1. A eia kekahi, hoi aku la au, o Nepai, mai kaʻu kamailio pu ana me ka Haku, i ka halelewa o koʻu makuakane.

2. A, olelo mai la oia iaʻu, i ka i ana mai: Aia hoi, ua moe au i ka moe, a ua kauoha mai la ka Haku iaʻu iloko o ua moe la, e hoi aku oe a me kou mau kaikuaana i Ierusalema.

3. No ka mea, aia ia Labana ka mooolelo o ka poe Iudaio, a me ke kuauhau o kou poe kupuna, a ua kahakaha ia ia mau mea maluna o na papa keleawe.

4. Nolaila, ua kauoha mai la ka Haku iaʻu e hele aku oe me kou mau hoahanau i ka hale o Labana; a e imi aku i ka mooolelo, a e lawe mai ia mau mea ilalo nei i ka waonahele.

5. Ano la, ke ohumu nei kou mau kaikuaana, i ka i ana, he mea paakiki kaʻu i noi aku ai ia lakou; aka hoi, aole naʻu i noi aku ia mea ia lakou, aka he kauoha ia na ka Haku mai.

6. Nolaila, ea, o hele, e kaʻu keiki, a e hoopomaikai ia auanei oe e ka Haku, no ka mea, aole oe i ohumu.

7. Eia kekahi, i aku la au, o Nepai, i koʻu makuakane, E hele no au, a e hana iho i na mea a ka Haku i kauoha mai ai, no ka mea, ua ike au aole e haawi ana ka Haku i na kauoha i na keiki a kanaka, ke hoomakaukau ole kela i ala no lakou e hooko pono ai i ka mea ana i kauoha mai ai ia lakou.

8. A lohe aku la koʻu makuakane i keia mau olelo, olioli nui loa iho la oia, no ka mea, ua ike oia ua hoopomaikai ia mai la au e ka Haku.

9. A hele aku la au, o Nepai, me koʻu mau hoahanau, i ka waonahele me ko makou mau halelewa, e pii aku ai i ka aina o Ierusalema.

10. Eia kekahi, a hiki aku la makou i ka aina o Ierusalema, kukakuka pu ae la au me koʻu mau hoahanau, kekahi me kekahi;

11. A hailona iho la makou e ike i ka mea o makou nana e hele aku i ka hale o Labana. A lilo ka hailona ia Lamana; a hele aku la o Lamana iloko o ka hale o Labana, a kamailio pu me ia, ia ia i noho ai iloko o kona hale.

12. A noi aku la oia ia Labana i na mooolelo i kahakaha ia maluna iho o na papa keleawe, maluna olaila ke kuauhau o koʻu makuakane.

13. Eia hoi, huhu iho la o Labana, a kipaku mai la ia ia mawaho, mai kona alo mai; aohe ona makemake e lilo na mooolelo ia ia. No ia mea, olelo mai la oia ia ia, Aia hoi, he powa oe, a e pepehi no au ia oe.

14. Aka, holo mai la o Lamana mawaho, mai kona alo mai, a hai mai la ia makou i na mea a Labana i hana ai. A hoomaka mai la makou e hookaumaha nui loa ia, a aneane koʻu mau hoahanau e hoi i koʻu makuakane la i ka waonahele.

15. Aka hoi, i aku la au ia lakou, Ma ke ola o ka Haku, a ma ko kakou ola hoi, aole kakou e hoi aku i ko kakou makuakane la ma ka waonahele, aia a hooko aku kakou i ka mea a ka Haku i kauoha mai ai ia kakou.

16. No ia mea, e ikaika kakou i ka malama ana i na kauoha a ka Haku; nolaila, e iho aku kakou i ka aina hooilina o ko kakou makuakane, no ka mea, aia hoi, ua waiho oia i ke gula a me ke kala, a ia mea waiwai aku ia mea waiwai aku. A ua hana iho la oia ia mau mea a pau, no na kauoha a ka Haku:

17. No ka mea, ua ike oia e luku ia auanei o Ierusalema no ka hewa o na kanaka.

18. No ka mea, ua hoole aku la lakou i na olelo a na kaula. Nolaila, ina ua noho koʻu makuakane ma ka aina mahope iho o kona kauoha ia ana e holo aku mailoko aku o ka aina, ina ua make no hoi oia. No ia mea, he mea e pono ai nona e holo aku mailoko aku o ka aina.

