1. Eia kekahi, a hiki aku la makou i ka waonahele i ko makou makuakane la, aia hoi, ua hoopiha ia oia me ka olioli, a o koʻu makuwahine no hoi, o Saria, ua hauoli nui loa iho la, oiai, ua uwe io oia no makou;

2. No ka mea, ua manao iho la oia ua make makou ma ka waonahele; a ua hoohewa aku la no hoi oia i koʻu makuakane, me ka olelo ana ia ia, he kanaka hihio ia; i ka i ana, Aia hoi, ua alakai mai la oe ia makou mai ko makou aina hooilina mai, a o kaʻu mau keikikane aohe lakou, a ke make nei kaua ma ka waonahele.

3. A mamuli o ke ano o keia olelo i hoohewa aku ai koʻu makuwahine i koʻu makuakane.

4. Olelo ae la koʻu makuakane, i ka i ana, Ua ike no au he kanaka hihio wau; no ka mea, ina aole au i ike i na mea o ke Akua maloko o ka hihio, ina ua ike ole au i ka lokomaikai o ke Akua, a ua noho au ma Ierusalema a make pu me koʻu poe hoahanau.

5. Aka hoi, ua loaa iaʻu ka aina i olelo mua ia ai, a ma ia mau mea ke hauoli nei au; he oiaio, a ke ike nei au e hoopakele no ka Haku i kaʻu mau keikikane mailoko ae o na lima o Labana, a e lawe hou mai ia lakou io kaua nei i ka waonahele.

6. A mamuli o ke ano o keia olelo, i hooluolu ai koʻu makuakane, o Lehi, i koʻu makuwahine, ia Saria, no makou, ia makou e hele ana ma ka waonahele e pii aku i ka aina o Ierusalema, i loaa ai ka mooolelo o ka poe Iudaio.

7. A ia makou i hoi aku ai i ka halelewa o koʻu makuakane, aia hoi, ua piha laua i ka olioli, a ua hooluolu ia koʻu makuwahine:

8. A olelo mai la oia, i ka i ana, Ano, ke ike io nei au ua kauoha mai la ka Haku i kaʻu kane e holo iloko o ka waonahele; he oiaio, a ua ike io no hoi au ua hoomalu mai la ka Haku i kaʻu mau keikikane, a ua hoopakele mai la ia lakou mailoko ae o na lima o Labana, a haawi ae la ia lakou i mana i hiki ai ia lakou ke hooko i ka mea a ka Haku i kauoha mai ai ia lakou. A mamuli o keia ano kana olelo.

9. Hauoli nui loa iho la laua, a kaumaha iho la i mohai a me na mohai kuni i ka Haku; a haawi aku la laua i ke aloha i ke Akua o ka Iseraela.

10. A mahope iho o ko laua haawi ana aku i ka hoomaikai i ke Akua o ka Iseraela, lawe aku la koʻu makuakane, o Lehi, i na mooolelo i kahakaha ia maluna o na papa keleawe, a imi iho la oia ia mau mea mai ka hoomaka ana.

11. A ike iho la oia aia no iloko olaila na buke elima a Mose, ka mooolelo e hoakaka ana no ka hana ia ana o ke ao nei, a me Adamu laua me Ewa, na kupuna mua o kakou;

12. A he mooolelo no hoi o ka poe Iudaio, mai kinohi a hiki i ka hoomaka ana o ke au ia Zedekia, ke alii o Iuda;

13. A me na wanana no hoi a na kaula hemolele, mai kinohou a hiki i ka hoomaka ana o ke au ia Zedekia; a o na wanana he nui wale i olelo ia e ka waha o Ieremia.

14. Eia kekahi, loaa iho la i koʻu makuakane, ia Lehi, maluna iho o na papa keleawe, ke kuauhau o kona poe kupuna; no ia mea, ua ike oia he mamo ia na Iosepa; he oiaio, o ua Iosepa la ke keiki a Iakoba, ka mea i kuai ia aku i Aigupita, a o ka mea hoi i hoola ia e ka lima o ka Haku, i hiki ia ia ke hoola i kona makuakane, ia Iakoba, a me ko kona hale a pau, mai ka make ana i ka wi.

15. A ua alakai ia aku lakou no hoi mailoko mai o ka noho pio ana, a mailoko mai o ka aina o Aigupita, e keia Akua hookahi no, nana i hoola ia lakou.

16. A pela i loaa ai i koʻu makuakane, ia Lehi, ke kuauhau o kona poe kupuna. A he mamo no hoi o Labana na Iosepa, no ia mea, ua malama oia me kona mau makua i na mooolelo.

17. A, i ka wa a koʻu makuakane i ike ai i ua mau mea nei a pau, ua piha iho la ia me ka Uhane, a hoomaka iho la e wanana mai no kana poe hua;

18. E hele aku auanei keia mau papa keleawe i na lahuikanaka a pau, a me na ohana, na olelo, a me na kanaka o kana hua.

19. Nolaila, i mai la oia aole e popo ana keia mau papa keleawe; aole hoi e ponalonalo ana i ka waiho loihi ana. A ua wanana mai la oia i na mea he nui loa e pili ana i kana poe hua.

20. Eia kekahi, a hiki i keia manawa ua malama pono wau a me koʻu makuakane i na kauoha a ka Haku, ana i kauoha mai ai ia maua.

21. A ua loaa mai ia makou ka mooolelo a ka Haku i kauoha mai ai ia makou, a imi iho la i ua mau mea nei a ike makou he mau mea i makemake ia; he oiaio, he mea maikai loa ia makou, no ka mea, e hiki ia makou ke malama i na kauoha a ka Haku no ka makou poe keiki.

22. No ia mea, he mea pono ia i ko ka Haku manao e halihali pu makou ia mau mea me makou, i ko makou hele ana ma ka waonahele i ka aina i olelo mua ia ai.