Ka Buke Lua A Nepai

1. Ano, eia kekahi, mahope iho o kaʻu, ka Nepai, ao ana aku i koʻu mau hoahanau, olelo ae la no hoi ko makou makuakane, o Lehi, i na mea he nui loa ia lakou, i ka nui o na mea a ka Haku i hana mai ai no lakou, i ka lawe ia ana mai o lakou mailoko mai o ka aina o Ierusalema.

2. A olelo ae la oia ia lakou no na kipi ana o lakou maluna o ke kai, a me ke aloha o ke Akua i kona hoola ana ia lakou, i ole lakou i ale ia iloko o ke kai.

3. A olelo ae la no hoi oia ia lakou no ka aina i hai mua ia ai i loaa ai ia lakou; a no ka nui o ka lokomaikai o ka Haku i kana ao ana mai ia lakou e holo mailoko mai o ka aina o Ierusalema.

4. No ka mea, aia hoi, wahi ana, ua ike au i ka hihio, a ua ike au iloko o ia mea ua luku ia o Ierusalema; a ina ua noho kakou ma Ierusalema, ina ua make pu no hoi kakou.

5. Aka, i mai la oia, me ko kakou mau pilikia, ua loaa nae ia kakou he aina i olelo mua ia ai, he aina i oi aku ka maikai mamua o na aina e ae a pau; he aina a ka Haku ke Akua i berita mai ai me au, e lilo i aina hooilina no kaʻu poe hua. Oiaio, ua berita mai ka Haku i keia aina noʻu a no ka poe hua no ka wa pau ole; a no ka poe a pau e alakai ia mai noloko mai o na aina e, e ka lima o ka Haku.

6. Nolaila, ke wanana nei au, o Lehi, e like me ke kuhikuhi ana o ka Uhane iloko oʻu, aole e hele mai auanei kekahi mea iloko o keia aina, ke lawe ole ia mai lakou e ka lima o ka Haku.

7. Nolaila, ua hoolaa ia keia aina i ka mea ana e lawe mai ai. A ina paha lakou e hookauwa aku nana e like me na kauoha ana i haawi mai ai, e lilo ia i aina kuokoa no lakou; nolaila, aole loa lakou e lawe ia ilalo iloko o ka noho pio ana; ina pela, ea, no ka hana ino ia; no ka mea, ina he nui loa ka hana ino, e hoino ia ka aina no lakou; aka, i ka poe pono, ea, e hoopomaikai ia ia no ka wa pau ole.

8. Aia hoi, he mea pono ke huna ia keia aina i keia manawa me ka ike ole mai o na lahuikanaka e; no ka mea, e kawowo auanei na kanaka ma ka aina nei, a koe ole he wahi no ka hooilina.

9. Nolaila, ua loaa iaʻu, ia Lehi, he olelo paa, ina e malama pono ka poe a ka Haku ke Akua e lawe mai ai noloko mai o ka aina o Ierusalema, i kana mau kauoha, e hoopomaikai ia lakou maluna o keia aina; a e hookaawale ia aku lakou mai na lahuikanaka e ae aku, i hiki ia lakou ke loaa keia aina ia lakou iho. A ina hoi e malama pono lakou i kana mau kauoha, e hoopomaikai ia lakou maluna o ka ili o keia aina, aole mea e hoopilika ia lakou, aole hoi e lawe aku i ko lakou aina hooilina; a e noho no lakou me ka maluhia no ka wa pau ole.

