Ka Buke Mua A Nepai
O Kona Noho Alii Ana A Me Kana Hana Ma Ka Oihana Kahuna
He mooolelo o Lehi a me kana wahine o Saria, a me kana mau keikikane eha, i kapa ia, (e hoomaka ana ma ka hiapo,) o Lamana, o Lemuela, o Sama, a me Nepai. Ao aku la ke Akua ia Lehi e haalele iho i ka aina o Ierusalema, no ka mea, ua wanana aku la ia i na kanaka no ko lakou hana hewa ana; a imi iho la lakou e hoopau i kona ola. Hele aku la oia me kona ohana i ekolu la o ka hele ana i ka waonahele. Lawe ae la o Nepai i kona mau hoahanau, a hoi hou aku la i ka aina o Ierusalema no ka mooolelo o ka poe Iudaio. Ka mooolelo o ka popilikia o lakou. Ka lawe ana o lakou i na kaikamahine a Isamaela i mau wahine na lakou. Ko lakou lawe ana i ko lakou mau ohua, a hele aku la i ka waonahele. Na popilikia a me na eha o lakou ma ka waonahele. Ke alahele a lakou i hele aku ai. Hiki aku la lakou i ka moana nui. Kipi mai la ko Nepai mau hoahanau ia ia. Hoohilahila iho la oia ia lakou, a kapili aku la oia i moku. Kapa aku la lakou ia wahi o Momona. Holo aku la lakou mai kela aoao o ka moana nui, i ka aina i hai mua ia ai. O keia no ka mooolelo a Nepai; no ka mea, naʻu nei, na Nepai, i kakau i keia mooolelo.
Mokuna 1
1. Owau, o Nepai, ua hanau ia mai la e na makua maikai, nolaila, ua ao ia mai la au i na mea o ka naauao a pau o koʻu makuakane; a ua ike au i na pilikia he nui i koʻu mau la—aka hoi, ua lokomaikai nui ia mai la au e ka Haku i na la oʻu a pau; he oiaio, ua loaa mai la iaʻu ka ike nui no ka lokomaikai a me na mea pohihihi o ke Akua, nolaila, ke kakau nei au i mooolelo o na mea aʻu i hana ai, i koʻu mau la;
2. He oiaio no, ke hana nei au i mooolelo iloko o ka olelo a koʻu makuakane, o ka ike o ka poe Iudaio a me ka olelo a ko Aigupita poe ka i hui ia ma ia olelo.
3. A ua ike au i ka mooolelo aʻu e hana nei he oiaio ia; a ke hana nei au ia mea me koʻu lima iho; a ke kakau nei au ia mea e like me kaʻu ike.
4. No ka mea, eia kekahi, i ka hoomaka ana o ka makahiki mua o ka noho alii ana o Zedekia, ke alii o Iuda, (ua noho koʻu makuakane o Lehi ma Ierusalema i na la a pau ona;) a i ua makahiki la hele mai la na kaula he nui, e wanana aku ana i na kanaka, e mihi lakou e pono ai, a i ole ia e luku ia aku ke kulanakauhale nui o Ierusalema.
5. No ia mea, i ka hele ana aku o koʻu makuakane o Lehi, pule aku la ia i ka Haku, he oiaio, me kona naau a pau, i lokomaikai ia mai kona poe kanaka.
6. Eia kekahi, i kana pule ana i ka Haku, ua iho mai la he kia ahi, a noho iho la maluna iho o kekahi pohaku imua ona; a ua ike oia a lohe no hoi i na mea he nui wale; a no na mea ana i ike ai a i lohe ai, ua makau iho la kela a haalulu nui iho la no hoi.
7. Eia kekahi, hoi aku la ia i kona hale iho ma Ierusalema; a moe iho la ia maluna o kona wahi moe; ua uluhia i ka Uhane a me na mea ana i ike ai;
8. A i kona uluhia ana pela i ka Uhane, ua lawe ia aku ia ma ka hihio, a ike aku la oia i na lani ua wehe ia, a manao iho la oia ua ike oia i ke Akua e noho ana maluna iho o kona noho alii, i hoopuni ia e na anela he lehulehu hiki ole ke helu ia, e hoolea ana a e hiilani ana i ko lakou Akua.
