1. Eia kekahi, hoomana aku la lakou i ka Haku, a hele pu aku la me au: a hana iho la makou i na laau me ka hana akamai. A hoike mai la ka Haku iaʻu ia manawa aku ia manawa aku, i ke kumu like e hana ai au, i na laau o ka moku.

2. Ano, aole au, o Nepai, i hana i na laau mamuli o ke ano i ao ia e na kanaka, aole hoi au i kapili aku i ka moku mamuli o ke ano o kanaka; aka, kapili aku la au ia mea mamuli o ke ano a ka Haku i hoike mai ai iaʻu: nolaila, aole mamuli o ka ke kanaka hana.

3. A pii pinepine aku la au, o Nepai, i ka mauna, a pule pinepine aku la au i ka Haku; no ia mea, hoike mai la ka Haku i na mea nui iaʻu.

4. Eia kekahi, mahope iho o koʻu hoopaa ana i ka moku, e like me ka olelo a ka Haku, ike ae la koʻu mau hoahanau ua maikai no ia, a o ka hana ua nani loa; nolaila, hoohaahaa hou lakou ia lakou iho imua o ka Haku.

5. A hiki mai la ka leo o ka Haku i koʻu makuakane, e ku ae makou a e iho aku iloko o ka moku.

6. Eia kekahi, ia la ae, mahope iho o ko makou hoomakaukau ana i na mea a pau, i ka hua, a me ka io nui mai ka waonahele mai, a i ka meli a lako, a i ka ai, e like me ka mea a ka Haku i kauoha mai ai ia makou, iho aku la makou iloko o ka moku, me ko makou ukana a pau a me na hua kanu o makou, a me kela mea keia mea a makou i lawe pu mai ai; o kela mea keia mea o makou e like me na makahiki ona; nolaila, iho iho la makou a pau iloko o ka moku, me ka makou mau wahine a me na keiki a makou.

7. Ano, ua hanau ia na koʻu makuakane na keikikane elua, ma ka waonahele: ua kapa ia ka mua o Iakoba, a o ka muli o Iosepa.

8. Eia kekahi, mahope iho o ko makou iho ana iloko o ka moku, me ka lawe pu ana me makou i na mea ai a me na mea e ae i kauoha ia mai ai makou, hemo aku la makou i ke kai, a puhi aku la ka makani ia makou, me ka ihu i ka aina i olelo mua ia ai.

9. A mahope o ko makou puhi ia ana e ka makani, no na la he nui, aia hoi, hoomaka iho la koʻu mau hoahanau, a me na keiki a Isemaela, a me ka lakou mau wahine no hoi, e hoolealea ia lakou iho, a hoomaka lakou e haa, a e memele, a e olelo me na huaolelo ino, he oiaio, a hoopoina iho la lakou i ka mana i lawe mai ai ia lakou malaila; he oiaio, ua hookiekie ia ae la me ka wawa nui.

10. A hoomaka iho la au, o Nepai, e makau nui loa o huhu mai auanei ke Akua ia makou, a e hahau mai ia makou no ka makou hana ino, a e ale ia makou i ka hohonu o ke kai; nolaila, hoomaka iho la wau, o Nepai, e olelo aku ia lakou me ke kuoo nui; aka hoi, huhu mai la lakou iaʻu, i ka i ana, Aole makou e ae aku i ko makou kaikaina e lilo ia i alii maluna o makou.

11. Eia kekahi, lalau mai la o Lamana laua me Lemuela iaʻu a nakii mai la iaʻu me na kaula, a hana mai la lakou iaʻu me ka lokoino nui; aka hoi, ae mai la ka Haku i keia mea, i hiki ia ia ke hoike mai i kona mana, i ka hooko ana i kana olelo, ana i olelo mai ai no ka poe hewa.

12. Eia kekahi, mahope iho o ko lakou nakinaki ana iaʻu, i hiki ole iaʻu ke oni, oki iho la ka hana o ka panana, i hoomakaukau ia ai e ka Haku;

13. Nolaila, aole lakou i ike kahi a lakou e hookele ai i ka moku, a nou mai la ka makani ino, he oiaio, he makani ino loa a weliweli hoi, a ua puhi ia makou ihope maluna o ke kai i na la ekolu, a hoomaka iho la lakou e makau nui loa, o make auanei lakou i ke kai; aole nae lakou i hookuu mai iaʻu.

