1. Eia kekahi, a mahope iho o koʻu, ko Nepai, kaili ia ana aku ma ka Uhane, a ike ana aku i keia mau mea a pau, hoi aku la au i ka halelewa o koʻu makuakane.

2. Eia kekahi, ike aku la au i koʻu mau hoahanau, e hoopaapaa ana lakou kekahi me kekahi, no na mea a koʻu makuakane i olelo ae ai ia lakou;

3. No ka mea, ua olelo io oia i na mea nui he lehulehu ia lakou, he mau mea paakiki i ka hoomaopopo ana, ke ninau ole ke kanaka i ka Haku; a no ko lakou paakiki ma ko lakou mau naau, nolaila, aole lakou i nana aku i ka Haku e like me ka mea e pono ai lakou.

4. Ano, ua kaumaha iho la wau, o Nepai, no ka paakiki o ko lakou mau naau, a no na mea no hoi aʻu i ike ai, a i ike maopopo ai no hoi e hooko io ia ana me ka hiki ole ke alo ae, no ka nui o ka hewa o na keiki a kanaka.

5. A kaumaha iho la au no ka nui o ka pilikia oʻu, no ka mea, ua manao au ua nui aku koʻu pilikia mamua o na mea a pau, no ka luku ia ana o koʻu poe kanaka, no ka mea, ua ike aku la au i ko lakou hina ana.

6. Eia kekahi, mahope iho o koʻu loaa ana ka ikaika, olelo aku la au i na hoahanau oʻu, a ninau aku la au ia lakou i ke kumu o ko lakou hoopaapaa ana.

7. A i mai la lakou, Aia hoi, aole i hiki ia makou ke hoomaopopo i na olelo a ko kakou makuakane i olelo mai ai no na lala maoli o ka laau oliva, a no ka poe Genetile no hoi.

8. A i aku la au ia lakou, Ua ninau anei oukou i ka Haku?

9. A i mai la lakou iaʻu, Aole makou i ninau; no ka mea, aole e hoike mai ka Haku i kekahi mea e like me ia ia makou.

10. Aia hoi, i aku la au ia lakou, No ke aha la aole oukou e malama pono i na kauoha a ka Haku? No ke aha la oukou e make, no ka paakiki o ko oukou mau naau?

11. Aole anei oukou e hoomanao i na mea a ka Haku i i mai ai, Ina e hoopaakiki ole oukou i ko oukou mau naau, a e nonoi mai iaʻu ma ka manaoio, me ka paulele ana e loaa ana ia oukou, me ka ikaika i ka malama pono ana i na kauoha aʻu, he oiaio, e hoike ia aku no ua mau mea nei ia oukou?

12. Aia hoi, ke i aku nei au ia oukou, ua hoohalike ia ko ka hale o Iseraela me kekahi laau oliva, e ka Uhane o ka Haku iloko o ko kakou poe kupuna; a, aia hoi, aole anei kakou i haihai ia mai, mai ko ka hale o Iseraela aku; aole anei he lala kakou o ko ka hale o Iseraela?

13. A, ano, o ke ano o ka mea a ko kakou makuakane i olelo mai ai no ka pakui ia ana o na lala maoli ma o ka piha ana la o ka poe Genetile, eia ia, ma na la mahope, i ka manawa o ka kakou hua i emi iho ai iloko o ka hoomaloka, no na makahiki he nui loa, a me na hanauna he nui, mahope iho o ka hoike ia ana mai o ka Mesia ma ke kino i na keiki a kanaka, alaila, e hiki mai ka euanelio mana a pololei o ka Mesia i ka poe Genetile, a mai ka poe Genetile ae i ke koena o ka kakou hua;

14. A ma ia la, e ike ai ke koena o ka kakou hua no ko ka hale o Iseraela lakou, a o ko ka Haku poe kanaka berita no hoi lakou; alaila, e ike lakou a e loaa ka ike no ko lakou poe kupuna, a ka ike no hoi no ka euanelio o ko lakou Mea e Ola ai, o ka euanelio i hai ia mai e ia i ko lakou poe kupuna; nolaila, e loaa no auanei ia lakou ka ike no ko lakou Mea e Ola ai, a me na oihana pololei o kana ao ana, i ike ai lakou i ke ala pono e hele ai io na la a e hoola ia.

15. Alaila ma kela la, aole anei lakou e hauoli ai, a e hiilani aku ai i ko lakou Akua mau loa, ko lakou pohaku a me ko lakou ola? He oiaio, ma ua la la, aole anei e loaa ai ia lakou ka ikaika, a me ke ola mai ke kumu waina oiaio mai? He oiaio, aole anei lakou e hele mai i ka pa oiaio o ke Akua?

16. Aia hoi ke i aku nei au ia oukou, Ae; e hoomanao hou ia lakou mawaena o ko ka hale o Iseraela; e pakui ia auanei lakou, he lala maoli o ka laau oliva, iloko o ka laau oliva oiaio;

17. O ke ano keia o ka olelo a ko kakou makuakane; eia hou kana, aole ia e hiki mai, a, mahope aku o ko lakou hoopuehu ia ana e ka poe Genetile; eia no hoi kana, e hele mai auanei ia ma ka aoao o ka poe Genetile, i hiki i ka Haku ke hoike aku i kona mana i ka poe Genetile, no kona hoomalau ia ana e ka poe Iudaio, oia hoi ko ka hale o Iseraela;

18. Nolaila, aole i olelo mai ko kakou makuakane no ka kakou hua wale no, aka, no ko ka hale o Iseraela a pau no hoi, me ke kuhikuhi ana aku i ka berita e hooko ia ana ma na la mahope; oia ka berita a ka Haku i hana mai ai i ko kakou kupuna kane, ia Aberahama, i ka i ana, Ma kau hua e hoopomaikai ia ai na ohana a pau o ka honua.

