1. Eia kekahi, hele hou aku la makou i ko makou hele ana ma ka waonahele; a aneane hele aku la makou i ka hikina ma ia hope aku. A hele a auhele makou mawaena o ka popilikia nui ma ka waonahele; a hanau mai la ko makou mau wahine i na keiki ma ka waonahele.

2. A no ka nui o na mea pomaikai o ka Haku maluna o makou, oiai makou e ai ana i ka io maka ma ka waonahele, ua haawi aku la ko makou mau wahine i waiu a lawa na ka lakou mau keiki, a ua ikaika, he oiaio, e like me na kane; a hoomaka iho la lakou e hoomanawanui ma ko lakou hele ana me ka ohumu ole.

3. A pela kakou e ike nei e hooko ia na kauoha a ke Akua e pono ai. A ina e malama pono na keiki a kanaka i na kauoha a ke Akua, e hanai oia ia lakou, a e hooikaika ia lakou, a e hoomakaukau i na mea e hiki ai ia lakou ke hooko i ka mea ana i kauoha mai ai ia lakou; nolaila, ua hoomakaukau mai la oia i na mea e pono ai no makou, oiai makou i noho ai ma ka waonahele.

4. A noho iho la makou no kekahi mau makahiki he nui, he oiaio, he mau makahiki ewalu ma ka waonahele.

5. A hiki aku la makou i ka aina a makou i kapa aku ai o Momona, no ka nui o kolaila hua, a me ka meli o ka nahelehele no hoi; a ua hoomakaukau ia mai keia mau mea a pau e ka Haku, i ole ai makou e make. A ike aku la makou i ke kai a makou i kapa aku ai o Ireanatuma, ma ka hoohalike ana, o na kai nui ia.

6. Eia kekahi, kukulu iho la makou i ko makou mau halelewa ma kahakai; a ua loaa e makou i na popilikia he nui, a me ke kaumaha nui, he oiaio, no ka nui i hiki ole ai ia makou ke palapala ia mau mea a pau, aka nae, ua hauoli nui loa makou i ko makou hiki ana ma ke kahakai; a kapa aku la makou ia wahi o Momona, no ka nui o kolaila hua.

7. Eia kekahi, mahope iho o ka noho ana oʻu, o Nepai, ma ka aina o Momona i na la he nui, hiki mai la ka leo o ka Haku iaʻu, i ka i ana, E ala a e hele aku oe i ka mauna. Ala ae la no au a pii aku la i ka mauna, a kahea aku la i ka Haku.

8. Eia kekahi, olelo mai la ka Haku iaʻu, i ka i ana, E kapili auanei oe i moku, mamuli o ke ano aʻu e hoike aku ai ia oe, i halihali aku ai au i kou poe kanaka i kela aoao o keia kai.

9. A i aku la au, E ka Haku, ihea la au e hele aku ai, i loaa ai iaʻu he pohaku hao e hoohehee, e hiki iaʻu ke hana i na mea paahana e kapili ai i ka moku, mamuli o ke kumulike au i hoike mai ai iaʻu?

10. A hai mai la ka Haku iaʻu, kahi aʻu e hele aku ai e loaa ai ka pohaku hao, i hiki iaʻu ke hana i na mea paahana.

11. Eia kekahi, hana iho la au, o Nepai, i upa makani me na ili holoholona, i mea e puhi ai i ke ahi; a mahope iho o kaʻu hana ana i upa makani, i hiki iaʻu ke puhi i ke ahi, puke aku la au i kekahi pohaku i kekahi, e loaa ai iaʻu ke ahi;

12. No ka mea, a hiki i keia manawa aole i ae mai ka Haku ia makou e hoa nui wale i ke ahi, i ko makou hele ana ma ka waonahele, no ka mea, i mai la ia, E hoolilo aku au i ka oukou ai i ono, i hoomoa ole ai oukou ia mea;

13. A owau no hoi ko oukou malamalama ma ka waonahele; a e hoomakaukau no wau i ke ala imua o oukou, ke malama oukou i kaʻu mau kauoha; nolaila, ina e malama pono oukou i kaʻu mau kauoha, alaila, e alakai ia oukou i ka aina i hai mua ia ai; a e ike no hoi oukou e alakai ia ana oukou e au.

