1. E haliu mai a e hoolohe i keia, e ko ka hale o Iakoba, ka poe i kapa ia ma ka inoa o Iseraela, a i puka mai hoi noloko mai o na wai o Iuda, ka poe i hoohiki ma ka inoa o ka Haku, a hookaulana i ka inoa o ke Akua o Iseraela; aole nae lakou e hoohiki ma ka oiaio, aole hoi ma ka pono.

2. Aka hoi, ke kapa nei lakou ia lakou iho no ke kulanakauhale hoano, aka aole lakou i hilinai maluna o ke Akua o ka Iseraela, oia ka Haku o na Lehulehu; oiaio, o ka Haku o na Lehulehu kona inoa ia.

3. Aia hoi, ua hai aku la au i na mea mua mai kinohi mai; mai koʻu waha i puka aku ai lakou, a hoike aku la au ia mau mea. Ua hoike hoohikilele aku au i ua mau mea nei.

4. A hana iho la au ia mea no ka mea, ua ike mua au ua paakiki oe, a o kou ai he olona hao, a o kou lae he keleawe;

5. A ua hai aku la au ia oe, mai kinohi mai; mamua o ka hiki ana mai, hoike aku la au ia mau mea ia oe, no ka mea, o olelo auanei oe, Na kuu kii i hana i keia mau mea, a na kuu kii i kalai ia, a na kuu kii i hoohehee ia i kauoha mai ia mau mea.

6. Ua ike oe a lohe hoi i keia a pau; aole anei oukou e kukala aku? A ua hoike au ia oe i na mea hou mai ia manawa, he oiaio, i na mea hoi i huna ia, aole hoi oe i ike ia lakou.

7. Ua hana ia lakou i keia manawa, aole mai kinohou mai; mamua o ka la au i lohe ole ai ia mau mea, ua hai ia lakou ia oe, o olelo auanei oe, Aia, ua ike no wau ia mau mea.

8. Oiaio, aole oe i lohe; he oiaio, aole hoi i ike; he oiaio, mai ia manawa mai, aole i hoohakahaka ia kou pepeiao: no ka mea, ike mua no au e hana ana oe me ka hoopunipuni nui loa, a mai ka opu mai ua kapa ia oe he lawehala.

9. Aka hoi, no koʻu inoa no wau e hoopanee aku ai i koʻu inaina, a no kuu nani e hoomanawanui au ia oe, i hooki ole aku ai au ia oe.

10. No ka mea, aia hoi, ua hoohehee maemae au ia oe; ua koho aku au ia oe ma ka umu o ka popilikia.

11. No koʻu pono iho, he oiaio, no koʻu pono iho, e hana aku ai au i keia; no ka mea, aole au e ae aku e hoohaumia ia koʻu inoa, a, aole au e haawi aku i koʻu nani ia hai.

12. E hoolohe mai oe iaʻu, e ka Iakoba, a me ka Iseraela hoi koʻu mea i hea ia; no ka mea, owau no ia; owau ka mua, a owau no hoi ka hope.

13. No koʻu lima no hoi i hookumu i ka honua, a na kuu lima akau i ana aku i na lani; hea aku no au ia lakou, a ku pu mai la lakou.

14. E hoakoakoa ia oukou iho a pau, a e hoolohe; owai ka mea iwaena o lakou i hai aku ai i keia mau mea ia lakou? Ua aloha ka Haku ia ia, oiaio, a e hooko oia i kana olelo, ana i hai aku ai ma o lakou la; a e hana no oia i kona makemake maluna o Babulona, a e kau no kona lima maluna o ko Kaledea.

15. Penei hoi, wahi a ka Haku: Owau no ka Haku, oiaio, ua olelo aku la au; oiaio, ua hea aku no au ia ia, e kukala, a naʻu no ia i lawe mai nei, a e hoopomaikai no oia i kona hele ana.

16. E hookokoke mai oukou ioʻu nei; mai kinohi mai, aole au i olelo malu; mai kona wa i hai ia ai, i olelo ai au; a ua hoouna mai iaʻu ka Haku ke Akua, a me kona Uhane.

17. A penei wahi a ka Haku kou Hoolapanai, ka Mea Hemolele o Iseraela; ua hoouna aku au ia ia, ka Haku kou Akua, ka mea e ao aku ana ia oe i ka mea e pono ai, ka mea e alakai ana ia oe ma kahi e pono ai oe ke hele, ua hana aku oia ia mea.

18. Ina i hoolohe mai oe i kaʻu kauoha! Ina ua like kou malu me ka muliwai, a o kou pono hoi me na aui o ke kai;

19. Ina ua like no hoi kau hua me ke one; a me na keiki o kou opu me kona iliili; aole e oki ia aku kona inoa, aole hoi e anai ia aku imua oʻu.

20. O haele oukou o Babulona, e holo oukou mai ko Kaledea aku, me ka leo o ke oli e hai aku, e hookaulana aku i keia, e hoolaha i ke kukulu o ka honua; e i aku oukou, ua hoolapanai ka Haku i kana kauwa ia Iakoba.

21. Aole lakou i makewai: alakai ae la oia ia lakou mawaena o na waonahele; hookahe oia i ka wai mailoko mai o ka pohaku no lakou: wawahi no hoi oia i ka pohaku, a huai mai la ka wai.

22. Ua hana iho la oia i keia a pau, a nui ae hoi, aole nae he maluhia no ka poe hewa, wahi a ka Haku.