Mokuna 10
1. Ano, ke hoomaka nei au, o Nepai, e kakau i mooolelo maluna o keia mau papa, no kaʻu hana ana, a me koʻu noho alii ana, a me ka hana ma ka oihana kahuna, nolaila, i ke kakau ia ana o koʻu mooolelo iho he pono noʻu e olelo iki no na mea o koʻu makuakane, a me na hoahanau hoi oʻu.
2. No ka mea, eia kekahi, a pau aku la ka olelo ana a koʻu makuakane i na olelo o kona moeuhane, a me kona paipai ana ia laua e hooikaika loa, olelo mai la oia ia laua no ka poe Iudaio.
3. A mahope iho o ko lakou luku ia ana, he oiaio, o ua kulanakauhale nui la o Ierusalema, a he nui loa ka poe e lawe pio ia i Babulona, e like me ka manawa ku pono o ka Haku, e hoi hou auanei lakou; he oiaio, e lawe hou ia mai mailoko mai o ka noho pio ana; a mahope iho o ko lakou lawe hou ia ana mailoko mai o ka noho pio ana, e noho hou no auanei lakou ma ko lakou aina hooilina.
4. He oiaio, he mau haneri makahiki eono mai ka wa a koʻu makuakane i haalele ai ia Ierusalema, e hoala mai ana ka Haku ke Akua, i kekahi kaula iwaena o ka poe Iudaio; he oiaio, he Mesia, a ma na olelo e ae, he Mea e Ola ai ko ke ao nei.
5. A olelo mai la no hoi oia no na kaula, ua hoike mai la ka nui loa o lakou no ia mau mea, no ua Mesia nei, ka mea ana i olelo mai ai, a oia ka Mea e hoolapanai i ko ke ao nei.
6. Nolaila, o ko ke ao nei a pau, ua lilo, a ua haule no hoi, a e mau loa aku lakou peia, ke ole lakou e hilinai aku maluna o ua Mea Hoola nei.
7. A olelo no hoi oia no kekahi kaula, e hele e mai ana mamua o ka Mesia, e hoomakaukau i ke ala o ka Haku;
8. He oiaio, e hele no auanei oia a e kala aku ma ka waonahele, E hoomakaukau oukou i ke alanui o ka Haku, a e hana i kona mau kuamoo i pololei; no ka mea, ke ku nei kekahi iwaena o oukou, ka mea a oukou i ike ole ai, a ua nui aku kona mana mamua o koʻu, aole au e pono ke kala ae i ke kaula o kona kamaa. A ua nui ka olelo a koʻu makuakane no ua mea nei.
9. A i mai la koʻu makuakane e bapetizo no ia ma Betabara, ma kela aoao o Ioredane; a i mai la no hoi ia e bapetizo no oia me ka wai; he oiaio, e bapetizo auanei ia i ka Mesia me ka wai.
10. A mahope iho o kona bapetizo ana i ka Mesia me ka wai, e ike no oia a e hoike aku, ua bapetizo aku oia i ke Keikihipa a ke Akua, nana e lawe aku i na hala o ko ke ao nei.
11. Eia kekahi, a pau ae la ka olelo ana a koʻu makuakane i keia mau olelo, olelo ae la oia i koʻu mau hoahanau no ka euanelio e hai ia ana iwaena o ka poe Iudaio; a no ka emi ana no hoi o ka poe Iudaio iloko o ka hoomaloka. A mahope iho o ko lakou pepehi ana i ka Mesia, ka mea e hele mai ana, a mahope iho o kona make ana, e ala no oia mai ka make mai, a e hoike aku ma ka Uhane Hemolele, ia ia iho i ka poe Genetile.
12. He oiaio, olelo nui mai la koʻu makuakane no ka poe Genetile, a no ko ka hale o Iseraela, e hoohalike ia auanei lakou me kekahi laau oliva, o kona mau lala e haihai ia auanei, a e hookauliilii ia aku maluna o ka ili a pau o ka honua.
13. Nolaila, i mai la ia he mea e pono ai e alakai ia kakou me ka lokahi o ka manao, i ka aina i hai mua ia ai, i ka hooko ana i ka olelo a ka Haku, e hoopuehu ia ai kakou maluna o ka ili a pau o ka honua.
14. A mahope iho o ka hoopuehu ia ana o ko ka hale o Iseraela, e houluulu hou ia lakou; a mahope iho o ka loaa ana i ka poe Genetile ka euanelio mana a pololei, e pakui ia auanei na lala maoli o ka laau oliva, oia na koena o ko ka hale o Iseraela, a e loaa ia lakou ka ike no ka Mesia oiaio, ko lakou Haku a me ko lakou Mea e Ola ai.
15. A mamuli o ke ano o keia mau olelo, wanana aku la kuu makuakane, a olelo ae la i koʻu mau hoahanau; a me na mea e ae no hoi he nui wale, aʻu i kakau ole ai iloko o ua buke nei; no ka mea, ua kakau au i na mea i ku pono iaʻu o ua mau mea nei iloko o kaʻu buke e ae.
16. A ua hana ia keia mau mea a pau aʻu i olelo ai, oiai ka noho ana o koʻu makuakane iloko o ka halelewa, ma ke awawa o Lemuela.
17. Eia kekahi, owau, o Nepai, mahope iho o koʻu lohe ana i na olelo a pau a koʻu makuakane, no na mea ana i ike ai iloko o ka hihio; a me na mea no hoi ana i olelo mai ai ma ka mana o ka Uhane Hemolele; a o ua mana la ua loaa ia ia ma ka manaoio i ke Keiki a ke Akua; a o ke Keiki a ke Akua oia ka Mesia e hele mai ana; ua makemake no hoi wau, o Nepai, e nana, a e lohe, a e ike i keia mau mea, ma ka mana o ka Uhane Hemolele, o ka haawina no ia o ke Akua i ka poe a pau e imi ikaika ana ia ia, i ka wa kahiko no hoi e like me ka wa ana e hoike mai ai ia ia iho i na keiki a kanaka;
18. No ka mea, oia mau no ia, inehinei, a i keia la, a i ka wa pau ole; a ua hoomakaukau ia ke ala no na kanaka a pau, mai ka hookumu ia ana mai o ke ao nei, ina e mihi lakou a e hele aku io na la;
19. No ka mea, o ka mea e imi ikaika ana e loaa no ia ia; a e wehe ia na mea pohihihi o ke Akua ia lakou, ma ka mana o ka Uhane Hemolele, i keia manawa no hoi e like me na manawa kahiko; a i na la kahiko no hoi e like me na manawa e hiki mai ana; nolaila, o ka hana a ka Haku oia hookahi mau loa no ia.
20. Nolaila, e hoomanao, e ke kanaka, no kau mau hana a pau, e hookolokolo ia auanei oe.
21. No ia mea, ina ua imi oukou e hana i ka hewa ma na la o ko oukou noho ana ma ka honua, alaila, ua loaa oukou me ka paumaele imua o ka noho hookolokolo o ke Akua; aole loa e hiki i kekahi mea paumaele ke noho pu me ke Akua; nolaila, e hoolei ia aku oukou no ka wa pau ole e pono ai.
22. A ke haawi mai nei ka Uhane Hemolele i ka mana iaʻu e olelo aku i keia mau mea, aole e hoole aku.