14. He oiaio, a i mai la no hoi ka Haku, Mahope iho o ko oukou pae ana aku ma ka aina i hai mua ia ai, e ike oukou owau no ka Haku, ke Akua; a owau nei ka Haku, ka Mea nana i hoopakele aku ia oukou mai ka make aku; he oiaio, a ua lawe aku la au ia oukou mailoko mai o ka aina o Ierusalema.

15. Nolaila, ua hooikaika au, o Nepai, e malama pono i na kauoha a ka Haku, a paipai aku la au i koʻu mau hoahanau e hoomau pono, a e hooikaika.

16. Eia kekahi, hana iho la au i na mea paahana me ka hao aʻu i hoohehee ai noloko mai o ka pohaku.

17. A i ka wa a koʻu mau hoahanau i ike ai e manao ana au e kapili i moku, hoomaka iho la lakou e ohumu iaʻu, i ka i ana, He kanaka naaupo ko kakou kaikaina, no ka mea, ke manao nei oia ua hiki ia ia ke kapili i moku: a ua manao no hoi oia ua hiki ia ia ke holo aku i kela aoao o keia kai nui.

18. A pela koʻu mau hoahanau i hoohewa mai ai iaʻu, a e makemake ana lakou e hana ole, no ka mea, aole lakou i manaoio ua hiki iaʻu ke kapili i moku; aole hoi i manaoio lakou ua ao ia au e ka Haku.

19. Ua kaumaha nui loa iho la au, o Nepai, no ka paakiki o ko lakou mau naau, a ia lakou i ike mai ai ua kupu ke kaumaha iloko oʻu, ua olioli lakou iloko o ko lakou mau naau, a hauoli iho la lakou maluna iho oʻu, i ka i ana mai, Ua ike makou aole i hiki ia oe ke kapili i moku, no ka mea, ua ike makou ua nele oe i ka ike; no ia mea, ea, aole e hiki ia oe ke hoopaa i kekahi hana nui e like me ia;

20. A ua like no hoi oe me ko kakou makuakane i alakai ia aku e na manao lapuwale o kona naau; he oiaio, ua alakai mai la oia ia kakou mailoko mai o ka aina o Ierusalema; a ua hele nui ae la kakou ma ka waonahele no keia mau makahiki he nui; a ua hana ikaika ka kakou mau wahine, i hapai me na keiki; a ua hanau mai la lakou i na keiki ma ka waonahele, a loaa iho la i na pilikia a pau, koe wale no ka make; a ina ua make lakou mamua o ko lakou puka ana mai mailoko mai o Ierusalema, ina ua aho ia mamua o ko lakou loaa ana i keia mau popilikia nui.

21. Aia hoi, ua nui ko kakou mau popilikia i keia mau makahiki he nui ma ka waonahele, oiai ua hiki ia kakou ke noho olioli me ko kakou mau mea waiwai, ma ko kakou mau aina hooilina, a me ka noho pomaikai no hoi;

22. A ua ike kakou he poe kanaka pono, ka lahui e noho ana ma ka aina o Ierusalema; no ka mea, ua malama lakou i na kanawai a me ka hooponopono ana o ka Haku, a me na kauoha ana a pau, e like me ke kanawai o Mose; nolaila, ua ike kakou he poe kanaka pono lakou; a ua hoohewa aku la ko kakou makuakane ia lakou; a ua alakai mai la oia ia kakou no ko kakou hoolohe ana i kana mau olelo; he oiaio, a ua like ko kakou kaikaina me ia. A mamuli o keia ano o ka olelo, i ohumu iho ai koʻu mau hoahanau a hoohewa mai la ia maua.