19. Aia hoi, he mea kupono i ko ke Akua manao e loaa ai ia kakou keia mau mooolelo, i malama pono ai kakou, no ko kakou poe keiki, i ka olelo a ko kakou mau kupuna;

20. A i malama ai no hoi kakou no lakou i na olelo i olelo ia mai ai e na waha o na kaula hemolele a pau, na mea i haawi ia mai ia lakou e ka Uhane a me ka mana o ke Akua, mai ka hoomaka ana o ke ao nei, a hiki loa i keia manawa.

21. Mamuli o ke ano o keia olelo i ao aku ai au i koʻu mau hoahanau, i ikaika lakou i ka malama pono ana i na kauoha a ke Akua.

22. Eia kekahi, iho aku la makou i ko makou aina hooilina, a hoiliili mai la makou i ko makou gula, a me ko makou kala, a me ko makou mau mea maikai.

23. A mahope iho o ko makou hoiliili pu ana i ua mau mea nei, pii hou aku la makou i ko Labana hale.

24. Eia kekahi, hele aku la makou iloko, io Labana la, a nonoi aku la ia ia e haawi mai ia makou i na mooolelo i kahakaha ia maluna iho o na papa keleawe, a no ua mau mea nei e haawi aku ai makou ia ia i ko makou gula, a me ko makou kala, a me ko makou mau mea maikai a pau.

25. A ike mai la o Labana i ko makou waiwai, he nui loa ia, kuko iho la oia mamuli o ua waiwai nei, a kipaku mai la oia ia makou, a kena mai la i kana mau kauwa e pepehi ia makou, i loaa ai ia ia ko makou waiwai.

26. A auhee aku la makou imua o na kauwa a Labana, a no ka pilikia, haalele iho la makou i ko makou waiwai, a lilo iho la ua waiwai nei iloko o na lima o Labana.

27. Eia kekahi, auhee aku la makou i ka waonahele, aole makou i loaa mai i na kauwa a Labana, a pee aku la makou iloko o ka lua o kekahi pohaku.

28. Eia kekahi, huhu mai la o Lamana iaʻu, a i koʻu makuakane no hoi; a pela no hoi o Lemuela, no ka mea, ua hoolohe oia i na olelo a Lamana. No ia mea, olelo mai la o Lamana laua me Lemuela i na olelo hoeha he nui wale ia maua, i ko laua mau kaikaina, a ua hahau mai la laua ia maua me kahi laau.

29. Eia kekahi, i ko laua hahau ana ia maua me kahi laau, aia hoi, hele mai la kekahi anela a ka Haku, a ku ae la imua o laua, a olelo aku la oia ia laua, i ka i ana, No ke aha la olua e hahau nei i ko olua kaikaina i ka laau? Aole anei olua i ike, ua koho aku ka Haku ia ia e lilo i luna maluna o olua, a o keia mea no ka olua hana ino ana? Aia hoi, e pii hou aku no oukou i Ierusalema, a e haawi mai ka Haku ia Labana iloko o ko oukou mau lima.

30. A mahope iho o ka olelo ana a ka anela ia makou, hoi aku la ia.

31. A mahope iho o ka hoi ana o ka anela, hoomaka hou iho la o Lamana laua me Lemuela e ohumu, me ka i ana, Pehea la e hiki ai i ka Haku ke haawi mai ia Labana iloko o ko kakou mau lima? Aia hoi, he kanaka koikoi ia, a e hiki ia ia ke kena aku i na kanaka he kanalima, he oiaio, e hiki no ia ia ke pepehi i na kanaka he kanalima; e no ke aha la e hiki ole ai ia ia ke pepehi mai ia kakou?