1. A olelo aku la au i koʻu mau kaikuaana, i ka i ana, E pii hou aku kakou i Ierusalema, a e hoomau pono kakou i ka malama ana i na kauoha a ka Haku; no ka mea, ua mana loa oia mamua o ko ka honua nei a pau, a no ke aha la i mana loa ole ai mamua o Labana a me kona poe he kanalima, he oiaio, a mamua o kona mau umi tausani no hoi.

2. Nolaila, e pii kakou, e ikaika kakou e like me Mose;—no ka mea, olelo aku la oia i ke kai o ke Kai Ula, a kaawale iho la ia ma o a ma o, a hele mai la ko kakou poe kupuna mawaena ma ka aina maloo, mailoko mai o ka noho pio ana, a hahai mai la ka poe kaua o Parao, a piholo iho la iloko o ke kai o ke Kai Ula.

3. Ano, aia hoi, ua ike oukou he mea oiaio keia; a ua ike no hoi oukou ua olelo mai la kekahi anela ia oukou, a no ke aha la e kanalua nei oukou? E pii kakou; ua hiki i ka Haku ke hoopakele mai ia kakou, e like me ko kakou poe kupuna, a e pepehi aku ia Labana, e like me ko Aigupita poe.

4. Ano, i ka wa aʻu i olelo aku ai i keia mau olelo, ua huhu no laua, a ua ohumu no; aka hoi, hahai mai la nae lakou mahope oʻu, a hiki aku la makou mawaho o na pa o Ierusalema.

5. A ma ka po no ia; a koi aku la au ia lakou e pee ae mawaho o na pa. A mahope iho o ko lakou pee ana, kokolo aku la wau, o Nepai, iloko o ke kulanakauhale, a hele aku la i ka hale o Labana.

6. A ua alakai ia au e ka Uhane, aole e ike ana mamua i na mea aʻu e hana ai.

7. Aka hoi, hele aku la au, a i koʻu hookokoke ana i ko Labana hale, ike aku la au i kekahi kanaka, a ua hina iho la ia i ka honua imua oʻu, no ka mea, ua ona oia i ka waina.

8. A hiki aku la au io na la, ua ike au o Labana no ia.

9. A ike iho la au i kana pahikaua, a unuhi ae la au ia mea mailoko mai o kona wahi, a o ke au o ia mea he gula maemae no ia, a ua nani loa kona hana ia ana: a ua ike au i ka pahi he kila maikai loa ia.

10. Eia kekahi, ua koi ia mai la au e ka Uhane e pepehi aku ia Labana; aka, nalu iho la au iloko o kuu naau, aole au i hookahe aku i ke koko o kanaka; a emi mai la au me ka makemake ole e pepehi ia ia.

11. A i hou mai la ka Uhane iaʻu, Aia hoi ua haawi mai la ka Haku ia ia iloko o kou mau lima; he oiaio, a ua ike iho la no hoi au ua imi kela e lawe aku i koʻu ola iho; he oiaio, aole oia i hoolohe mai i na kauoha a ka Haku; a ua kaili aku la no hoi oia i ko makou waiwai.

12. Eia kekahi, i hou mai la ka Uhane iaʻu, E pepehi ia ia, no ka mea, ua haawi mai la ka Haku ia ia iloko o kou mau lima.

13. Aia hoi, e luku ana ka Haku i ka poe hewa e hoopuka mai ai i kana mau hana pono. A e aho ka make ana o ke kanaka hookahi, mamua o ka emi ana a me ka make ana o kekahi lahuikanaka iloko o ka hoomaloka.

14. A, ano, owau, o Nepai, i ka wa aʻu i lohe ai i keia mau olelo, hoomanao iho la au i na olelo a ka Haku, ana i olelo mai ai iaʻu ma ka waonahele, i ka i ana mai, Ina e malama pono kau poe hua i kaʻu mau kauoha, e pomaikai auanei lakou ma ka aina i hai mua ia ai.

15. He oiaio, a hoomanao iho la hoi au aole e hiki ia lakou ke malama i na kauoha a ka Haku e like me ke kanawai o Mose, ke ole e loaa ia lakou ke kanawai.

16. A ua ike no hoi au ua kahakaha ia ke kanawai maluna o na papa keleawe.

17. Eia hou—ua ike au ua haawi mai la ka Haku ia Labana iloko o na lima oʻu no keia mea, i loaa mai ai iaʻu na mooolelo, e like me kana mau kauoha.

18. Nolaila, hoolohe aku la au i ka leo o ka Uhane, a lalau iho la ia Labana ma kona lauoho, a oki ae la au i kona poo me kana pahi kaua iho.