10. Aka hoi, a hiki mai ka manawa e emi ai lakou iloko o ka hoomaloka, mahope iho o ko lakou loaa ana na mea pomaikai nui, mai ka lima mai o ka Haku: a i loaa no hoi ka ike no ka hana ia ana o ka honua nei, a me na kanaka a pau, e ike ana i na hana nui a kupaianaha a ka Haku, mai ka hookumu ia ana mai o ka honua nei; a i loaa ia lakou ka mana no hoi e hana i na mea a pau ma ka manaoio; a i loaa na kauoha a pau no hoi mai kinohi mai, a i lawe ia mai nei e kona lokomaikai keu loa i keia aina maikai i hai mua ia ai; aia hoi, ke i aku nei au, ina e hiki mai ka la a lakou e hoomalau ai i ka Mea Hemolele o ka Iseraela, i ka Mesia oiaio, ko lakou Mea Hoolapanai a me ko lakou Akua, aia hoi, e kau no ka hoopai ana o ka Mea Pono maluna o lakou;

11. He oiaio, e lawe mai oia i na lahuikanaka e ae io lakou la, a e haawi no oia i mana ia lakou, a e kaili aku oia i ko lakou aina hooilina; a nana lakou e hoopuehu aku a e hahau no hoi.

12. Oiaio, mai kekahi hanauna aku i kekahi, he nui no ka hookahe ana o ke koko a me ka hoopai ana iwaena o lakou; nolaila, e aʻu mau keiki, ke makemake nei au e hoomanao oukou; he oiaio, ke makemake nei au e hoolohe mai oukou i kaʻu mau olelo.

13. E! Ina e ala oukou; e ala ae mai ka hiamoe loa, he oiaio, mai ka hiamoe o gehena, a e hoolei aku i na kaula hao weliweli a oukou i paa ai, oia na kaula hao i paa ai na keiki a kanaka, i kaikai pio ia aku lakou ilalo i ke awawa mau loa o ka ehaeha a o ka poino!

14. E ala! A e ku iluna mai ka lepo mai, a e hoolohe i ka olelo a kahi makua haalulu, o kona mau lala e waiho koke ana oukou ilalo iloko o ka lua kupapau anu a anoano, ma kahi i hiki ole ai i kekahi mea hele aku ke hoi mai; he mau la kakaikahi i koe, a e hele no au i ke ala o ko ke ao nei a pau.

15. Aka hoi, ua hoolapanai mai la ka Haku i kuu uhane mai gehena mai: ua ike au i kona nani, ua hoopuni mau ia au e na lima o kona aloha.

16. Ke ake nei au e hoomanao oukou i na olelo paa a me na hoopai pono ana o ka Haku; aia hoi, oia ka mea a koʻu uhane i manao nui ai mai kinohi mai.

17. Ua hooluhi ia mai la koʻu naau me ke kaumaha, ia manawa aku ia manawa aku; no ka mea, ua makau au o hoopuka mai ka Haku ko oukou Akua i ka nui o kona inaina, maluna o oukou, no ka paakiki o ko oukou mau naau, a e hooki ia aku oukou a make mau loa aku;

18. A i ole ia, e hiki mai kekahi mea mainoino maluna o oukou no na hanauna he nui; a e hahau ia oukou e ka pahikaua, a e ka wi, a e hoowahawaha ia, a e alakai ia aku e like me ka makemake a me ka noho pio ana o ke diabolo.

19. E kaʻu mau keiki, ina aole e hiki mai keia mau mea maluna iho o oukou, aka, ina he lahuikanaka i koho ia a i aloha ia oukou e ka Haku. Aka hoi, e hana ia kona makemake: no ka mea, ua pololei kona mau aoao a mau loa;

20. A ua i mai oia, Ina e malama pono oukou i kaʻu mau kauoha, e hoopomaikai ia auanei oukou ma ka aina; aka ina aole oukou e malama i kaʻu mau kauoha, e hooki ia aku oukou mai koʻu alo aku.

21. Ano, ina e loaa i kuu uhane ka hauoli no oukou, a ina e haalele koʻu naau i keia ao me ka hoihoi no oukou, a i lawe ole ia ai au ilalo i ka lua kupapau me ke kaumaha a me ka eha o ka naau, e ala ae mai ka lepo mai, e na keiki aʻu, a e hookanaka, a e kupaa ma ka manao hookahi, a ma ka naau hookahi e lokahi ai ma na mea a pau, i ole ai oukou e lawe ia ilalo i ka noho pio ana;

22. I ole ai oukou e hoomainoino ia me ka poino eha; i loaa ole ai hoi ia oukou ka huhu o ke Akua hoopono maluna o oukou, i ka make ana, he oiaio, i ka make mau loa ana o ka uhane a me ke kino.

