1. A o keia mau mea a pau ka koʻu makuakane i ike ai, a i lohe ai, a i olelo ai, ia ia i noho ai ioko o ka halelewa ma ke awawa o Lemuela, a me na mea e ae no hoi he nui loa, aole i hiki ke kakau ia maluna iho o keia mau papa.

2. Ano hoi, ua olelo no au no keia mau papa, aia hoi, aole maluna o ua mau papa nei aʻu i kakau pau loa ai i ka mooolelo o koʻu poe kanaka; no ka mea, o na papa kahi aʻu i kakau ai i ka mooolelo a pau o koʻu poe kanaka, ua kapa aku au i ka inoa, o Nepai; no ia mea, i kapa ia ai ua mau mea la na papa o Nepai, mamuli o koʻu inoa ponoi; a ua kapa ia keia mau papa no hoi na papa o Nepai.

3. Aka hoi, ua loaa mai iaʻu he kauoha na ka Haku mai, e hana aku au i keia mau papa, no keia kumu wale no, i kahakaha ia ai ka mooolelo no ka lawelawe ana o koʻu poe kanaka ma ka oihana kahuna.

4. A maluna o na papa e ae e kahakaha ia ai he mooolelo o ka noho alii ana o na alii, a me na kaua a me na paio o koʻu poe kanaka; nolaila, o ka hapa nui o keia mau papa no ka hana ma ka oihana kahuna ia; a o ka hapa nui o na papa e ae no ka noho alii ana o na alii, a me na kaua a me na paio o koʻu poe kanaka no ia.

5. No ia mea, ua kauoha mai la ka Haku iaʻu e hana i keia mau papa, no kekahi manao naauao iloko ona; o ua manao la ua ike ole au.

6. Aka, ke ike nei no ka Haku i na mea a pau mai kinohi mai; nolaila, e hoomakaukau no oia i ala, e hooko ai i kana mau hana a pau mawaena o na keiki a kanaka; no ka mea, aia hoi, ia ia no ka mana a pau i ka hooko ana i kana mau olelo a pau. A pela io no. Amene.