1. I ka makahiki i make ai ke alii, o Uzia, ike aku la no hoi au i ka Haku e noho ana ma ka noho alii, kiekie a i hapai ia iluna, a piha ka luakini i kona poe ukali.

2. Ku mai la maluna na serapima; paono na eheu i kela mea i keia mea; me na mea elua ia i uhi ai i kona maka, a me na mea elua ia i uhi ai i kona mau wawae, a me na mea elua ia i lele ai.

3. A hea ae la kekahi i kekahi, a i ae la, Ihiihi, ihiihi, ihiihi no ka Haku o na Lehulehu. Ua piha ka honua a pau i kona nani.

4. Haalulu na paepae puka i ka leo o ka mea nana i hea, a ua piha iho la i ka uwahi.

5. Alaila, olelo iho la au, Auwe au! Ua make au; no ka mea, he kanaka lehelehe haumia au; a ke noho nei au iwaena o ka lahuikanaka lehelehe haumia; no ka mea, ua ike koʻu mau maka i ke Alii, ka Haku o na Lehulehu.

6. Alaila, lele mai la kekahi o na serapima ioʻu nei, aia ma kona lima kahi lanahu enaena, ana i lawe mai ai me na upa ahi mai ke kuahu mai;

7. A hoopa mai la ma kuu waha, a i mai la, Aia hoi, ua hoopa keia i kou mau lehelehe; a ua lawe ia kou hewa, a ua kala ia kou hala.

8. A lohe iho la no au i ka leo o ka Haku, i ka i ana mai, Ia wai la au e hoouna aku ai, a owai ka mea nana e hele no kakou? Alaila, i aku la au, Eia no wau; e hoouna iaʻu.

9. A i mai la ia, O hele, a e hai aku i keia poe kanaka, Lohe io no oukou, aka aole o lakou i hoomaopopo; a ike io no oukou, aka aole akaka ka ike ana o lakou.

10. E hoopalaka i ka naau o keia poe kanaka, a e hookuli i ko lakou mau pepeiao, a e hoomakapo i ko lakou mau maka; o ike lakou me ko lakou mau maka, a e lohe hoi me ko lakou mau pepeiao, a e hoomaopopo me ko lakou naau, a e huli lakou, a e hoola ia lakou.

11. Alaila, i aku la au, E ka Haku, pehea ka loihi? A i mai la ia, A neoneo na kulanakauhale aohe mea noho iloko, a kanaka ole na hale, a neoneo loa ka aina;

12. A lawe loihi aku ka Haku i na kanaka, no ka mea, e haalele nui ana auanei iwaena konu o ka aina.

13. Aka he hapaumi koe nae, a e hoi hou no lakou, a e ai ia auanei, e like me ka laau hukaa, a e like me ka oka me ka ikaika iloko o laua, ia laua i helelei ai na lau o laua; pela no, o ka hua hemolele no ka ikaika auanei o lakou.