9. Eia kekahi, ua ike aku la oia i kekahi mea e iho mai ana maiwaena mai o ka lani, a ike aku la ia ua oi aku kona alohilohi mamua o ko ka la ma ke awakea;
10. A ike aku la no hio oia he umikumamalua mau mea e ae e hahai ana ia ia, a ua oi aku ko lakou lilelile mamua o ko na hoku ma ke aouli;
11. A iho mai la lakou ilalo, a hele aku la maluna o ka ili o ka honua; a hele mai la o ka mea mua, a ku iho la i mua o koʻu makuakane, a haawi mai la ia ia i buke, a kauoho mai la ia ia e heluhelu.
12. Eia kekahi, i kona heluhelu ana, ua hoopiha ia oia me ka Uhane o ka Haku,
13. A heluhelu ia, i ka i ana, Auwe, auwe Ierusalema! No ka mea, ua ike aku la au i kou mau mea hoopailua; he oiaio, he nui na mea a koʻu makuakane i heluhelu ai e pili ana ia Ierusalema, e luku ia auanei ia, a e luku ia aku he nui wale o na kamaaina olaila, e ka pahi kaua, a e lawe pio ia aku no hoi he nui wale i Babulona.
14. Eia kekahi, i ka wa a koʻu makuakane i heluhelu ai a ike ai i na mea nui a kupaianaha he nui wale, olelo aku la ia i na mea he nui loa ia ka Haku; me neia, Manomano a kupanaha no kau hana, E ka Haku, ke Akua mana loa! Ua kiekie kou noho alii ma na lani, a o kou mana, a o kou lokomaikai, a me kou aloha, maluna iho ia o ko ka honua nei a pau; a no kou aloha, aole oe e hookuu mai i ka make i ka poe e hele ana iou la!
15. A mamuli o keia ano ka olelo a koʻu makuakane e hiilani ana i kona Akua; no ka mea, ua hauoli iho la kona uhane, a ua piha iho la kona naau a pau, no na mea ana i ike ai; he oiaio, i na mea a ka Haku i hoike mai ai ia ia.
16. Ano, owau, o Nepai, aole au e kakau ana i ka mooolelo o na mea a pau a koʻu makuakane i kakau ai, no ka mea, ua kakau oia i na mea he nui wale ana i ike ai iloko o na hihio, a iloko o na moe uhane; a ua kakau iho la no hoi oia i na mea he nui loa ana i wanana mai ai, a i olelo mai ai i kana poe keiki, o ia mau mea a pau aole au e kakau ana;
17. Aka, e kakau no au i ka mooolelo o kaʻu hana i koʻu mau la. Aia hoi, ke kakau nei au i olelo i hoopokole ia o ka mooolelo o koʻu makuakane, maluna o na papa aʻu i hana ai me koʻu mau lima iho; no ia mea, mahope iho o koʻu hoopokole ana i ka mooolelo o koʻu makuakane, alaila, e kakau no au i ka mooolelo o koʻu ola iho.
18. Nolaila, ua makemake au e ike oukou, mahope iho o ka hoike ana o ka Haku i ua mau mea kupanaha nei he nui loa i koʻu makuakane, ia Lehi, no ka luku ia ana o Ierusalema, aia hoi, hele aku la oia iwaena o na kanaka, a hoomaka ae la e wanana aku, a e hai aku ia lakou no na mea ana i ike ai a i lohe ai hoi.
19. Eia kekahi, hoomaewaewa mai la ka poe Iudaio ia ia no na mea ana i hoike aku ai no lakou; no ka mea, ua hoike oiaio aku la oia no ka lakou hana hewa ana, a me ka lakou hana hoopailua ana; a hoike aku la oia, o na mea ana i ike ai a i lohe ai, a o na mea no hoi ana i heluhelu ai iloko o ka buke, e hoomaopopo ana ia mau mea no ka hiki ana mai o kekahi Mesia, a me ka hoola ia ana no hoi o ko ke ao nei.
20. A lohe ka poe Iudaio i keia mau mea, huhu mai la lakou ia ia; he oiaio, e like me na kaula kahiko, ka poe a lakou i hoolei aku ai, a i hailuku ai, a i pepehi ai; a imi iho la no hoi lakou i kona ola, e lawe aku ia mea. Aka hoi, e hoike aku no wau, o Nepai, ia oukou aia no ke aloha nui o ka Haku maluna o na mea a pau ana i koho ai, no ko lakou manaoio, e hoolilo mai ia lakou i poe ikaika a hiki i ka mana e ola ai.