Mokuna 3
1. Ano, ke olelo aku nei au ia oe, e Iosepa e, kaʻu hanau hope, ua hanau ia mai la oe ma koʻu wa popilikia ma ka waonahele; he oiaio, ma na la o koʻu kaumaha nui loa, ua hapai mai la kou makuwahine ia oe.
2. A e hoolaa no hoi ka Haku i keia aina nou, he aina maikai loa no ia, no kou hooilina a no ka hooilina o kau poe hua me kou poe hoahanau, no kou maluhia a mau loa aku, ina e malama pono oukou i na kauoha a ka Mea Hemolele o ka Iseraela.
3. Ano, e Iosepa, kaʻu hanau hope e, aʻu i lawe mai ai noloko mai o ka waonahele, kahi oʻu i hoopopilikia ia ai; na ka Haku e hoopomaikai ia oe no ka wa pau ole, no ka mea, aole e hoopau loa ia kau poe hua.
4. No ka mea, aia hoi, ooe no ka hua a koʻu puhaka, a he mamo no au na Iosepa, ka mea i lawe pio ia aku i Aigupita. A ua nani na berita a ka Haku, ana i hana mai ai ia Iosepa;
5. Nolaila, ike io o Iosepa i ko kakou la nei. A loaa ia ia he olelo hoopomaikai na ka Haku mai, e hoala mai ka Haku ke Akua i kekahi lala pono i ko ka hale o Iseraela, noloko mai o na hua a kona puhaka; aole o ka Mesia, aka he lala e haihai ia mai; aka hoi, e hoomanao ia ma na berita a ka Haku, e hoike ia ka Mesia ia lakou ma na la mahope, i ka mana o ka Uhane, i ka hoopuka ana aku ia lakou noloko mai o ka pouli i ka malamalama; he oiaio, noloko mai o ka pouli i huna ia, a noloko mai o ka noho pio ana i ke kuokoa.
6. No ka mea, hoike io mai la o Iosepa, i ka i ana: E hoala auanei ka Haku koʻu Akua i kahi Mea nana Urima, a e lilo oia i mea nana Urima pookela i ka hua a koʻu puhaka.
7. Oiaio, olelo io mai la o Iosepa, penei, wahi a ka Haku, iaʻu: Naʻu no e hoala i kahi mea nana Urima pookela mailoko mai o na hua a kou puhaka; a e manao nui ia oia mawaena o na hua a kou puhaka. A ia ia au e haawi aku ai i kauoha, i hana oia i kahi hana no ka hua a kou puhaka, kona poe hoahanau, he hana pomaikai nui ia lakou, i ka lawe ia ana mai o lakou i ka ike i na berita aʻu i hana aku ai i kou mau kupuna kane.
8. A e haawi no au ia ia i kauoha, i hana ole oia i kekahi hana e, o ka hana wale no aʻu e kauoha aku ai ia ia. A e hoolilo au ia ia i mea nui imua o koʻu mau maka; no ka mea, e hana no oia i kaʻu hana.
9. A e nui auanei oia e like me Mose, ka mea aʻu i olelo aku ai e hoala auanei au ia ia no oukou, e hoola i koʻu poe kanaka, e ko ka hale o Iseraela.
10. A e hoala no au ia Mose, e hoopakele i kou poe kanaka mailoko mai o ka aina o Aigupita.
11. Aka e hoala no au i kekahi mea nana Urima noloko mai o na hua a kou puhaka; a e haawi no au ia ia i ka mana e hoopuka mai i kaʻu olelo i na hua a kou puhaka; aole i ka hoopuka ana mai o kaʻu olelo wale no, wahi a ka Haku, aka i ka hoomaopopo ana ia lakou i kaʻu olelo, i hele e aku [ai] iwaena o lakou.
12. Nolaila, e palapala auanei na hua a kou puhaka; a e palapala auanei na hua a ka puhaka o Iuda; a o na mea e palapala ia auanei e na hua a kou puhaka, a o na mea no hoi e palapala ia auanei e na hua a ka puhaka o Iuda, e ulu pu laua a elua i hookahi, i ka hoohoka ana i na ao wahahee ana, a i ka hoopau ana i na paio, a i ka hookupaa ana i ka maluhia mawaena o na hua a kou puhaka, a i ka lawe ia ana mai o lakou i ka ike no ko lakou poe kupuna ma na la mahope; a i ka ike no hoi no kaʻu mau berita, wahi a ka Haku.
