1. Eia kekahi, kauoha mai la ka Haku iaʻu, nolaila, hana iho la au i na papa mailoko mai o ka mea i hoohehee ia, i hiki iaʻu ke kahakaha maluna o lakou i ka mooolelo o koʻu poe kanaka. A maluna iho o na papa aʻu i hana ai, kahakaha iho la au i ka mooolelo o koʻu makuakane, a me ko makou hele ana no hoi ma ka waonahele, a me na wanana a koʻu makuakane: a he nui no hoi o kaʻu mau wanana ponoi aʻu i kahakaha iho ai maluna o lakou.

2. Aole au i ike ma ka mamawa aʻu i olelo aku ai ia mau wanana, e kauoha ia ana au e ka Haku e hana i ua mau papa nei: nolaila, o ka mooolelo o koʻu makuakane a me ke kuauhau o kona poe kupuna, a me ka hapa nui o ka hana a makou ma ka waonahele, ua kahakaha ia maluna iho o ua mau papa la aʻu i olelo mua ai; nolaila, o na mea i hala e mamua o kaʻu hana ana i keia mau papa, he oiaio iho la, ua kakau nui ia ia mau mea maluna o na papa mua.

3. A mahope iho o kaʻu hana ana i keia mau papa ma o ke kauoha la, loaa mai la iaʻu, ia Nepai, he kauoha e kakau ia na mea maopopo a maikai loa o ka oihana hai olelo, a o na wanana, maluna iho o keia mau papa; a e malama pono ia na mea i kakau ia no ke ao ana aku i koʻu poe kanaka e noho ana auanei ma ka aina, a no na hana naauao e ae, ua ikea ua mau hana la e ka Haku;

4. Nolaila, kakau iho la wau, o Nepai, i mooolelo maluna iho o na papa e ae, he mooolelo nui ae ia no na kaua, a me na paio, a me ka luku ia ana o koʻu poe kanaka. A ua hana au i keia, a kauoha aku la no hoi i koʻu poe kanaka no ka lakou mea e pono ai ke hana, mahope iho o koʻu hele ana aku; a e haawi ia aku keia mau papa mai kekahi hanauna aku i kekahi hanauna aku, a mai kekahi kaula aku i kekahi, a hiki i ka wa e loaa ai ia lakou na kauoha e ae a ka Haku.

5. A e kakau ia auanei ka mooolelo o kaʻu hana ana i keia mau papa i kekahi manawa e aku; alaila hoi, e hana no au e like me ka mea aʻu i olelo ai: a ke hana nei au i keia, e malama pono ia na mea laa loa no ka hoonaauao ia ana o koʻu poe kanaka.

6. Aka hoi, aole au e kakau i kekahi mea maluna o na papa, ke manao ole au he mea laa ia. Ano, ina e lalau ana au, ina no ua lalau ka poe o ka wa kahiko. Aole nae au e makemake e hoapono iaʻu iho no na kanaka e ae, aka no ka nawaliwali iloko oʻu, mamuli o ke kino, i makemake ai au e hoakaka noʻu iho.

7. No ka mea, o na mea a kekahi poe i manao nui ai he maikai i ke kino a i ka uhane hoi, o kekahi poe e ae ua hoowahawaha lakou, a hehi ilalo o ko lakou mau wawae. He oiaio, hehi no na kanaka i ke Akua io o ka Iseraela, malalo iho o na wawae o lakou; ke i aku nei au, hehi malalo iho o na wawae o lakou; aka, ke makemake nei au e olelo ma kahi olelo e. Ke hoowahawaha aku nei lakou ia ia, a hoolohe ole i ka olelo a kona ao ana;

8. Aia hoi, e hele mai ana oia e like me ka olelo a ka anela, i ka makahiki eono haneri mai ka manawa a koʻu makuakane i haalele ai ia Ierusalema.

9. A no ka hana ino loa a ko ke ao nei, e hoohewa aku auanei lakou ia ia me he mea ole la; nolaila, e hahau ana lakou ia ia, a e ahonui ana oia ma ia mea; a e pepehi ana lakou ia ia, a e ahonui ana oia ma ia mea. He oiaio, e kuha aku ana no lakou maluna ona, a e ahonui ana oia ma ia mea, no kona aloha lokomaikai a me kona ahonui i na keiki a kanaka.

10. A o ke Akua o ko kakou poe kupuna, ka poe i alakai ia aku mailoko mai o Aigupita, mailoko mai o ka noho luhi ana, a i malama ia no hoi ma ka waonahele e ia; he oiaio, ke Akua o Aberahama, a o Isaaka, a me ke Akua o Iakoba, e haawi ana ia ia iho, e like me na olelo a ka anela, me he kanaka la, iloko o na lima o na kanaka hewa, e kaulia iluna e like me na olelo a Zenoka, a e kaulia ma ke kea e like me na olelo a Neuma, a e kanu ia ma kahi hale kupapau e like me na olelo a Zenosa, ana i olelo mai ai no na la pouli ekolu, he hoailona ia e haawi ia mai no kona make, i ka poe e noho ana ma na mokupuni o ke kai; aka e haawi ia me ka maopopo nui i ka poe o ka hale o Iseraela.