19. A mahope iho o koʻu oki ana i kona poo me kana pahikaua iho, lalau iho la au i na aahu o Labana a hoaahu mai la i koʻu kino iho; he oiaio, i na mea a pau; a kaei iho la au i kona aahu kaua ma koʻu puhaka.

20. A mahope iho o kaʻu hana ana i keia, hele aku la au i kahi o ko Labana waihona waiwai. A i koʻu hele ana i ka waihona waiwai o Labana, aia hoi, ike ae la au i ke kauwa a Labana, ia ia na ki o ka waihona waiwai. A kauoha aku la au ia ia ma ka leo o Labana, e hele pu me au iloko o ka waihona waiwai.

21. A manao iho la kela o kana haku o Labana no au, no ka mea, ike mai la oia i na aahu o Labana, a me ka pahikaua no hoi, i kaei ia ma koʻu puhaka.

22. A olelo mai la oia iaʻu no na lunakahiko o ka poe Iudaio, ua ike oia ua hele pu kana haku o Labana me lakou i ka po.

23. A olelo aku la au ia ia me he mea la o Labana no wau.

24. A olelo aku la no hoi au ia ia, e halihali ana no au i na mooolelo i kahakaha ia maluna o na papa keleawe, i kuu mau kaikuaana la, aia lakou mawaho o na pa.

25. A kena aku la no hoi au ia ia e hahai mai mahope oʻu.

26. A e manao ana oia no na kaikuaana ma ka ekalesia kaʻu olelo ana, a owau io no ua Labana la aʻu i pepehi aku ai, nolaila, hahai mai la oia iaʻu.

27. A olelo pinepine mai la oia iaʻu no na lunakahiko o ka poe Iudaio, iaʻu i hele aku ai i kuu mau hoahanau la, mawaho o na pa.

28. Eia kekahi, ia Lamana i ike mai ai iaʻu, makau nui loa iho la no ia, a me Lemuela laua me Sama no hoi. A holo aku la lakou mai koʻu alo aku; no ka mea, manao iho la lakou o Labana no ia, a ua pepehi ia au e ia, a ua imi oia e lawe aku i ko lakou mau ola no hoi.

29. Eia kekahi, kahea aku la au ia lakou, a hoolohe mai la lakou iaʻu; no ia mea, hooki iho la lakou i ka holo ana mai koʻu alo aku.

30. Eia kekahi, i ka wa a ke kauwa a Labana i ike ai i koʻu mau hoahanau, hoomaka oia e haalulu, a aneane oia e holo aku mai oʻu aku, e hoi aku i ke kulanakauhale o Ierusalema.

31. Ano, he kanaka kino nui au, o Nepai, a ua loaa mai iaʻu ka ikaika nui, mai ka Haku mai, nolaila, hopu ae la au i ke kauwa a Labana, e hoopaa ia ia, i holo ole aku ai kela.

32. Olelo aku la au ia ia, ina e hoolohe mai oia i kaʻu mau olelo, ma ke ola o ka Haku a ma koʻu ola no hoi, ina e hoolohe mai oia i ka makou mau olelo, e hoola aku makou ia ia.

33. A olelo aku la au ia ia me ka hoohiki, e makau ole e pono ai; a e lilo oia i kanaka ku okoa e like me makou, ina oia e iho pu i ka waonahele me makou.

34. A olelo aku la no hoi au ia ia, i ka i ana, He oiaio, ua kauoha mai ka Haku ia makou e hana i keia mea, a, aole anei makou e hoomau i ka malama ana i na kauoha a ka Haku? Nolaila, ea, ina e iho pu oe i ka waonahele i kuu makuakane la, alaila, ooe pu kekahi me makou.

35. A eia kekahi, lana hou ka manao o Zorama i na olelo aʻu i olelo aku ai. A o Zorama ka inoa o ua kauwa la; a olelo mai la oia, e iho pu oia i ka waonahele i kuu makuakane la. A ua hoohiki mai la no hoi oia ia makou, e noho pu oia me makou mai ia manawa aku.

36. Ano, ua makemake makou e noho pu oia me makou no keia kumu, i ike ole ai ka poe Iudaio i ko makou holo ana iloko o ka waonahele, o alualu mai lakou ia makou, a e luku mai ia makou.

37. A ia Zorama i hoohiki mai ai ia makou, pau iho la ko makou hopohopo nona.

38. Eia kekahi, lawe aku la makou i na papa keleawe a me ke kauwa a Labana, a hoi aku la i ka waonahele, a hele aku la i ka halelewa o ko makou makuakane.