19. Eia kekahi, olelo nui aku la au, o Nepai, ia lakou no keia mau mea; he oiaio, olelo aku la au ia lakou no ka hoi hou ana o ka poe Iudaio, ma na la mahope;

20. A hai aku la au ia lakou i na olelo a Isaia, ana i olelo mai ai no ka hoi hou ana o ka poe Iudaio, a o ko ka hale o Iseraela; a mahope iho o ko lakou hoi hou ana, aole e hoohoka hou ia lakou, aole no hoi e hoopuehu hou ia lakou. A olelo aku la au i na olelo he nui i koʻu mau hoahanau, a ua hoolaulea ia lakou, a hoohaahaa iho la ia lakou iho imua o ka Haku.

21. Eia kekahi, olelo hou mai la lakou iaʻu, i ka i ana, Heaha ke ano o keia mea a ko kakou makuakane i ike ai ma ka moeuhane? Heaha ke ano o ka laau ana i ike ai?

22. A i aku la au ia lakou, He mea ia e hoohalike ai ka laau o ke ola.

23. A i mai la lakou iaʻu, Heaha ke ano o ke kookoo hao a ko kakou makuakane i ike ai, e moe ana i ka laau?

24. A i aku la au ia lakou, oia ka olelo a ke Akua; a o ka mea e hoolohe i ka olelo a ke Akua, a e hoopaa mau i ua olelo la, aole loa lakou e make loa aku; aole hoi e hiki i na hoowalewale a me na ihe wela o ka mea ku e, ke lanakila ae maluna o lakou, i ka hoomakapo ana ia lakou, e alakai aku ai ia lakou i ka make.

25. Nolaila, ua hooikaika aku la au, o Nepai, ia lakou e hoolohe i ka olelo a ka Haku; he oiaio, ua paipai aku la au ia lakou me ka ikaika a pau o koʻu naau, a me ka makaukau a pau aʻu i loaa ai, e hoolohe lakou i ka olelo a ke Akua, a e hoomanao e malama pono mau i kana mau kauoha ma na mea a pau.

26. A i mai la lakou iaʻu, Heaha ke ano o ka muliwai a ko kakou makuakane i ike ai?

27. A i aku la au ia lakou, O ka wai a koʻu makuakane i ike ai, o ka paumaele ia; a no ka lilo nui o kona manao ma na mea e ae, aole oia i ike i ka lepo o ka wai;

28. A i aku la au ia lakou, he awawa weliweli ia, e hookaawale ana i ka poe hewa mai ka laau aku o ke ola, a mai ka poe hoano aku no hoi o ke Akua.

29. A i aku la au ia lakou, he mea ia e hoohalike ai i kela gehena weliweli, a ka anela i olelo mai ai iaʻu i hoomakaukau ia ai no ka poe hewa.

30. A i aku la au ia lakou, ua ike aku la no hoi ko kakou makuakane, e hookaawale ana no hoi ka hoopai pono o ke Akua i ka poe hewa mai ka poe pono ae; a o ke alohilohi olaila ua like me ke alohilohi o kekahi ahi e lapalapa ana, e pii ana iluna i ke Akua, a mau loa aku a mau loa aku, aole ona hopena.

31. A i mai la lakou iaʻu, Heaha ke ano o keia mea, ka eha anei o ke kino ma na la o keia noho ana paha, o ka noho hope ana anei o ka uhane mahope aku o ka make ana o ke kino maoli paha? A i ole ia, ke olelo mai nei anei oia no na mea o ka honua nei?

32. A i aku la au ia lakou, He mea ia e hoohalike ai i na mea o ke kino a o ka uhane no hoi; no ka mea, e hiki mai auanei ka la e hookolokolo ia lakou e pono ai no ka lakou mau hana, he oiaio, no na hana i hana ia ai e ke kino maoli ma na la o ko lakou noho ana ma ka honua;

33. Nolaila, ina e make lakou iloko o ko lakou hewa, e hoolei ia aku no hoi lakou e pono ai, i nele lakou i na mea o ka uhane, e pili ana i ka pono; nolaila e lawe ia lakou e pono ai e ku imua o ke Akua, e hookolokolo ia no ka lakou mau hana; a ina o ka paumaele ka lakou mau hana, e paumaele no lakou e pono ai: a ina paumaele lakou, aole loa e hiki ia lakou ke noho iloko o ke aupuni o ke Akua; ina pela, e paumaele no hoi ke aupuni o ke Akua.

34. Aka hoi, ke i aku nei au ia oukou, aole paumaele o ke aupuni o ke Akua, aole e hiki i kekahi mea haumia ke komo iloko o ke aupuni o ke Akua: nolaila, he mea e pono ai i hoomakaukau ia ai kahi paumaele no ka mea paumaele.

35. A ua hoomakaukau ia kau wahi, he oiaio, oia kela gehena weliweli aʻu i olelo ai, a o ke diabolo oia ke kahua ona; nolaila, aia ma ke aupuni o ke Akua ka noho loa ana o na uhane o kanaka, a i ole ia, e hoolei ia aku mawaho no kela hoopai pololei ana aʻu i olelo ai;

36. Nolaila, ua hookuke ia aku ka poe hewa mai ka poe pono aku, a mai ka laau aku o ke ola, nona ka hua i maikai loa a i makemake loa ia mamua ae o na hua e ae a pau; he oiaio, a o ka haawina nui loa ia mamua o na haawina a pau o ke Akua. A pela kaʻu olelo i koʻu mau hoahanau. Amene.