1. Eia kekahi, i mai la ka anela iaʻu, E nana, a e ike aku i kau hua, a me ka hua a kou mau hoahanau! A nana aku la au a ike aku la i ka aina i hai mua ia ai; a ike aku la au i na lehulehu o na kanaka, he oiaio, me he mea la ma ka helu ana, ua like me ke one o ke kai.

2. Eia kekahi, ike aku la au i na lehulehu i houluulu ia e kaua, kekahi i kekahi; a ike aku la au i na kaua, a me na lono o na kaua, a me na luku nui ana me ka pahikaua iwaena o koʻu poe kanaka.

3. Eia kekahi, ike aku la au i na hanauna he nui wale e make ana mamuli o ke ano o na kaua a me na paio ma ka aina; a ike aku la au i na kulanakauhale he nui wale, he oiaio no, aole au i helu i ka nui o lakou.

4. Eia kekahi, ike aku la au i ka ohu o ka pouli maluna o ka ili o ka aina i olelo mua ia ai; a ike au i na uila, a lohe au i na hekili, a me na olai, a i kela ano a i keia ano o ka haalulu nui; a ike aku la au ua naha ka honua a me na pohaku; a ike aku la au i na mauna e hiolo liilii ana; a ike aku la au i na wahi palahalaha o ka aina, ua hoapuupuu ia; a ike aku la au i na kulanakauhale he nui wale, ua poho lakou; a ike aku la au he nui wale o ia mau wahi ua puhi ia i ke ahi; a ike aku la au he nui wale o ia mau wahi ua hiolo i ka honua, no ka haalulu ana ona.

5. Eia kekahi, mahope iho o koʻu ike ana i keia mau mea, ike aku la au i ka uahi o ka pouli, ua mao loa ae mai ka ili aku o ka honua; a ike aku la au i ka lehulehu o na kanaka ua hina iho la, no ka nui a me ka weliweli o na hoopai ana a ka Haku.

6. A ike aku la au i na lani ua hamama, a me ke Keikihipa a ke Akua e iho mai ana mailoko mai o ka lani; a iho ilalo oia a hoike aku la ia ia iho ia lakou.

7. A ike no hoi au a hoike aku, ua haule ka Uhane Hemolele maluna o na mea e ae he umikumamalua; a ua hoolilo ia lakou e ke Akua, a ua wae ia.

8. A olelo mai la ka anela iaʻu, i ka i ana: E nana aku oe i na haumana he umikumamalua a ke Keikihipa, i koho ia e lawelawe i kau poe hua.

9. A i mai la oia iaʻu, Ke hoomanao nei anei oe i na aposetolo he umikumamalua a ke Keikihipa? Aia hoi, o lakou ka poe e hookolokolo i na ohana he umikumamalua o ka Iseraela; nolaila, e hookolokolo ia auanei na aposetolo he umikumamalua o kau poe hua e lakou; no ka mea, no ko ka hale o Iseraela oukou;

10. A o keia mau aposetolo au e ike nei, na lakou e hookolokolo auanei i kau poe hua. A, aia hoi, ua apono ia lakou no ka wa pau ole; no ka mea, no ko lakou manaoio i ke Keikihipa a ke Akua, ua hookeokeo ia ko lakou mau aahu i kona koko.

11. A i mai la ka anela iaʻu, E nana! A nana aku la au, a ike aku la ua make na hanauna ekolu ma ka pono; a ua keokeo ko lakou mau aahu, he oiaio, e like me ke Keikihipa a ke Akua. A i mai la ka anela iaʻu, o lakou nei ua hookeokeo ia i ke koko o ke Keikihipa no ko lakou manaoio iloko ona.

12. A, ike aku la no hoi owau, o Nepai, i na mea he nui wale o ka ha o ka hanauna, ua make ma ka pono.

13. Eia kekahi, ike aku la au i na lehulehu o ka honua i houluulu ia.

14. A i mai la ka anela iaʻu, E nana aku i kau poe hua, a i na hua no hoi a kou mau hoahanau!

15. Eia kekahi, nana aku la au a ike aku la i na kanaka o kaʻu hua i houluulu ia he nui loa, e ku e i na hua a koʻu mau hoahanau; a ua houluulu pu ia lakou e kaua.

16. A olelo mai la ka anela iaʻu, i ka i ana, E nana aku i ke kumu wai o na wai lepo a kou makuakane i ike ai; he oiaio, i ke kahawai ana i olelo ai; a o na wahi hohonu ona oia no na wahi hohonu o gehena;

17. A o na ohu o ka pouli oia no na hoowalewale o ke diabolo, e hoomakapo ana i na maka, a e hoopaakiki ana i na naau o na keiki a kanaka, a e alakai aku ana ia lakou ma na alanui akea, i make lakou, a ua nalowale no lakou;

18. A o ka hale nui a akea a kou makuakane i ike ai, oia na manao kiekie a me ka haaheo o na keiki a kanaka. A na kekahi awawa nui a weliweli i hookaawale ia lakou; oia hoi ka olelo o ka hoopai pololei a ke Akua mau loa, a o ka Mesia, oia ke Keikihipa a ke Akua, a nona ka hoike ana o ka Uhane Hemolele, mai ka hookumu ia ana o ke ao nei a hiki loa i keia wa, a mai keia manawa aku a mau loa aku.

19. A i ka ka anela olelo ana i keia mau olelo, nana aku la au a ike aku la e paio ana na hua a koʻu mau hoahanau ma ke ku e i kaʻu poe hua, e like me ka olelo a ka anela; a no ka haaheo o kaʻu poe hua, a me ka hoowalewale ana o ke diabolo, ike aku la au ua lanakila na hua a koʻu mau hoahanau maluna o kaʻu poe hua.

20. Eia kekahi, ike aku la au i na kanaka o ka hua a koʻu mau hoahanau, ua lanakila lakou maluna o kaʻu poe hua; a hele aku la lakou he poe lehulehu wale maluna o ka ili o ka aina.

21. A ike aku la au ia lakou ua houluulu lehulehu ia; a ike aku la au i na kaua a me na lono o na kaua mawaena o lakou, a iloko o na kaua a me na lono o na kaua ike aku la au i na hanauna he nui i make.

22. A i mai la ka anela iaʻu, Aia hoi, e emi auanei lakou nei iloko o ka hoomaloka.

23. Eia kekahi, ike aku la au mahope iho o ko lakou emi ana iloko o ka hoomaloka, lilo iho la lakou i haulaula a i poe hoopailua ia, a he poe kanaka ekaeka, piha me ka palaualelo a me kela ano a me keia ano o na mea i hoowahawaha ia.