1. Oiaio, penei wahi a ka Haku: Ua hoohemo anei au ia oe, ua hoolei aku anei au ia oe no ka wa pau ole? No ka mea, penei wahi a ka Haku: Auhea ka palapala hoohemo o ko oukou makuwahine? Ia wai la wau i haawi aku ai ia oe, i ka mea hea o ka poe aʻu i aie ai i kuai lilo aku ai au ia oe? Oiaio, ia wai la au i kuai lilo ai ia oukou? Aia hoi, no ko oukou hewa ua kuai lilo aku oukou ia oukou iho, a no ko oukou hala ua hoohemo ia ko oukou makuwahine;

2. Nolaila, iaʻu i hele mai ai, aohe kanaka; iaʻu i kahea aku ai, he oiaio, aohe mea i o mai. E ko ka hale o Iseraela, ua hoopokole iki ia anei koʻu lima, i ole e hoola aku, aole anei oʻu mana e hoopakele ai? Aia hoi, i kuu papa ana, hoomaloo no au i ke kai, a hoolilo no au i ko lakou mau muliwai i waonahele, a pilau mai la ko lakou ia, no ka mea, ua maloo iho la na wai; a make lakou no ka makewai.

3. Hoaahu no au i na lani i ka pouli, a kau aku au i ke kapa makena i uhi no lakou.

4. Ua haawi mai la ka Haku ke Akua iaʻu i ka olelo o ka mea akamai, i ike ai au e olelo aku i kahi olelo i ka manawa pono ia oe, e ko ka hale o Iseraela. Ia oukou i luhi ai, ala mai la no oia i kela kakahiaka i keia kakahiaka. Hoala mai oia i koʻu pepeiao e lohe e like me ka mea i aoia.

5. Ua hoohakahaka mai la ka Haku ke Akua i koʻu pepeiao, aole au i kipi aku, aole au i hoi hope.

6. Haawi no au i koʻu kua i ka mea hahau, a me koʻu papalina i ka poe i uhuki lauoho. Aole au i huna i koʻu maka mai ka hilahila a me ke kuha ana,

7. No ka mea, na ka Haku ke Akua e kokua mai iaʻu; nolaila, aole au e hoopalaimaka ia. Nolaila, i kau ai au i koʻu maka me he pohaku paea la, a ua ike au aole au e hilahila ana;

8. A ua kokoke mai ka Haku, a e hoopono ana oia iaʻu. Owai ka mea e hakaka me au? E ku pu me au. Owai la koʻu hoa paio? E hookokoke mai oia iaʻu, a e hahau aku no au ia ia me ka ikaika o koʻu waha;

9. No ka mea, e kokua mai no ka Haku ke Akua iaʻu. A o ka poe a pau e hoohewa mai auanei iaʻu, aia hoi, e lilo no lakou a pau i mea kahiko me he lole la, a e ai no ka mu ia lakou.

10. Owai la ka mea iwaena o oukou i makau i ka Haku; e hoolohe ana hoi i ka leo o kana kauwa; ka mea e hele ana ma ka pouli, aohe ona malamalama?

11. Aia hoi, o oukou a pau i hoa i ke ahi, ka poe i hoopuni ia oukou iho ma na huna ahi, e hele oukou i ka malamalama o ko oukou ahi, a ma na huna ahi a oukou i kuni ai. E loaa no keia ia oukou ma kuu lima—e moe no oukou ilalo iloko o ka eha.