1. No ka mea, eia kekahi, mahope iho o koʻu ake ana e ike i na mea a koʻu makuakane i ike ai, a e manaoio ana no au ua hiki i ka Haku ke hoike mai ia mau mea iaʻu, oiai hoi au e noho ana me ka nalu ana iloko o kuu naau, kaili ia aku la au iloko o ka Uhane a ka Haku, i kahi mauna kiekie loa, aʻu i ike ole ai mamua, ma kahi aʻu i ku ole ai koʻu wawae mamua.

2. A i mai la ka Uhane iaʻu, Aia hoi, heaha kau mea e makemake ai?

3. A i aku la au, Ke makemake nei au e ike i na mea a koʻu makuakane i ike ai.

4. I mai la ka Uhane iaʻu, Ke manaoio nei anei oe, ua ike kou makuakane i ka laau ana i olelo aku ai?

5. A i aku la au, Ae, ua ike oe ua manaoio au i na olelo a pau a koʻu makuakane.

6. A pau keia mau olelo i ka olelo ia e au, hooho ae la ka Uhane me ka leo nui, i ka i ana, Hosana i ka Haku, ke Akua kiekie loa; no ka mea, oia ke Akua maluna o ka honua a pau, he oiaio, maluna iho o na mea a pau loa: a pomaikai no oe, e Nepai, no ka mea, ua manaoio oe i ke Keiki a ke Akua kiekie loa; nolaila, e ike no oe i na mea au i makemake ai.

7. Aia hoi, e haawi ia keia mea ia oe i hoailona, mahope iho o kou ike ana i ka laau i hoohua mai ai i ka hua a kou makuakane i hoao ai, e ike no hoi oe i kekahi kanaka e iho mai ana noloko mai o ka lani, a e ike oe ia ia, a mahope iho o kou ike ana ia ia e hoike aku no oe oia no ke Keiki a ke Akua.

8. Eia kekahi, i mai la ka Uhane iaʻu, E nana aku! A nana aku la au a ike aku la i kekahi laau, a ua like ia me ka laau a koʻu makuakane i ike ai; a o ka nani o ua laau nei ua oi loa aku ia, he oiaio, mamua o na nani a pau; a o kona keokeo ua oi aku ia mamua o ke keokeo o ka hau maemae.

9. Eia kekahi, i ka wa aʻu i nana aku ai i ka laau, i aku la au i ka Uhane, Ke ike nei au, ua hoike mai oe iaʻu i ka laau i maikai loa mamua o na mea a pau.

10. A i mai la oia, Heaha kou makemake?

11. I hou aku la au ia ia, E ike i ke ano maopopo o keia mea; no ka mea, ua olelo aku la au ia ia me he kanaka la e olelo ana; no ka mea ua ike aku la au ma ke ano o ke kanaka ia; aka, ua ike nae au o ka Uhane o ka Haku no ia; a olelo mai la oia iaʻu me he kanaka la e olelo pu ana me hai.

12. Eia kekahi, i mai la oia iaʻu, E nana! A nana aku la au me he mea la e nana aku ana ia ia, aole nae au i ike ia ia; no ka mea, ua hala aku la oia mai koʻu alo aku.

13. Eia kekahi, nana aku la au a ike iho la i ke kulanakauhale nui o Ierusalema, a me na kulanakauhale e ae no hoi. A ike aku la au i ke kulanakauhale o Nazareta; a iloko o ke kulanakauhale o Nazareta ike aku la au i kekahi wahine puupaa, a nui loa kona maikai a me kona keokeo.

14. Eia kekahi, ike aku la au i na lani ua hamama, a iho mai la kekahi anela a ku iho la imua oʻu; a i mai la oia iaʻu, E Nepai, heaha kau e ike nei?

15. A i aku la au ia ia, He wahine puupaa, nani loa a maikai mamua o na wahine puupaa e ae a pau.

16. A i mai la ia iaʻu, Ke ike nei anei oe i ko ke Akua hoohaahaa ana ia ia iho?

17. I aku la au ia ia, Ua ike au he aloha kona i kana poe keiki; aole nae au i ike i ke ano o na mea a pau.

18. A i mai la oia iaʻu, Aia hoi, o ka wahine puupaa au e ike nei, o ka makuwahine ia o ke keiki a ke Akua, mamuli o ke ano o ke kino.

19. Eia kekahi, ike aku la au ua kaili ia aku la oia ma ka Uhane; a mahope iho o kona kaili ia ana aku ma ka Uhane no kekahi manawa, olelo mai la ka anela iaʻu, i ka i ana, E nana aku!

20. A nana aku la au, a ike hou aku la i ka wahine puupaa, e hii ana i kahi keiki ma kona mau lima.

21. A i mai la ka anela iaʻu, E nana aku i ke Keikihipa a ke Akua, he oiaio no, i ke Keiki a ka Makua mau loa! Ke ike nei anei oe i ke ano maopopo o ka laau a kou makuakane i ike ai?

