1. Eia kekahi, ua hoiliili mai la makou i na hua a pau o kela ano o keia ano; o ka hua liilii o kela ano o keia ano.

2. Eia kekahi, i ka noho ana o koʻu makuakane i ka waonahele, olelo mai la oia ia makou, i ka i ana, Aia hoi, ua moe au i ka moe, a ua ike iho wau i ka hihio.

3. Aia hoi, no ka mea aʻu i ike ai, he kumu no koʻu e hauoli ai i ka Haku no Nepai a no Sama no hoi; no ka mea, he kumu no koʻu e manao ai e hoola ia auanei laua a me ka hua a laua he nui wale.

4. Aka hoi, e Lamana a me Lemuela, ke makau nui loa nei au no olua; no ka mea, aia hoi, manao iho la au ua ike au iloko o koʻu moe, i kekahi auakua pouli a eehia.

5. Eia kekahi, ike aku la au i kekahi kanaka ua hoaahu ia oia i kekahi aahu keokeo: a hele mai la oia a ku imua oʻu.

6. A olelo mai la oia iaʻu, a kauoha mai la oia iaʻu e hahai ia ia.

7. Eia kekahi, i koʻu hahai ana ia ia, ike iho la au aia wau iloko o kahi neoneo, pouli, a eehia.

8. A mahope iho o koʻu hele ana no kekahi mau hora iloko o ka pouli, hoomaka iho la au e pule i ka Haku, e aloha mai oia iaʻu, e like me ka nui o kona lokomaikai oluolu.

9. Eia kekahi, mahope iho o kaʻu pule ana i ka Haku, ike aku la au i kekahi aina kula, ua nui a akea hoi.

10. A ike aku la au i kekahi laau, a o kona hua he mea i makemake loa ia e hauoli ai ke kanaka.

11. Eia kekahi, hele aku la au, a ai iho la i kona hua; a ike iho la au ua ono loa ia, mamua o na mea a pau aʻu i hoao ai mamua. He oiaio, a ua ike au i kona hua he keokeo ia, e oi ana mamua o na mea keokeo a pau aʻu i ike ai.

12. A i koʻu ai ana i kona hua, hoopiha mai la ia i koʻu naau me ka hauoli nui loa; no ia mea, ua kupu mai ka makemake iloko oʻu e ai pu no hoi koʻu ohana; no ka mea, ua ike au ua makemake ia oia mamua o na hua e ae a pau.

13. A i ka alawa ana ae o koʻu mau maka i o a ia nei, malia paha e loaa iaʻu koʻu ohua, ike aku la au i kekahi kahawai, e kahe ana ia, a ua kokoke ia i ka laau nona ka hua aʻu i ai ai.

14. A nana aku la au e ike i kona wahi i kahe mai ai; a ike aku la au i ke kumu ona aole mamao aku mai oʻu aku; a ma ua kumu la, ike aku la au i ko oukou makuwahine, ia Saria, a me Sama, a me Nepai; a ku iho la lakou me he mea la aole lakou i ike i ko lakou wahi e hele ai.

15. Eia kekahi, peahi aku la au ia lakou, a olelo aku la no hoi au ia lakou, me ka leo nui, e hele mai lakou ioʻu la, a e ai i ka hua i makemake ia mamua o na hua e ae a pau.

16. Eia kekahi, hele mai la lakou ioʻu la, a ai iho la no hoi i ka hua.

17. A ua makemake au e hele mai no hoi o Lamana a me Lemuela, a e ai no hoi i ka hua; nolaila, alawa ae la au i koʻu mau maka i ke kumu o ke kahawai, malia paha e ike au ia laua.

18. Eia kekahi, ike aku la au ia laua, aole nae laua e hele mai ioʻu la.

19. A ike aku la au i kekahi kookoo hao; e waiho loihi ana ia ma ke kapa o ke kahawai, a hiki mai i ka laau, kahi aʻu i ku ai.

20. A ua ike no hoi au i kekahi ala pololei a ololi, ma ka aoao o ke kookoo hao, a hiki i ka laau kahi aʻu e ku ana; a hiki aku no hoi ia ala ma ke kumu o ke kahawai i kekahi aina kula, ua nui a akea, me he honua okoa la ia;

21. A ike aku la au i na lehulehu o kanaka aole pau i ka helu ia; e lulumi mai ana he nui wale o lakou, e loaa ia lakou ke ala e hiki mai ai i ka laau, kahi aʻu i ku ai.