23. Eia kekahi, olelo aku la au, o Nepai, ia lakou, i ka i ana, Ke manaoio nei anei oukou, i alakai ia mai ko kakou poe kupuna, o na mamo a Iseraela, mailoko mai o na lima o ko Aigupita poe, ina ua hoolohe ole lakou i na olelo a ka Haku?

24. He oiaio, ke manao nei anei oukou i alakai ia lakou mailoko mai o ka noho luhi ana, ina ua kauoha ole ka Haku ia Mose e alakai ia lakou mailoko ae o ka noho luhi ana?

25. Ano, ua ike oukou e noho luhi ana na mamo a Iseraela; a ua ike oukou ua hookaumaha ia aku lakou ma na hana luhi, kaumaha e auamo ia ai; nolaila, ua ike oukou he mea e pono ai no lakou i lawe ia ai lakou mailoko mai o ka noho luhi ana.

26. Ano, ua ike oukou ua kauoha ia mai la o Mose e ka Haku e hana i ua hana nui la; a ua ike oukou, ua hookaawale ia ae ke kai o ke Kai Ula i o a ia nei, e kana olelo, a hele aku la lakou iwaena ma ka aina maloo.

27. Aka, ua ike oukou ua make iho la ko Aigupita poe i ke Kai Ula, o lakou no ka poe koa o Parao.

28. A ua ike no hoi oukou ua hanai ia mai la lakou me ka mane ma ka waonahele;

29. A ua ike no hoi oukou ua hahau aku la o Mose i ka pohaku, ma kana olelo, e like me ka mana o ke Akua iloko ona, a puka mai la ka wai, i hiki i na mamo a Iseraela ke kena i ko lakou makewai;

30. A ua alakai ia aku la lakou, e hele ana ka Haku ko lakou Akua, ko lakou Mea e Ola ai, imua o lakou, e alakai ana ia lakou ma ke ao, a e haawi ana ia lakou i ka malamalama i ka po, a e hana ana hoi lakou i na mea a pau e pono ai no na kanaka e loaa ai, aka, ua hoopaakiki nae lakou i ko lakou mau naau, a hoopouli iho la i ko lakou hoomaopopo ana, a hoino aku la me ke ku e ia Mose, a me ke ku e i ke Akua ola a oiaio hoi.

31. Eia kekahi, e like me kana olelo, ua luku aku la oia ia lakou; a e like me kana olelo, ua alakai mai la oia ia lakou; a e like me kana olelo, ua hana iho la oia i na mea a pau no lakou: aole i hana ia kekahi mea, ke ole ia ma o kana olelo la.

32. A mahope iho o ko lakou hele ana ma kela aoao o ka muliwai o Ioredane, ua hoolilo mai la oia ia lakou i ikaika, i ke kipaku ana aku i na keiki o ka aina, he oiaio, i ka hoopuehu ana aku ia lakou a make.

33. Ano, ke manao nei anei oukou o ka poe keiki o ua aina nei, ka poe i noho iloko o ka aina i olelo mua ia ai, ka poe i kipaku ia aku e ko kakou poe kupuna, ea, ke manao nei anei oukou he poe pono lakou? Aia hoi, ke i aku nei au ia oukou, aole.

34. Ke manao nei anei oukou he poe i makemake loa ia ko kakou poe kupuna mamua o lakou, ina he poe pono lakou? Ke i aku nei au ia oukou, aole;

35. Aia hoi, hookahi no io ko na kanaka a pau i ko ka Haku manao: o ka mea pono ua lokomaikai ia mai oia e ke Akua. Aka hoi, ua hoomalau aku la ua lahuikanaka nei i kela olelo i keia olelo a ke Akua, a ua oo lakou ma ka hana hewa; a maluna o lakou ka nui o ko ke Akua inaina; a ua hoohewa ia mai la ka aina e ka Haku no lakou, a hoopomaikai ia mai la no ia no ko kakou poe kupuna; he oiaio, no lakou oia i hoohewa mai ai i ua aina la i ko lakou luku ia ana; a ua hoopomaikai mai la oia ia aina i ko kakou poe kupuna, i ka loaa ana mai ia lakou ka mana maluna iho o ua aina la.

