1. Eia kekahi, mahope iho o koʻu, o ko Nepai, heluhelu ana i keia mau mea i kahakaha ia ma na papa keleawe, hele mai la koʻu mau hoahanau ioʻu nei, a i mai la iaʻu, Heaha la ke ano o keia mau mea au i heluhelu ai? Aia hoi, e hoomaopopo ia anei keia mau mea e like me ko ka Uhane, e hiki mai ana mamuli o ko ka Uhane, aole mamuli o ko ke kino?

2. A i aku la au, o Nepai, ia lakou, Aia hoi, ua hoike ia mai la ia mau mea i ke kaula e ka leo o ka Uhane; no ka mea, ua hoike ia mai ma ka Uhane na mea a pau i ka poe kaula, e hiki mai ana auanei maluna o na keiki a kanaka mamuli o ko ke kino.

3. Nolaila, o na mea aʻu i heluhelu ai, he mau mea e pili ana i na mea o ke kino a me na mea hoi o ka uhane; no ka mea, eia kahi mea akaka, e hoopuehu ia ae ko ka hale o Iseraela ma neia hope aku, maluna iho o ka ili a pau o ka honua, a iwaena no hoi o na lahuikanaka a pau.

4. Aia hoi, ua nalowale iho la he nui loa i keia manawa, i ike ole ia e ka poe e noho ana ma Ierusalema. Oiaio, ua alakai ia aku la ka nui o na ohana a pau; a ua hoopuehu ia ma o, a ma o, maluna o na mokupuni o ke kai; a o kahi a lakou i noho ai, aole kekahi o kakou i ike, eia wale no, ua ike kakou ua alakai ia aku lakou.

5. A mahope mai o ke alakai ia ana aku o lakou, ua wanana ia mai la keia mau mea no lakou, a no ka poe a pau e hoopuehu ia a e hoohoka ia ma neia hope aku, no ka Mea Hemolele o ka Iseraela; no ka mea, e hoopaakiki no lakou i ko lakou mau naau e ku e ia ia; no ia mea, e hoopuehu ia ae lakou iwaena o na lahuikanaka a pau, a e inaina ia e na kanaka a pau.

6. Aka hoi, mahope iho o ka hanai ia ana o lakou e ka poe Genetile, a i hapai ka Haku i kona lima maluna iho o ka poe Genetile, a i kukulu ia lakou iluna i hae, a i hii ia ka lakou poe keikikane ma ko lakou la mau lima, a i halihali ia ka lakou poe kaikimahine maluna o ko lakou la mau poohiwi, aia hoi, o keia mau mea i olelo ia, no ke kino ia; no ka mea, pela io no ka berita a ka Haku i ko kakou poe kupuna kane; a e pili ana ia ia kakou ma na la e hiki mai ana, a me ko kakou poe hoahanau no hoi o ko ka hale o Iseraela.

7. A eia no hoi kekahi ano, e hiki mai ana ka manawa, mahope iho o ka hoopuehu ia ana o ko ka hale a pau o Iseraela, e hoala no ka Haku, ke Akua, i kekahi aupuni ikaika, mawaena o ka poe Genetile, he oiaio, maluna iho o ka ili o keia aina, a e hoopuehu ia auanei ka kakou poe hua e lakou.

8. A mahope iho o ka hoopuehu ia ana o ka kakou poe hua, e hoomaka no ka Haku, ke Akua, e hana i kahi hana kupanaha, iwaena o ka poe Genetile, i kahi hana e pomaikai loa ai auanei ka kakou poe hua; nolaila, ua hoohalike ia ia i ko lakou hanai ia ana e ka poe Genetile, a i ke kaikai ia ana ma ko lakou mau lima, a maluna o ko lakou mau poohiwi.

9. A he hana no hoi ia e pomaikai ai ka poe Genetile: aole ka poe Genetile wale no, aka ko ka hale a pau o Iseraela, i ka hoomaopopo ana aku i na berita a ka Makua o ka lani ia Aberahama, i ka i ana, Ma kau hua e hoopomaikai ia ai na lahuikanaka a pau o ka honua.