22. Eia kekahi, hele mai la lakou, a hoomaka ma ke ala e hiki aku ana i ka laau.

23. Eia kekahi, pii mai la he ohu pouli; he oiaio, he ohu nui a pouli, a o ka poe i hoomaka ma ke ala, hili ae la lakou, a auwana aku la, a nalowale iho la lakou.

24. Eia kekahi, ike aku la au i na mea e ae e lulumi mai ana; a hele mai la lakou, a lalau aku la i ka welau o ke kookoo hao; a hooikaika mai la lakou iwaena o ka ohu pouli, a e hoopaa ana i ke kookoo hao, a hiki mai la lakou a ai i ka hua o ka laau.

25. A mahope iho o ko lakou ai ana i ka hua o ka laau, alawa ae la lakou i ko lakou mau maka i o a ia nei, me he mea la ua hilahila lakou.

26. A owau kekahi i alawa ae i koʻu mau maka i o a i o, a ike aku la au ma kela aoao o ke kahawai, i kekahi hale nui a akea; a ku iho la ia me he mea la ma ka lewa, a kiekie maluna o ka honua;

27. A ua piha ia i na kanaka, na mea kahiko a me na mea opiopio, na kane a me na wahine; a o ke ano o ko lakou kapa he maikai loa ia, a e ku ana lakou e hoomaewaewa mai ana, a e kuhikuhi ana me ko lakou manamana lima i ka poe i hiki mai, a e ai ana i ka hua.

28. A mahope iho o ko lakou hoao ana i ka hua, hilahila iho la lakou, no na mea e hoowahawaha ana ia lakou; a haule aku la lakou i na ala i papa ia, a nalowale iho la.

29. Ano hoi, aole au, o Nepai, e olelo aku i na olelo a pau a koʻu makuakane.

30. Aka, i pokole ia ma ka palapala ana, aia hoi, ike aku la oia i na lehulehu e ae e hooikaika ana; a hele mai la lakou a lalau ae la i ka welau o ke kookoo hao; a hooikaika ae la lakou imua, e puili mau ana i ke kookoo hao, a hiki mai la lakou, a hina ilalo, a ai iho la i ka hua o ka laau.

31. A ike no hoi oia i na lehulehu e ae e huli ana i ko lakou ala i ua hale nui la a akea.

32. A eia kekahi, he nui loa ka poe i piholo i ka hohonu o ke kumuwai; a he nui no hoi i nalowale i kona ike aku, e auwana ana ma na alanui e.

33. A he lehulehu ka poe i komo aku iloko o ua hale ano e la. A mahope iho o ko lakou komo ana iloko o ua hale la, ua kuhikuhi mai la lakou me ka manamana lima, e hoowahawaha mai ana iaʻu, a i ka poe no hoi e ai pu ana i ka hua; aka, aole makou i hoolohe ia lakou.

34. O na olelo a koʻu makuakane keia: no ka mea, o ka poe i hoolohe ia lakou, ua haule iho la.

35. A o Lamana me Lemuela aole laua i ai i ka hua, wahi a koʻu makuakane.

36. A mahope iho o ka olelo ana a koʻu makuakane i na olelo a pau o kona moeuhane a o kona hihio, a he nui loa ua mau olelo la, i mai la oia ia makou, no na mea ana i ike ai iloko o ka hihio, ua makau nui loa iho la oia no Lamana laua me Lemuela; he oiaio, ua makau oia o hoolei ia aku laua mai ke alo aku o ka Haku;

37. A hooikaika aku la oia ia laua, me ke aloha nui e like me ka makua lokomaikai, e hoolohe mai laua i kana mau olelo, i aloha mai paha ka Haku ia laua, a e hoolei ole aku ia laua mai ona aku; he oiaio, ao aku la koʻu makuakane ia laua.

38. A mahope iho o kana ao ana aku ia laua, a me kana wanana ana ia laua no na mea he nui, kauoha aku la oia ia laua e malama pono i na kauoha a ka Haku; a hooki ae la oia i ka olelo ana ia laua.