36. Aia hoi, ua hana mai la ka Haku i ka honua i wahi e noho ia ai: a ua hana mai la oia i kana poe keiki, i noho lakou malaila.

37. A ke hoala mai la oia i na lahuikanaka pono; a ke luku ae la oia i na lahuikanaka o ka poe hewa.

38. A ke alakai nei oia i ka poe pono i na aina maikai, a ke luku ae la oia i ka poe hewa, a no lakou no hoi oia i hoohewa aku ai i ka aina no ka lakou hana.

39. Aia no ke noho alii kiekie nei oia ma ka lani, no ka mea, oia no kona noho alii, a o keia honua oia kona keehana wawae.

40. A ke aloha mai nei oia i ka poe i makemake ia ia i Akua no lakou. Aia hoi, ua aloha mai la oia i ko kakou poe kupuna! A berita mai la oia me lakou, he oiaio, me Aberahama, me Isaaka, a me Iakoba: a hoomanao iho la oia i na berita ana i hana ai; nolaila, lawe mai la oia ia lakou mailoko mai o ka aina o Aigupita,

41. A hoopololei mai la oia ia lakou ma ka waonahele me kona laau hahau, no ka mea, hoopaakiki iho la lakou i ko lakou mau naau, he oiaio, e like me oukou nei; a hoopololei mai la ka Haku ia lakou no ka lakou hana hewa. Hoouna mai la oia i na nahesa wela e lele ana iwaena o lakou; a mahope iho o ko lakou nahu ia ana, hoomakaukau mai la oia i ala i hiki ai ia lakou ke hoola ia: a o ka nana aku ka lakou hana e hana ai! A no ka pohihihi ole o ke ala, a no ka paakiki ole hoi o ua hana la, ua nui loa ka poe i make.

42. A hoopaakiki iho la lakou i ko lakou mau naau ia manawa aku ia manawa aku, a nuku iho la ia Mose, a i ke Akua no hoi; aka hoi, ua ike oukou ua alakai ia mai la lakou e kona mana ikaika loa, iloko o ka aina i hai mua ia ai.

43. Ano, ea, mahope iho o keia mau mea a pau, ua hiki mai la ka manawa a lakou i lilo ai i poe hewa, he oiaio, kokoke e oo; a, aole au i ike, aneane paha lakou e luku ia i keia la; no ka mea, ua ike au e hiki io mai auanei ka la, e luku ia lakou e pono ai, a he uuku wale no e koe, a e alaka ia lakou la iloko o ka noho pio ana;

44. Nolaila, ua kauoha mai la ka Haku i koʻu makuakane e hele aku ia iloko o ka woanahele; a ua imi iho la ka poe Iudaio e kaili aku i kona ola; he oiaio, a ua imi no hoi oukou e kaili aku i kona ola; nolaila, he poe pepehi kanaka oukou iloko o ko oukou mau naau, a ua like oukou me lakou.

45. Ua wikiwiki oukou i ka hana hewa, aka lohi i ka hoomanao i ka Haku ko oukou Akua. Ua ike oukou i kahi anela, a olelo mai la oia ia oukou; he oiaio, ua lohe oukou i kona leo ia manawa aku ia manawa aku; a ua olelo mai la oia ia oukou ma kahi leo malie, a uuku, aka, ua pau ko oukou hoomaopopo ana, i hiki ole ai ia oukou ke hoomaopopo i kana mau olelo; nolaila, ua olelo mai la oia ia oukou me he leo o ka hekili la, e hoonaue ana i ka honua me he mea la e kaawale ana ia.

46. A ua ike no hoi oukou, ua hiki ia ia ma ka mana o kana olelo mana loa, e hoano e i ka honua nei; he oiaio, a ua ike no hoi oukou ua hiki ia ia ma kana olelo ke hoomania i na wahi apuupuu, a ke hooapuupuu ae i na wahi laumania. E! No ke aha la i paakiki loa ai oukou me neia ma na naau o oukou?