10. A ke makemake nei au, e koʻu mau hoahanau, e ike oukou ua hiki ole i na lahuikanaka a pau o ka honua nei ke hoopomaikai ia, ke ole hoike mai oia i kona lima imua o na maka o na lahuikanaka.

11. Nolaila, e hoomaka no ka Haku, ke Akua, e hoike aku i kona lima imua o na lahuikanaka a pau, i ka lawe ana mai i kana mau berita a me kona euanelio, i ka poe o ka hale o Iseraela.

12. Nolaila, e lawe hou no oia ia lakou noloko mai o ka noho pio ana, a e houluulu ia lakou i ko lakou aina hooilina; a e lawe ia mai noloko mai o ka pouli, a noloko mai o ka poeleele; a e ike auanei lakou, o ka Haku oia ko lakou Mea e Ola ai, a me ko lakou Mea Hoolapanai, ka Mea Mana o ka Iseraela.

13. A o ke koko o ua ekalesia nui a ino loa la, oia ka wahine hookamakama o ka honua nei a pau, e huli auanei ia maluna o ko lakou mau poo ponoi iho, no ka mea, e kaua no lakou mawaena o lakou iho, a e haule ka pahikaua o ko lakou mau lima maluna o ko lakou mau poo ponoi iho, a e ona auanei lakou i ko lakou koko ponoi iho.

14. A o na lahuikanaka a pau e kaua aku ia oe, e ko ka hale o Iseraela, e hookue ia auanei lakou kekahi i kekahi, a e haule no lakou iloko o ka lua, a lakou i eli ai e hoopahele i ka poe kanaka a ke Akua. A e luku ia ka poe a pau e kaua aku ia Ziona. A o ua wahine hookamakama nui la, nana i hookakuli i na aoao pololei o ka Haku, he oiaio, o ua ekalesia nui a ino loa la, e hiolo auanei ia i ka lepo, a e nani wale kona hiolo ana.

15. No ka mea, aia hoi, wahi a ke kaula, e hikiwawe mai ana ka manawa, aole o Satana mana hou maluna o na naau o na keiki a kanaka; no ka mea, e hiki koke mai ana ka la, o ka poe haaheo a pau a me ka poe hana ino, me he mauu la lakou; a e hiki mai ana ka la e pau ai lakou i ke ahi.

16. No ka mea, e hikiwawe mai ana ka manawa, e ninini ia aku ai ko ke Akua inaina nui, maluna iho o na keiki a pau a kanaka; no ka mea, aole oia e ae aku i ka poe hewa e luku ae i ka poe pono.

17. Nolaila, e hoola no oia i ka poe pono ma kona mana, ina ma ka haawi ana mai i kona inaina nui, a e hoola ia ka poe pono, he oiaio, i ka luku ia ana o ko lakou poe enemi e ke ahi. No ia mea la, aole e pono no ka poe pono e makau; no ka mea, penei wahi a ke kaula, e hoola ia no lakou, ina paha me he mea la ma o ke ahi la.

18. Aia hoi, e oʻu mau hoahanau, ke i aku nei au ia oukou, e hiki koke mai no auanei keia mau mea e pono ai; he oiaio, o ke koko, a me ke ahi, a me ka ohu o ka uahi; e hiki io mai ia maluna o ka ili o ka honua nei; e hiki mai ana ia i na kanaka ma ke kino, ina e hoopaakiki lakou i ko lakou mau naau e ku e i ka Mea Hemolele o ka Iseraela;

19. No ka mea, aia hoi, aole e luku ia ka poe pono; no ka mea, e hiki io mai ka manawa, e hooki ia aku ai ka poe a pau e kaua aku ana ia Ziona.

