1. Eia kekahi, ina e hoolohe mai ka poe Genetile i ke Keikihipa i ua la la ana e hoike aku ai ia ia iho ia lakou ma ka olelo, a i ka mana no hoi, ma ka hana io, i ka lawe ana aku i ko lakou mau mea e hina ai,

2. A ina e hoopaakiki ole lakou i ko lakou mau naau e ku e i ke Keikihipa a ke Akua, alaila, e helu ia auanei lakou iwaena o na hua a kou makuakane; he oiaio, e helu ia auanei lakou iwaena o ko ka hale o Iseraela; a e lilo lakou i lahui pomaikai maluna o ka aina i olelo mua ia ai, no ka wa pau ole: aole no e lawe hou ia lakou ilalo iloko o ka noho pio ana; a, aole no e hoopilihua hou ia ko ka hale o Iseraela;

3. A o kela lua nui i eli ia ai no lakou e ua ekalesia nui a ino loa la, i hookumu ia ai e ke diabolo a me kana poe keiki i hiki ai ia ia ke alakai aku i na uhane o kanaka i gehena; he oiaio, e hoopiha ia auanei ua lua nui la, i eli ia ai no ka make ana o kanaka, me ka poe na lakou ia i eli, i ka make loa ana o lakou, wahi a ke Keikihipa a ke Akua; aole i ka make ana o ka uhane, aka o kona hoolei ia ana iloko o kela gehena hopena ole;

4. No ka mea, aia hoi, ua like keia me ka hoopio ana o ke diabolo, a ua like no hoi me ko ke Akua hoopai ana maluna iho o ka poe a pau e hana ana i ka hewa a me na mea hoopailua imua ona.

5. Eia kekahi, olelo mai la ka anela iaʻu, ia Nepai, i ka i ana, Ua ike aku la oe ina e mihi ka poe Genetile, alaila, e pomaikai auanei lakou; a ke ike nei no hoi oe no na berita a ka Haku i ko ka hale o Iseraela; a ua lohe iho la no hoi oe, o ka mea aole e mihi, e make io no oia;

6. Nolaila, auwe ka poe Genetile, ina e hoopaakiki lakou i ko lakou mau naau e ku e i ke Keikihipa a ke Akua;

7. No ka mea, e hiki mai ana ka manawa, wahi a ke Keikihipa a ke Akua, e hana aku no au i kahi hana nui a kupanaha iwaena o na keiki a kanaka; i kahi hana mau loa aku, ma keia lima, a i ole ia, ma kela; i ka hoomaopopo ana ia lakou i ka maluhia a me ke ola mau loa, a i ole ia, i ka hookuu ana ia lakou i ka paakiki o ko lakou mau naau a me ka pouli o ko lakou hoomaopopo ana, i ko lakou lawe ia ana ilalo iloko o ka noho pio ana, a i ka make ana no hoi, ma ke kino a ma ka uhane, e like me ka hoopio ana o ke diabolo, aʻu i olelo ai.

8. Eia kekahi, i ka wa a ka anela i olelo mai ai i keia mau olelo, i mai la oia iaʻu, Ke hoomanao nei anei oe i na berita a ka Makua i ko ka hale o Iseraela? I aku la au ia ia, Ae.

9. A i mai la oia iaʻu, E nana a e ike i ua ekalesia nui a ino loa la, o ka makuwahine ia o na mea ino loa, o kona kahua o ke diabolo no ia.

10. A i mai la ia iaʻu, Aia hoi, elua wale no ekalesia; o kekahi oia ka ekalesia o ke Keikihipa a ke Akua, a o kekahi oia ka ekalesia o ke diabolo; nolaila, o ka mea aole no ka ekalesia o ke Keikihipa a ke Akua, no ua ekalesia nui la ia, oia no ka makuwahine o na mea ino; a o ka wahine hookamakama no ia o ka honua nei a pau.

11. Eia kekahi, nana aku la au a ike aku la i ka wahine hookamakama o ka honua a pau, a noho iho la ia maluna o na wai he nui; a he aupuni kona maluna iho o ka honua a pau, mawaena o na lahuikanaka a pau, a me na ohana, na olelo, a me na kanaka.

12. Eia kekahi, ike aku la au i ka ekalesia o ke Keikihipa a ke Akua, a ua kakaikahi kona mau heluna, no ka hewa a me ka ino o ka wahine hookamakama, ka mea e noho ana maluna o na wai he nui; aka hoi, ike aku la au i ka ekalesia o ke Keikihipa, oia ka poe hoano o ke Akua, maluna no hoi lakou o ka ili a pau o ka honua; a he uuku ko lakou aina maluna o ka ili o ka honua, no ka hewa o ka wahine hookamakama nui aʻu i ike ai.