14. A i ka ha o ka la o ko makou puhi ia ana ihope, nou mai la ka makani ino a ikaika loa.

15. A aneane makou i ale ia i ka hohonu o ke kai. A mahope iho o ko makou puhi ia ana ihope maluna o ke kai i na la eha, hoomaka iho la koʻu mau hoahanau e ike, maluna o lakou ka hoopai ana o ke Akua, a e make no lakou, ke mihi ole lakou i ko lakou mau hewa; nolaila, hele mai la lakou ioʻu la, a hoohemo mai la i na mea paa ma na pulima oʻu, aia hoi, ua pehu nui loa iho la laua; a pela no me na opuupuu wawae oʻu, a nui loa ka eha o lakou.

16. Aka hoi, nana aku la au i koʻu Akua, a hiilani no au ia ia a pau ka la; aole au i ohumu aku i ka Haku, no koʻu mau pilikia.

17. Ano, o koʻu makuakane, o Lehi, ua olelo aku la oia i na mea he nui loa ia laua, a i na keikikane a Isemaela no hoi; aka, ha aku la lakou i na olelo hooweliweli he nui i ka mea nana e olelo noʻu; a ua nui na makahiki o na makua oʻu, a ua nui ke kaumaha i loaa ai ia laua no ka laua mau keiki, a ua hoomoe ia laua ilalo me ka mai, maluna o na wahi moe o laua.

18. No ko laua kaumaha, a eha nui, a no ka hana hewa a koʻu mau hoahanau, ua aneane laua e lawe ia aku mai keia ola ana, e halawai pu me ko laua Akua, he oiaio, aneane e lawe ia ko laua oho hina e moe ilalo i ka lepo; he oiaio, aneane e hoolei ia aku laua iloko o ka lua kupapau kai.

19. A o Iakoba a me Iosepa no hoi ua opiopio laua, a he mea e pono ai no laua e loaa ka mea e ikaika ai, a ua kaumaha no hoi no ka popilikia o ko laua makuwahine; a o kaʻu wahine no hoi, me ka waimaka a me ka noi ana, a me kaʻu mau keiki no hoi, aole i hoopalupalu ia na naau o koʻu mau hoahanau ma ia mau mea, e hookuu mai iaʻu;

20. Aohe mea e ae, o ka mana o ke Akua wale no, e hooweliweli ana ia lakou me ka make, i hiki ke hoopalupalu i ko lakou mau naau; nolaila, ia lakou i ike ai ua aneane lakou e ale ia i ka hohonu o ke kai, mihi iho la lakou i ka mea a lakou i hana ai, a hookuu mai la lakou iaʻu.

21. Eia kekahi, mahope iho o ko lakou hookuu ana iaʻu, aia hoi, lawe ae la au i ka panana, a hele ae la ia e like me koʻu makemake. A pule aku la au i ka Haku; a mahope iho o kaʻu pule ana, malie iho la ka makani, a pau ae la ke kupikipikio o ke kai a ua malie loa.

22. Eia kekahi, hookele aku la au, o Nepai, i ka moku, a holo hou aku la makou i ka aina i olelo mua ia ai.

23. A mahope iho o ko makou holo ana i na la he nui, hiki aku la makou i ka aina i olelo mua ia ai; a pae aku la makou mauka maluna o ka aina, a kukulu iho la makou i na halelewa o makou, a kapa aku la makou ia aina ka aina i hai mua ia ai.

24. Eia kekahi, hoomaka iho la makou e mahi i ka honua, a e kanu i na anoano; he oiaio, kanu iho la makou iloko o ka lepo i ko makou mau anoano a pau a makou i lawe mai ai mai ka aina mai o Ierusalema. A kupu nui loa ae la ia mau mea; nolaila, ua hoopomaikai ia mai la makou me ka lako.

25. Eia kekahi, ike aku la makou ma ka aina i olelo mua ia ai, ma ko makou hele ana i ka waonahele, aia ma ka ululaau na holoholona o kela ano o keia ano, o ka bipi-wahine a me ka bipi-kane, a me ka hoki, a me ka lio, a me ke kao, a me ke kao hihiu, a me kela ano keia ano o na holoholona hihiu, i ku pono i ke kanaka. A loaa mai la ia makou kela ano keia ano o na mea e hoohehee ia, o ke gula, o ke kala, a me ke keleawe.