13. A noloko o ka nawaliwali e hoolilo ia auanei oia i ikaika, ma ia la e hoomaka ai kaʻu hana mawaena o koʻu poe kanaka a pau, i ka hoihoi ana ia oe, e ko ka hale o Iseraela, wahi a ka Haku.
14. A pela i wanana mai ai o Iosepa, i ka i ana: Aia hoi, e hoopomaikai no ka Haku i ua mea nana Urima la; a o ka mea e imi e pepehi iaia, e hoohoka ia lakou; no ka mea, o keia mea hoopomaikai aʻu i loaa ai na ka Haku mai, no ka hua a koʻu puhaka, e hooko ia auanei ia. Aia hoi, ua ike io no au e hooko ia ana keia olelo hoopomaikai.
15. A e kapa ia auanei kona inoa mamuli o koʻu; a mamuli ia o ka inoa o kona makuakane. A e like auanei oia me au; no ka mea, o ka mea a ka Haku e hoopuka mai ai ma kona lima, ma ka mana o ka Haku, e lawe mai auanei ia i koʻu poe kanaka i ke ola;
16. Oiaio, peia i wanana mai ai o Iosepa: Ua paa iaʻu keia mea, oia, e like me koʻu kanalua ole i ka olelo hoopomaikai no Mose; no ka mea, ua olelo mai la ka Haku iaʻu, e malama au i kau poe hua no ka wa pau ole.
17. A ua i mai la ka Haku, E hoala au he Mose; a e haawi no au i mana ia ia ma ke kookoo; a e haawi au ia ia i ka naauao ma ka palapala ana. Aole nae au e hoomohala i kona elelo, i olelo nui oia; no ka mea, aole au e hoolilo ia ia i ikaika ma ka olelo ana, aka e kakau auanei no au, i koʻu kanawai ia ia, me ka manamana lima o koʻu lima ponoi; a e hana au i kanaka hai olelo nona.
18. A i mai la no hoi ka Haku iaʻu: E hoala au i ka hua a kou puhaka; a e hana no au i kanaka hai olelo nona. A owau nei, aia hoi, e haawi no au ia ia e hiki ia ia ke palapala auanei i ka palapala ana o na hua a kou puhaka, i ka hua a kou puhaka; a na ke kanaka hai olelo a kou puhaka e hai aku auanei ia mea.
19. A o na olelo ana e kakau ai, oia na olelo ku pono i koʻu naauao, e hiki aku ai i ka hua a kou puhaka. A e like auanei ia me he mea la ua kahea aku ka hua a kou puhaka ia lakou mai ka lepo ae; no ka mea, ua ike au i ko lakou manaoio.
20. A e kahea no auanei lakou mai ka lepo ae; he oiaio, i ka mihi i ko lakou poe hoahanau, mahope iho o ka make ana o na hanauna he nui wale mahope o lakou. Eia kekahi, e laha aku ko lakou kahea ana, e like me ka pohihihi ole o ka lakou mau olelo.
21. No ko lakou manaoio, e puka aku auanei ka lakou mau olelo noloko aku o koʻu waha i ko lakou poe hoahanau, he poe hua lakou a kou puhaka; a e hoolilo au i ka nawaliwali o ka lakou mau olelo i ikaika ma ko lakou manaoio, i ka hoomanao ana i kaʻu berita aʻu i hana aku ai i kou mau kupuna.
22. Ano, aia hoi, e kaʻu keiki Iosepa, mamuli o keia ano, wanana mai la koʻu kupuna kane i ka wa kahiko.
23. Nolaila, no keia berita ua hoopomaikai ia oe; no ka mea, aole e anai ia kau hua, no ka mea, e hoolohe auanei lakou i na olelo o ka buke.
24. A e ku iluna auanei kekahi mea ikaika iwaena o lakou, nana e hana i ka pono he nui, ma ka olelo a ma ka hana no hoi, he mea paa hana oia ma na lima o ke Akua, me ka manaoio nui loa, e hana i na hana kupanaha loa, a e hana i ka mea nui imua o ka maka o ke Akua, i ka lawe hou ana mai i ka hoihoi nui ana i ko ka hale o Iseraela, a i ka hua a kou poe hoahanau.
25. Ano, ua pomaikai ooe, e Iosepa. Aia hoi, he uuku oe; nolaila, e hoolohe i na olelo a kou kaikuaana a Nepai, a e hana ia mai auanei ia oe, e like me na olelo aʻu i olelo ai. E hoomanao oe i na olelo a kou makuakane e make ana. Amene.