22. A pane aku la au ia ia, i ka i ana, Ae, o ke aloha o ke Akua no ia, e ninini ana ia ia iho mawaena o na naau o na keiki a kanaka; nolaila, o ka mea ia i makemake ia mamua o na mea a pau.

23. A olelo mai la oia iaʻu, i ka i ana, He oiaio, a o ka mea ia e olioli loa ai ka naau.

24. A pau kana olelo ana i keia mau olelo, i mai la oia iaʻu, E nana aku! A nana aku la au, a ike aku la i ke Keiki a ke Akua e hele aku ana mawaena o na keiki a kanaka, a ike no hoi au i na mea he nui i hina ilalo ma kona mau wawae, a hoomana aku ia ia.

25. Eia kekahi, ike aku la au, o ke kookoo hao a koʻu makuakane i ike ai, o ka ke Akua olelo no ia, e alakai ana ia i ke kumu wai o na wai ola, a i ka laau o ke ola; a o ua wai nei he mea ia e hoohalike ai i ke aloha o ke Akua; a ua ike no hoi au i ka laau o ke ola, he mea ia e hoohalike ai i ke aloha o ke Akua.

26. A i hou mai la ka anela iaʻu, E nana aku a e ike i ko ke Akua hoohaahaa ana ia ia iho!

27. A nana aku la au a ike aku la i ka Mea Hoola o ko ke ao nei, oia ka mea a koʻu makuakane i olelo mai ai; a ike aku la no hoi au i ke kaula, nana e hoomakaukau i ke ala imua ona. A hele aku la ke Keikihipa a ke Akua a ua bapetizo ia e ia; a mahope iho o kona bapetizo ia ana, ike aku la au i ka lani ua hamama, a iho iho la ka Uhane Hemolele mailoko mai o ka lani, a kau maluna ona me he manu nunu la.

28. A ike aku la au ua hele aku oia e lawelawe ana i na kanaka, ma ka mana a me ka nani nui; a ua hoakoakoa ia na lehulehu e hoolohe ia ia; a ike aku la au ua hoolei aku lakou ia ia maiwaena aku o lakou.

29. A ike no hoi au i na mea e ae he umikumamalua e hahai ana ia ia. Eia kekahi, ua kaili ia aku lakou iloko o ka Uhane, mai koʻu alo aku, aole au i ike ia lakou.

30. Eia kekahi, olelo hou mai la ka anela iaʻu, i ka i ana, E nana aku! A nana aku la au, a ike aku la au i na lani ua hamama hou, a ike au i na anela e iho mai ana maluna o na keiki a kanaka; a lawelawe ae la lakou ia lakou la.

31. A olelo hou mai la oia iaʻu, i ka i ana, E nana aku! A nana au, a ike aku la i ke Keikihipa a ke Akua e hele aku ana iwaena o na keiki a kanaka. A ike aku la au i na kanaka mai he nui loa, a ua loohia i na mai o na ano a pau, a me na daimonio, a me na uhane haumia; a olelo mai la ka anela, a hoike mai la i keia mau mea a pau iaʻu. A ua hoola ia lakou e ka mana o ke Keikihipa a ke Akua; a ua mahiki ia aku na daimonio a me na uhane haumia.

32. Eia kekahi, olelo hou mai la ka anela iaʻu, i ka i ana, E nana aku! A nana au a ike aku la i ke Keikihipa a ke Akua, a ua lawe ia aku e na kanaka; he oiaio, ua hookolokolo ia ke Keiki a ke Akua mau loa e ko ke ao nei; a ua ike au a hoike aku.

33. A ike aku la wau, o Nepai, ua hookiekie ia oia iluna ma ke kea, a pepehi ia iho la no na hala o ko ke ao nei.

34. A mahope iho o kona pepehi ia ana, ike aku la au i na lehulehu o ka honua, ua hoakoakoa ia ae la lakou e kaua aku i na aposetolo a ke Keikihipa; no ka mea, pela i kapa ia ai ka poe umikumamalua e ka anela o ka Haku.

35. A akoakoa ae la ka lehulehu o ka honua; a ike aku la au aia lakou iloko o kekahi hale nui a akea, e like me ka hale a kuu makuakane i ike ai! A olelo hou mai la ka anela o ka Haku, i ka i ana, e nana aku i ko ke ao nei a me ke akamai olaila; he oiaio, E nana aku, ua akoakoa pu ae la ko ka hale o Iseraela e kaua aku i na aposetolo he umikumamalua a ke Keikihipa.

36. Eia kekahi, ua ike au a hoike aku, o ka hale nui a akea, o ka haaheo no ia o ko ke ao nei; a haule iho la ia, a ua nani wale kona haule ana. A olelo hou mai la ka anela o ka Haku iaʻu, i ka i ana, Peia auanei ka luku ia ana o na lahuikanaka, na ohana, na olelo, a me na kanaka a pau, e kaua aku ana i na aposetolo he umikumamalua a ke Keikihipa.