1. Eia hou: e hoolohe mai, e ko ka hale o Iseraela, o oukou a pau i haihai ia a i kipaku ia aku, no ka hewa o na kahu o koʻu poe kanaka; he oiaio, o oukou a pau i haihai ia aku a i hoopuehu ia i o a i o, o koʻu poe kanaka, e ko ka hale o Iseraela. E haliu mai iaʻu, e na mokupuni, a e hoolohe hoi oukou, e na lahuikanaka, ma kahi mamao aku; ua hea mai la ka Haku iaʻu mai ka opu mai; mai ka opu mai hoi o koʻu makuwahine ua hai oia i koʻu inoa.

2. A ua hana mai la oia i koʻu waha e like me ka pahikaua oi; ma ke aka o kona lima i huna mai ai oia iaʻu, a ua hana mai oia iaʻu e like me ka pua i anai ia; ua huna mai oia iaʻu iloko o kona aapua;

3. A olelo mai la iaʻu, Ooe no kaʻu kauwa, e ka Iseraela e, iloko ou e hoonani ia ai au.

4. Alaila, i i iho la au, ua hana makehewa au, no ka ole wau i hoopau ai i koʻu ikaika me ka makehewa; he oiaio, me ka Haku koʻu apono ia, a me koʻu Akua hoi kaʻu hana ana.

5. Ano, wahi a ka Haku, ka mea i hana mai iaʻu mai ka opu mai i kauwa nana, i mea e hoihoi mai i ka Iakoba ia ia: Ina i hoakoakoa ole ia ka Iseraela, e nani io nae au ma na maka o ka Haku, a o koʻu Akua koʻu ikaika no ia.

6. A i mai la oia, he mea uuku ia e lilo oe i kauwa naʻu e hoala mai i na ohana o ka Iakoba, a e hoihoi i ka poe i malama ia o ka Iseraela. E haawi aku no hoi au ia oe i malamalama no ka poe Genetile, i lilo oe i mea hoola noʻu i na kukulu o ka honua.

7. Penei wahi a ka Haku, ka Hoolapanai o ka Iseraela, kona Mea Hemolele hoi, i ka mea i hoowahawaha ia e kanaka, i ka mea a na lahuikanaka i hoopailua ai, i ke kauwa a na mea e noho alii ana, e ike aku na moi a e ku iluna, e hoomana aku no hoi na alii, no ka Haku, ka mea oiaio.

8. Penei wahi a ka Haku, i ka manawa aloha ua hoolohe au ia oe, e na mokupuni o ke kai, a i kahi la hoola ua kokua au ia oe: a e malama no au ia oe, a e haawi aku ia oe i kaʻu kauwa i berita no na kanaka, e hookupaa i ka honua, e hoili aku i na hooilina neoneo;

9. I hiki ia oe ke olelo aku i ka poe i paa, E hele iwaho; a i ka poe e noho ana ma ka pouli, E hoike ia oukou iho. E ai no lakou ma na alanui, a o ko lakou mau wahi e ai ai, ma na wahi kiekie lakou a pau.

10. Aole lakou e pololi, aole e makewai, aole hoi e hahau mai ka wela a me ka la ia lakou; no ka mea, o ka mea e aloha ia lakou nana lakou e alakai, he oiaio, ma na waipuna oia e alakai ai ia lakou.

11. A e hoolilo aku no au i koʻu mau kuahiwi a pau i alanui, a e hookiekie ia auanei koʻu mau kuamoo.

12. Alaila, e ko ka hale o Iseraela, aia hoi, e hele mai no keia poe mai kahi loihi mai; aia hoi, o keia poe mai ke kukulu akau a mai ke komohana mai; a o keia poe hoi mai ka aina o Sinima mai.

13. E oli, e na lani; a e hauoli hoi, e ka honua; no ka mea, e hookupaa ia na wawae o ka poe ma ka hikina; e poha mai i ke oli ana, e na mauna; no ka mea, aole lakou e hahau hou ia; no ka mea, ua hooluolu mai la ka Haku i kona poe kanaka, a e aloha mai no ia i kona poe i hoopilikia ia.

14. Aka hoi, ua olelo mai o Ziona, ua haalele ka Haku iaʻu, a ua hoopoina koʻu Haku iaʻu nei; aka e hoike mai no ia aole ia i hoopoina.

15. No ka mea, e hiki anei i ka wahine ke hoopoina i kana keiki omowaiu, i ole ai ia e aloha aku i ke keikikane o kona opu? Oiaio, e hiki no ia lakou ke hoopoina, aka aole au e hoopoina ia oe, e ko ka hale o Iseraela.

16. Aia hoi, ua kahakaha au ia oe ma na poho lima oʻu; ua mau loa kou mau papohaku ma koʻu alo.

17. E wikiwiki no kau poe keiki e ku e i ka poe na lakou oe i pepehi; a o ka poe i hooneoneo ia oe, e puka aku no lakou mai ou aku.

18. E alawa ae oe i kou mau maka mao, a mao, a e nana hoi; ke akoakoa mai nei lakou nei a pau, a e hele mai auanei lakou iou la. A me au e ola nei, wahi a ka Haku, e aahu io no oe ia oe iho me lakou a pau me he kahiko la, a e kakoo hoi ia lakou e like me ka wahine mare.

19. No ka mea, o kou mau wahi mehameha a neoneo, a me ka aina o kau luku ia ana, e haiki loa ana no ia ma ia wa no ka nui o ka poe e noho ana; e loihi lilo loa ka poe i ale ia oe.

20. O na keiki e loaa ai auanei ia oe, mahope iho o ka lilo ana o ka poe mua, e olelo hou no lakou i kou mau pepeiao, Ua pilikia loa au i keia wahi; e haawi mai iaʻu i wahi e noho ai au.

21. Alaila, e olelo iho oe ma kou naau, nawai la i hoohanau mai i keia poe naʻu, ua nele au i kaʻu mau keiki a mehameha, he pio no, a e kuewa ana i o a i o? A nawai la i hoonui mai i keia poe? Aia hoi, ua waiho wale ia au; mahea hoi lakou nei?

22. Ke olelo mai nei ka Haku, ke Akua penei, Aia hoi, e hapai no au i koʻu lima i ka poe Genetile, a e kau no au i koʻu hae i na lahuikanaka; a e lawe mai lakou i kau poe keikikane ma ko lakou mau lima, a e kaikai ia kau poe kaikamahine ma ko lakou mau poohiwi.

23. A e lilo na alii i poe makuakane hanai nou, a o na alii wahine a lakou i poe makuwahine hanai nou; a e kulou no lakou ilalo ia oe me na maka o lakou i ka honua, a e palu iho i ka lepo o kou mau wawae; a e ike auanei oe, owau no ka Haku; no ka mea, o ka poe e kali iaʻu, aole lakou e hilahila.

24. No ka mea, e kaili ia aku anei ka waiwai pio mai ka poe ikaika aku, e hoopakele ia anei na pio i lawe pono ia?

25. Aka penei wahi a ka Haku, e kaili ia aku no na pio o ka poe ikaika, a e hoopakele ia ka waiwai pio mai ka poe weliweli mai; no ka mea, e paio aku au i ka mea paio pu me oe, a e hoola no au i kau poe keiki.

26. A e hanai au i ka poe i hooluhi aku ia oe i ko lakou io ponoi iho; a e ona auanei lakou i ko lakou koko ponoi iho, e like me ka waina ono; a e ike no na mea io a pau, owau no ka Haku, o kou Mea e Ola ai, a me kou Hoolapanai, ka Mea Mana hoi o ka Iakoba.