11. No ka mea, penei wahi a ke kaula, e hele io mai ke Akua ma ia la i ko ka hale o Iseraela a pau; i kekahi poe me kona leo, no ko lakou pono, i ka hauoli nui ana o lakou a i ka hoola ia ana no hoi; a i kekahi poe e ae me ka hekili a me ka uila o kona mana, ma ka makani ino, ma ke ahi, a ma ka uahi, a ma ka ohu o ka pouli, a ma ka hamama ana o ka honua, a ma na mauna e lawe ia aku ana iluna;

12. A e hiki io mai keia mau mea e pono ai, wahi a ke kaula Zenosa. A e nahaha io no na pohaku o ka honua; a no ka auwe ana o ka honua, e olelo aku auanei na alii he nui o na mokupuni o ke kai, ma o ka Uhane la o ke Akua maluna o lakou, Ke eha nei ke Akua o na mea a pau.

13. A penei wahi a ke kaula, no ka poe e noho ana ma Ierusalema, e hahau ia lakou e na lahuikanaka a pau no ko lakou kau ana i ke Akua o ka Iseraela ma ke kea, a no ka hoohaliu ana ae i ko lakou mau naau i kahi e, me ka hoomalau ana i na hoailona a me na mea kupanaha, a me ka mana a me ka nani o ke Akua o ka Iseraela;

14. A no ka hoohaliu ana ae o lakou i ko lakou mau naau, wahi a ke kaula, a no ka hoowahawaha ana hoi i ka Mea Hemolele o ka Iseraela, e auwana auanei lakou ma ke kino, a e make, a e lilo i mea e hoino ia a e kuamuamu ia, a e inaina ia iwaena o na lahuikanaka a pau;

15. Aka hoi, i ka wa e hiki mai ai ia la, wahi a ke kaula, i hoohaliu hou ole ai lakou i ko lakou naau e ku e i ka Mea Hemolele o ka Iseraela, alaila, e hoomanao oia i na berita, ana i hana mai ai i ko lakou poe kupuna;

16. He oiaio, alaila, e hoomanao oia i na mokupuni o ke kai; a e houluulu no au i na lahuikanaka a pau o ko ka hale o Iseraela, mai na kihi eha o ka honua, wahi a ka Haku, e like me na olelo a ke kaula Zenosa;

17. He oiaio, a e ike ko ke ao nei a pau i ka hoola ana o ka Haku, wahi a ke kaula; a e hoopomaikai ia kela lahui keia lahui, kela ohana keia ohana, kela olelo keia olelo, a me na kanaka a pau.

18. Ua palapala au, o Nepai, i keia mau mea i koʻu poe kanaka, i hiki paha iaʻu ke koi aku ia lakou e hoomanao i ka Haku, i ko lakou Mea Hoolapanai;

19. Nolaila, ke olelo aku nei au i ko ka hale a pau o Iseraela, ina paha e loaa ia lakou keia mau mea.

20. No ka mea, he mau hakoko ana koʻu ma ka Uhane, e hooluhi ana iaʻu, a ua ikaika ole koʻu mau ami a pau, no ka poe e noho ana ma Ierusalema; no ka mea, ina ua lokomaikai ole ka Haku iaʻu, ma ka hoike ana mai iaʻu no lakou, e like me kana i ka poe kaula kahiko, ina ua make pu no hoi au;

21. A ua hoike io oia i ka poe kaula kahiko, i na mea a pau e pili ana ia lakou; a ua hoike no hoi oia i kekahi poe he nui no makou; nolaila, he mea e pono ai i ike makou i na mea e pili ana ia lakou, no ka mea, ua palapala ia maluna o na papa keleawe.

22. Ano, eia kekahi, ao aku la au, o Nepai, i koʻu mau hoahanau no ia mau mea. A heluhelu aku la au i na mea he nui wale ia lakou, i kahakaha ia maluna o na papa keleawe, i ike no hoi lakou i ka hana ana a ka Haku ma na aina e, mawaena o ka poe o ka wa kahiko.

23. A heluhelu ae la au i na mea he nui loa i palapala ia iloko o ka buke a Mose; aka, i hiki ai iaʻu ke hoohuli nui ae ia lakou e manaoio i ka Haku i ko lakou Mea Hoola, heluhelu ae la au ia lakou i ka mea i palapala ia e Isaia; no ka mea, hoohalike mai la au i na palapala hoano a pau ia makou, no ke ao ana a me ka hoonaauao ana ia makou.

24. Nolaila, olelo aku la au ia lakou, i ka i ana, E hoolohe mai oukou i na olelo a ke kaula, o oukou kekahi koena o ko ka hale o Iseraela, he lala i uhai ia; e hoolohe oukou i na olelo a ke kaula, i palapala ia i ko ka hale a pau o Iseraela, a e hoohalike ia mau olelo ia oukou iho, i loaa ia oukou ka manaolana e like me na hoahanau o oukou, mailaila mai oukou i haki ia mai ai; no ka mea, mamuli o keia ano i palapala mai ai ke kaula: