1. Ano, ke makemake nei au e ike oukou, mahope iho o ka pau ana o ka wanana ana o koʻu makuakane, o Lehi, i na mea e pili ana i kana poe hua, olelo hou mai la ka Haku ia ia, i ka i ana, he mea pono ole nona, no Lehi, e lawe aku i kona ohana wale no i ka waonahele; aka na kana mau keikikane e lawe mai i na kaikamahine i mau wahine na lakou, i hiki ai ia lakou ke hoohua mai i na hua no ka Haku, iloko o ka aina i olelo mua ia ai.

2. Eia kekahi, kauoha mai la ka Haku ia ia, e hoi hou aku au, o Nepai, a me koʻu mau hoahanau i ka aina o Ierusalema, a e lawe mai ia Isemaela a me kona ohana ilalo iloko o ka waonahele.

3. Eia kekahi, hele hou aku la au, o Nepai, me koʻu mau hoahanau iloko o ka waonahele e pii aku i Ierusalema.

4. Pii aku la makou i ka hale o Isemaela, a ua loaa ia makou ka lokomaikai imua o ke alo o Isemaela, a olelo aku la makou ia ia i na olelo a ka Haku.

5. Eia kekahi, hoopalupalu mai la ka Haku i ka naau o Isemaela, a me ko kona hale no hoi, a hele pu lakou me makou ilalo iloko o ka waonahele, i ka halelewa o ko makou makuakane.

6. Eia kekahi, i ko makou hele ana i ka waonahele, aia hoi, kipi mai la o Lamana laua me Lemuela, a me elua o na kaikamahine a Isemaela, a me na keikikane elua a Isemaela, a me ko lakou mau ohua ia makou; he oiaio, e ku e mai iaʻu, ia Nepai, a ia Sama, a i ko lakou makuakane ia Isemaela, a me kana wahine, a me kana mau kaikamahine ekolu i koe.

7. Eia kekahi, ma ua ku e ana nei ua makemake lakou e hoi i ka aina o Ierusalema.

8. Ano hoi, ua kaumaha iho la au, o Nepai, no ka paakiki o ko lakou mau naau, nolaila, olelo aku la au ia lakou, i ka i ana, ia Lamana a ia Lemuela, Aia hoi, he mau kaikuaana olua noʻu; no ke aha la ka paakiki loa o ko olua mau naau, a me ka pouli no hoi ma ko olua hoomaopopo ana, i lilo ia i mea pono no olua, naʻu, na ko olua kaikaina, e olelo aku ia olua, he oiaio, a e lilo i mea e hoohalike ai no olua?

9. No ke aha la i hoolohe ole ai olua i ka olelo a ka Haku?

10. No ke aha hoi olua i hoopoina iho ai i ko olua ike ana i kekahi anela o ka Haku?

11. No ke aha la i hoopoina ai olua i na mea nui a ka Haku i hana mai ai no kakou, i ka hoopakele ana ia kakou mailoko mai o na lima o Labana, a i loaa no hoi ia kakou ka mooolelo?

12. He oiaio, a no ke aha hoi i hoopoina iho ai olua, ua hiki i ka Haku ke hana i na mea a pau, e like me kona makemake, no na keiki a kanaka, ke hana lakou ma ka manaoio iloko ona; nolaila, e hoomau pono kakou ia ia.

13. A ina e hoomau pono kakou ia ia, e loaa auanei ia kakou ka aina i olelo mua ia ai; a e ike auanei oukou, i kekahi manawa aku, i ka hooko ia ana o ka olelo a ka Haku, e pili ana i ka hoopau ia ana o Ierusalema; no ka mea, o na mea a pau a ka Haku i olelo mai ai no Ierusalema e hooko ia no ia e pono ai.

14. No ka mea, aia hoi, e hooki koke ana ka Uhane o ka Haku i ka paio ana me lakou; no ka mea, aia hoi, ua hoomalau ae la lakou i ka olelo a na kaula, a ua hoolei aku lakou ia Ieremia iloko o ka halepaahao, a ua imi lakou e kaili ae i ke ola o koʻu makuakane, a ua kipaku mai la lakou ia ia mailoko mai o ka aina.

15. Ano hoi, ke i aku nei au ia oukou, ina e hoi aku oukou i Ierusalema, e make pu no hoi oukou me lakou. Ano, ina e makemake oukou, o pii aku i ka aina, a e hoomanao hoi i na olelo aʻu e olelo nei ia oukou, ina e pii oukou, e make no hoi oukou, no ka mea, pela i koi mai ai ka Uhane o ka Haku iaʻu e olelo aku.

16. Eia kekahi, i ka wa aʻu, a Nepai, i olelo aku ai i keia mau olelo i koʻu mau hoahanau, ua huhu mai la laua iaʻu. Eia kekahi, kau mai la laua i ko laua mau lima maluna iho oʻu—no ka mea, aia hoi, nui loa iho la ko laua huhu—a nakii mai la laua iaʻu i na kaula, no ka mea, imi iho la laua e lawe aku i koʻu ola, i hiki ai ia laua ke haalele iaʻu ma ka waonahele, e ai ia e na holoholona hihiu.

17. Aka, eia kekahi, pule aku la wau i ka Haku, i ka i ana, E ka Haku e, e like me koʻu manaoio iloko ou, e hoopakele mai oe iaʻu, mai na lima mai o koʻu mau hoahanau, he oiaio, e haawi mai iaʻu i ka ikaika e hiki iaʻu ke moku i keia mau kaula aʻu i paa ai.

18. Eia kekahi, iaʻu i olelo aku ai i keia mau olelo, aia hoi, ua hemo wale ae la na kaula mailuna aku o koʻu mau lima, a me koʻu mau wawae a ku ae la wau imua o koʻu mau hoahanau, a olelo hou aku la au ia laua.

19. Huhu hou mai la laua iaʻu, a imi iho la e kau mai i na lima maluna iho oʻu. Aka hoi, o kekahi o na kaikamahine a Isemaela, a me kona makuwahine no hoi, a me kekahi o na keikikane a Isemaela, nonoi aku la lakou i koʻu mau hoahanau, a hoopalupalu ae la lakou i ko laua mau naau, a hooki iho la laua i ko laua hooikaika ana e kaili aku i koʻu ola.

20. Eia kekahi, ua kaumaha iho la laua no ko laua hewa, a kulou iho la laua imua oʻu me ka nonoi mai iaʻu, e kala aku au i ka hewa a laua i hana mai ai iaʻu.

21. Eia kekahi, kala aku la no wau ia laua me ka manao ole aku i na mea a pau a laua i hana ai. A hooikaika aku la au ia laua e pule aku i ka Haku, i ko laua Akua, no ke kala ia ana mai. A hana iho la laua pela. A pau ka laua pule ana i ka Haku, alaila, hele hou aku la makou ma ko makou hele ana i ka halelewa o ko makou makuakane.

22. Eia kekahi, hiki aku la makou i ka halelewa o ko makou makuakane. A mahope iho o koʻu hiki ana, a me koʻu mau hoahanau, a me ko ka hale a pau o Isemaela, i ka halelewa o koʻu makuakane, haawi aku la lakou i ke aloha i ka Haku, i ko lakou Akua; a kaumaha aku la lakou i mohai, a me na mohai kuni ia ia.