana poe, maluna o makou a e luku mai ia makou; no ka mea, ua ike au i ko lakou inaina iaʻu, a i kaʻu poe keiki, a i ka poe i kapa ia, o koʻu poe kanaka.

15. A ao aku la au i kaʻu poe e kukulu i na hale, a e hana i kela ano i keia ano o ka laau, a o ka hao, a o ke keleawe ulaula, a o ke keleawe, a o ke kila, a o ke gula, a o ke kala, a o na mea maikai i eli ia, a ua nui loa o ia mau mea.

16. A kukulu iho la au, o Nepai, i luakini; a ua kukulu aku la au ia ia mamuli o ke ano o ka luakini o Solomona, koe wale no aole ia i kukulu ia ia me na mea makamae he nui loa e like me ia; no ka mea, aole i hiki ke loaa ia mau mea maluna o ka aina; nolaila, ua hiki ole ia ke kukulu ia e like me ko Solomona luakini. Aka, ua like ke ano o ke kukulu ia ana me ko ka luakini o Solomona; a ua nani loa ka hana ia ana.

17. Eia kekahi, ao aku la wau, o Nepai, i koʻu poe kanaka e hana mau, a e hana me ko lakou mau lima.

18. Eia kekahi, ua makemake mai la lakou e lilo wau i alii no lakou. Aka, makemake iho la au, o Nepai, e noho lakou me ke alii ole; aka hoi, hana aku la au no lakou e like me ka mea i hiki iaʻu.

19. Aia hoi, ua hooko ia ae la na olelo a ka Haku i koʻu mau hoahanau, ana i olelo mai ai no lakou, e lilo au i luna no lakou a i kumu no hoi no lakou; nolaila, he luna no au no lakou a he kumu no hoi no lakou, e like me na kauoha a ka Haku, a hiki i ka manawa a lakou i imi ai e lawe aku i koʻu ola.

20. Nolaila, i ko ai ka olelo a ka Haku, ana i olelo mai ai iaʻu, i ka i ana: Ina aole lakou e hoolohe i kau olelo, e hooki ia aku auanei lakou mai ke alo aku o ka Haku. Aia hoi, ua hooki ia aku la lakou mai kona alo aku.

21. A ua haawi ae la oia i kekahi poino e haule maluna o lakou, oiaio, i kahi poino nui, no ka lakou hana ino. No ka mea, aia hoi, ua hoopaakiki iho la lakou i ko lakou mau naau e ku e ia ia, a i lilo me he pohaku paea la; nolaila, me lakou i keokeo ai mamua, a nani loa a oluolu, haawi mai la ka Haku ke Akua i ili haulaula maluna o lakou, i ole lakou e lilo i mea hoowalewale i koʻu poe kanaka.

22. A peneia wahi a ka Haku ke Akua: E hoolilo au ia lakou i poe hoopailua ia e kou poe kanaka, ke mihi ole lakou i ka lakou hana hewa.

23. A e poino no ka hua a ka mea nana e huipu me ka lakou hua; no ka mea, e poino pu lakou me ia poino hookahi no. A olelo mai la ka Haku ia mea, a ua hana ia.

24. A no ka poino i kau mai ai maluna o lakou, lilo aku la lakou i lahuikanaka palaualelo, piha i ke kolohe a me ka maalea, a imi iho la ma ka waonahele i na holoholona hihiu.

25. A i mai la ka Haku iaʻu: E lilo auanei lakou i mea hahau i kau poe hua, e hooeueu ia lakou e hoomanao mai iaʻu; a ina aole lakou e hoomanao mai iaʻu, a e hoolohe mai i kaʻu mau olelo, e hahau no lakou la ia lakou i ka anai loa ia ana.

26. Eia kekahi, hoolaa aku la au, o Nepai, ia Iakoba laua me Iosepa, i lilo laua i mau kahuna a i mau kumu maluna o ka aina o koʻu poe kanaka.

27. Eia kekahi, noho iho la makou mamuli o ke ano pomaikai.

28. A ua hala aku la na makahiki he kanakolu, mai ka manawa a makou i haalele ai ia Ierusalema.

29. A ua malama wau, o Nepai, i na mooolelo o koʻu poe kanaka, maluna o koʻu mau papa aʻu i hana ai, a hiki i keia manawa.

30. Eia kekahi, i mai la ka Haku iaʻu: E hana oe i na papa e ae; a e kahakaha auanei oe i na mea he nui maluna o ia mau mea i maikai ma koʻu maka, no ka pomaikai o kou poe kanaka.

31. Nolaila, i hoolohe pono ai au, o Nepai, i na kauoha a ka Haku, hele aku la au a hana iho la i keia mau papa, maluna o lakou kahi aʻu i kakau ai i keia mau mea.

32. A kahakaha iho la au i ka mea oluolu i ke Akua. A ina oluolu koʻu poe kanaka i na mea o ke Akua, alaila, e oluolu ana lakou i na mea aʻu i kahakaha ai iluna o na papa nei.

33. A ina e makemake ana koʻu poe kanaka e ike i ka mooolelo nui o koʻu poe kanaka, e imi lakou i na papa e ae oʻu e pono ai.

34. A ua lawa kaʻu olelo ana, ua hala aku la na makahiki he kanaha, a ua loaa ia makou na kaua a me na paio me ko makou poe hoahanau.