23. E ala, e kaʻu mau keiki: e aahu iho i ke kahiko o ka pono. E hoolei aku i na kaula hao o oukou e paa nei, a e puka mai mailoko mai o ka pouli, a e ku mai iluna mai ka lepo mai.

24. Mai ku e hou i ko oukou kaikaina, o kona ike ua nani ia, a ua malama oia i na kauoha a ke akua mai ka manawa a kakou i haalele aku ai ia Ierusalema, a ua lilo oia i mea hana ma na lima o ke Akua, i ka lawe ana mai ia kakou i ka aina i hai mua ia ai; no ka mea, ina aole oia, ina ua make io no kakou i ka pololi ma ka waonahele; aka hoi, imi iho la oukou e kaili aku i kona ola; he oiaio, a ua loaa ia ia ka eha nui o ka naau no oukou.

25. A ke makau nui nei au a haalulu no hoi no oukou, o loaa hou oia i ka pilikia; no ka mea, aia hoi, ua hoohewa oukou ia ia me ka olelo ae, ua imi oia i ka mana a me ka hookiekie maluna o oukou; aka ua ike au aole oia i imi i ka mana a me ka hookiekie maluna o oukou; aka ua imi oia i ka nani o ke Akua, a i ko oukou pomaikai mau loa.

26. A ua ohumu iho la oukou no kona hai maopopo ana ia oukou. Ke i mai nei oukou ua oi kana olelo ia oukou; ke i mai nei oukou ua huhu ae la oia ia oukou. Aka hoi, o ka oi o kana oia ka oi o ka mana o ka olelo a ke Akua, iloko ona; a o ka mea a oukou i kapa mai ai he huhu, oia ka oiaio, e like me ia iloko o ke Akua, ka mea i hiki ole ai ia ia ke uumi, e hoike aku ana me ka wiwo ole no ka oukou hana ino ana.

27. A o ko ke Akua mana pu me ia e pono ai, oiaio, i kana kauoha ana ia oukou, i hoolohe oukou. Aka hoi, aole oia, aka o ka Uhane o ka Haku iloko ona, e hoohamama ana i kona waha e olelo, i hiki ole ia ia ke pane.

28. Ano, e kaʻu keiki Lamana, a me Lemuela olua me Sama hoi, a me na keiki aʻu no hoi oia na keiki a Isemaela, aia hoi, ina e hoolohe oukou i ka olelo a Nepai, aole oukou e make. A ina e hoolohe oukou i kana, ke waiho nei au he hoopomaikai no oukou, he oiaio, o kuu hoopomaikai mua ana.

29. Aka, ke ole oukou e hoolohe i kana, e lawe aku au i kuu hoopomaikai mua ana, he oiaio, i kuu hoopomaikai ana, a e kau ia maluna ona.

30. Ano, e Zorama, ke olelo aku nei au ia oe; Aia hoi, ooe no ke kauwa a Labana; aka hoi, ua lawe ia mai la oe noloko mai o ka aina o Ierusalema, a ua ike au he hoaaloha io oe no kaʻu keiki no Nepai, a mau loa aku.

31. Nolaila, no kou malama pono ana, e hoomaikai pu ia kau hua me kana hua, i noho loihi ai lakou me ka pomaikai maluna o ka ili o keia aina; aole mea e hoeha, aole hoi i hoopilikia i ko lakou noho pomaikai ana, koe wale no ka hana ino iwaena o lakou iho, maluna o keia aina no ka wa mau loa.

32. Nolaila, ina e malama pono oukou i na kauoha a ka Haku, ua hoolaa mai la ka Haku i keia aina i ka noho maluhia pu ana o kau hua me na hua a kaʻu keiki.