13. Eia kekahi, ike aku la au i ka makuwahine nui o na mea ino e houluulu ana i na lehulehu maluna iho o ka ili a pau o ka honua, iwaena o na aupuni o ka poe Genetile, e kaua aku i ke Keikihipa a ke Akua.

14. Eia kekahi, ike aku la au, o Nepai, i ka mana o ke Keikihipa a ke Akua, ua iho ino la ia maluna o ka poe hoano o ka ekalesia o ke Keikihipa, a maluna iho o ka poe kanaka berita a ka Haku, ka poe i hoopuehu ia ai maluna iho o ka ili a pau o ka honua; a ua kahiko ia lakou me ka pono a me ka mana o ke Akua iloko o ka nani nui.

15. Eia kekahi, ike aku la au ua ninini ia aku la ka inaina o ke Akua maluna iho o ua ekalesia nui la a ino loa, nolaila, ua nui na kaua a me na lono o na kaua iwaena o na lahuikanaka a me na ohana a pau o ka honua;

16. A i ka hoomaka ana o na kaua a me na lono o na kaua mawaena o na lahuikanaka a pau o ua makuwahine la o na mea ino, olelo mai la ka anela iaʻu, i ka i ana, Aia hoi, o ka inaina o ke Akua maluna ia o ka makuwahine o na wahine hookamakama, a, aia hoi, ke ike nei oe i keia mau mea a pau:

17. A i ka wa e hiki mai ai ka la e ninini ia aku ai ka inaina o ke Akua maluna o ka makuwahine o na wahine hookamakama, oia ka ekalesia nui a ino loa o ka honua a pau, a o ke kahua ona oia no ke diabolo, alaila, ma kela la, e hoomaka ka hana a ka Makua, i ka hoomakaukau ana i ke ala no ka hooko ana i kana mau berita ana i hana mai ai i kona poe kanaka, oia ko ka hale o Iseraela.

18. Eia kekahi, olelo mai la ka anela iaʻu, i ka i ana, E nana!

19. A nana aku la au a ike aku la i kekahi kanaka, a ua hoaahu ia oia me ke aahu keokeo;

20. A i mai la ka anela iaʻu, E nana i kekahi o ka poe aposetolo he umikumamalua a ke Keikihipa!

21. Aia hoi, e ike auanei oia a e kakau i ke koena o keia mau mea; he oiaio, a me na mea nui no hoi i hana ia ai mamua:

22. A e palapala no hoi oia no ka hopena o ke ao nei;

23. Nolaila, o na mea ana e palapala ai, ua pono a ua oiaio; a, aia hoi, ua kakau ia ia mau mea iloko o ka buke au i ike ai e puka mai ana mai ka waha mai o ka Iudaio, a i ka manawa o ua mau mea nei i puka mai ai mai ka waha mai o ka Iudaio, a i ka manawa o ka buke i puka mai ai mai ka waha mai o ka Iudaio, ua maopopo na mea i kakau ia, a pololei, a maikai loa, a akaka i ka hoomaopopo ana o na kanaka a pau.

24. A, aia hoi, o na mea a ua aposetolo nei a ke Keikihipa e palapala ai, oia na mea he nui au i ike ai; aia hoi, e ike auanei oe i ke koena;

25. Aka, o na mea au e ike ai, ma neia hope aku, aole nau e kakau, no ka mea, ua wae mai ka Haku ke Akua i ka aposetolo a ke Keikihipa a ke Akua, e kakau oia ia mau mea.

26. A i na kanaka e ae no hoi i hala aku la, ia lakou oia i hoike aku ai i na mea a pau, a ua kakau iho la lakou ia mau mea; a ua sila ia ia mau mea e puka mai ai me ka pololei i ko ka hale o Iseraela, e like me ka oiaio iloko o ke Keikihipa, i ka wa ku pono o ka Haku.

27. A, owau, o Nepai, ua lohe au a ke hoike aku nei no hoi, o Ioane ka inoa o ka aposetolo a ke Keikihipa, e like me ka olelo a ka anela.

28. A ua papa ia mai la owau, o Nepai, e palapala ole aku i ke koena o na mea aʻu i ike ai a i lohe ai hoi; nolaila, ua lawa noʻu na mea aʻu i kakau ai, a ua kakau au i na mea uuku wale no o na mea aʻu i ike ai.

29. A ke hoike aku nei au ua ike aku la au i na mea a koʻu makuakane i ike ai, a ua hoike mai la ka anela o ka Haku ia mau mea iaʻu.

30. Ano, ke hoopau nei au i kaʻu olelo no na mea aʻu i ike ai, i koʻu kaikai ia ana aku iloko o ka Uhane: a ina aole i pau na mea aʻu i ike ai i ka palapala ia, ua oiaio na mea aʻu i palapala ai. A pela io no. Amene.