47. Aia hoi, ua walania loa iho la koʻu uhane me ke kaumaha nui loa no oukou, a ua eha no hoi kuu naau; ke makau nei au o hoolei ia aku auanei oukou no ka wa pau ole. Aia hoi, ua piha au i ka uhane o ke Akua, nolaila aole ikaika ma koʻu kino.

48. Ano, iaʻu i olelo aku ai i keia mau olelo, huhu mai la lakou iaʻu, a ua makemake lakou e hoolei mai iaʻu iloko o ka hohonu o ke kai; a i ko lakou hele ana mai e kau mai i na lima maluna oʻu, olelo aku la au ia lakou, i ka i ana, Ma ka inoa o ke Akua mana loa, ke kauoha aku nei au ia oukou, mai hoopa mai oukou iaʻu, no ka mea, ua piha au me ka mana o ke Akua, i ka hoopau ia ana o koʻu io; a o ka mea nana e kau mai i kona mau lima maluna iho oʻu, e mae wale ia me he ohe maloo la; a e lilo ia me he mea ole la imua o ka mana o ke Akua, no ka mea, e hahau mai ke Akua ia ia.

49. Eia kekahi, i aku la au, o Nepai, ia lakou, mai ohumu hou lakou i ko lakou makuakane; mai aua hoi i ka hana a lakou mai oʻu aku, no ka mea, ua kauoha mai la ke Akua iaʻu e kapili i moku.

50. A i aku la au ia lakou, ina ua kauoha mai la ke Akua iaʻu e hana i na mea a pau, ina ua hiki iaʻu ke hana. Ina e kauoha mai oia iaʻu e olelo aku i keia kai, e lilo oe i honua, alaila he honua no ia; a ina au i olelo pela, e hana ia no.

51. Ano, ina he mana nui ko ka Haku e like me neia, a ua hana ia na hana mana he nui loa iwaena o na keiki a kanaka, no keaha la i hiki ole ai ia ia ke ao mai iaʻu, e kapili au i moku?

52. Olelo aku la au, o Nepai, i na mea he nui loa i koʻu mau hoahanau, a hoka iho la lakou, a hiki ole ia lakou ke paio mai me au; aole hoi e aa lakou e kau mai i ko lakou mau lima maluna oʻu, aole hoi e hoopa mai iaʻu me ko lakou mau manamana lima, no na la he nui. Ano, aole lakou e aa e hana i keia, o mae wale lakou imua oʻu, no ka mana o ka Uhane o ke Akua; a pela ia i hana ai maluna o lakou.

53. Eia kekahi, i mai la ka Haku iaʻu, E o hou aku oe i kou lima i kou mau hoahanau, aole lakou e mae wale imua ou, aka e hoohikilele au ia lakou, wahi a ka Haku, a e hana au i keia, i ike lakou owau no nei ka Haku, ko lakou Akua.

54. Eia kekahi, o aku la au i koʻu lima i koʻu mau hoahanau, aole lakou i mae wale imua oʻu; aka, hoohaalulu ae la ka Haku ia lakou, e like me ka olelo ana i olelo mai ai.

55. Ano la, i mai la lakou, Ke ike io nei makou, o ka Haku kekahi pu me oe, no ka mea, ke ike nei makou o ka mana o ka Haku oia ka mea i hoohaalulu ia makou. A moe iho la lakou imua oʻu, a aneane lakou e hoomana iaʻu, aka, aole au i ae aku ia lakou, i ka i ana, Owau no ko oukou hoahanau, he oiaio, ko oukou kaikaina; no ia mea, e hoomana i ka Haku ko oukou Akua, a e mahalo oukou i ko oukou makuakane a me ko oukou makuwahine, i loihi ai ko oukou mau la ma ka aina a ka Haku, a ko oukou Akua, i haawi mai ai ia oukou.