20. A e hoomakaukau io no ka Haku i ala no kona poe kanaka, i ka hooko ana i na olelo a Mose, ana i olelo mai ai, i ka i ana: E hoala ae auanei ka Haku ko oukou Akua i kekahi kaula ia oukou, e like me au, oia ka oukou e hoolohe ai ma na mea a pau ana e olelo mai ai ia oukou. A e hiki mai ka manawa, o ka poe a pau e hoolohe ole ai i ua kaula la e oki ia lakou, mai ka poe kanaka aku.

21. Ano, ke hai aku nei au, o Nepai, ia oukou, o keia kaula a Mose i olelo mai ai, oia ka Mea Hemolele o ka Iseraela; nolaila, e hoopai no oia ma ka pono;

22. A o ka poe pono aole o lakou mea e makau ai, no ka mea, o lakou ka poe e hoohoka ole ia. Aka, o ke aupuni o ke diabolo ka mea e kukulu ia ana mawaena o na keiki a kanaka, a ua kukulu ia ua aupuni la mawaena o ka poe ma ke kino;

23. No ka mea, e hiki koke mai ana ka manawa, o na ekalesia a pau i kukulu ia i loaa ai ka waiwai, a me ka poe i kukulu ia i loaa ai ka mana maluna o ke kino, a me ka poe i kukulu ia e lilo i mea e mahalo ia imua o na maka o ko ke ao nei, a me ka poe e imi ana i na kuko o ke kino a me na mea o ko ke ao nei, a e hana i kela ano o ka hewa i keia ano o ka hewa; he oiaio, o ka poe a pau no ke aupuni o ke diabolo, oia ka poe e pono ke makau, a ke haalulu, a ke naueue; he oiaio, o lakou no ka poe e hoohaahaa ia ilalo ma ka lepo; o lakou no ka poe e wela ana me he mauu la; a ua like keia me na olelo a ke kaula.

24. A e hiki koke mai ana ka manawa, e alakai ia iluna ka poe pono e like me na bipi keiki i kupalu ia, a e noho alii ka Mea Hemolele o ka Iseraela me ka lanakila, a me ka ikaika, a me ka mana, a me ka nani nui.

25. A ke houluulu mai la oia i kana poe keiki mai na kihi eha o ka honua; a ke helu mai la oia i kana poe hipa, a ua ike no lakou ia ia; a e lilo auanei i hookahi ohana hipa a i hookahi kahuhipa; a e hanai oia i kana poe hipa, a iloko ona e loaa ai ia lakou ka ai.

26. A no ka pono o kona poe kanaka, he mana ole ko Satana; nolaila, aole e hiki ke hookuu ia oia no na makahiki he nui wale; no ka mea, aole ona mana maluna o na naau o na kanaka, no ka mea, e noho ana lakou ma ka pono, a e noho alii ana ka Mea Hemolele o ka Iseraela.

27. Ano, aia hoi, ke i aku nei au, o Nepai, ia oukou, e hiki io mai ana no keia mau mea a pau ma ke kino.

28. Aka, aia hoi, e noho maluhia auanei na lahuikanaka a pau, na ohana, na olelo, a me na kanaka, iloko o ka Mea Hemolele o ka Iseraela, ke mihi lakou.

29. Ano, ke hooki nei au, o Nepai, no ka mea, aole au i aa e olelo hou aku i keia manawa, no keia mau mea.

30. Nolaila, e oʻu mau hoahanau, ke makemake nei au e hoomanao oukou, he oiaio na mea i kahakaha ia maluna o na papa keleawe; a ke hoike mai nei ia mau mea, he mea pono no ke kanaka e hoolohe i na kauoha a ke Akua.

31. Nolaila, aole pono no oukou e manao, owau nei a me kuu makuakane na mea wale no i hoike, a i ao aku no hoi i keia mau mea. Nolaila, ina e hoolohe pono oukou i na kauoha, a e hoomau pono i ka hopena, e hoola ia oukou ma ka la hope. A pela io no ia. Amene.