1. Eia kekahi, olelo mai la ka anela iaʻu, i ka i ana, E nana aku! A nana aku la au a ike aku la i na lahuikanaka a me na aupuni he nui wale.

2. A i mai la ka anela iaʻu, Ke ike nei oe i ke aha? I aku la au, Ke ike nei au i na lahuikanaka a me na aupuni he nui loa.

3. A i mai la oia iaʻu, O lakou nei, oia na lahuikanaka a me na aupuni o ka poe Genetile.

4. Eia kekahi, ike aku la au iwaena o na lahuikanaka o ka poe Genetile i ke kahua o kekahi ekalesia nui.

5. A i mai la ka anela iaʻu, E nana aku i ke kahua o kahi ekalesia i ino loa ia mamua o na ekalesia e ae a pau, o ka mea ia e pepehi ana i ka poe hoano o ke Akua, he oiaio, a e hoeha ana ia lakou, a e nakii ana ia lakou ilalo, e hooauamo ana ia lakou me kekahi auamo hao, a e lawe ana ia lakou ilalo ma ka noho pio ana.

6. Eia kekahi, ike aku la au ia ua ekalesia nui a ino loa la; a ike aku la au o ke diabolo oia ke kahua ona.

7. A ike aku la no hoi au i ke gula, a me ke kala, a me ke kilika, a me ka lole ulaula, a me ka lilina i milo ia a nani, a me ka lole maikai o kela ano keia ano, a ike aku la au i na wahine hookamakama he nui wale.

8. A olelo mai la ka anela iaʻu, i ka i ana, E nana aku i ke gula, a me ke kala, a me ke kilika, a me ka lole ulaula, a me ka lilina i milo ia a nani, a me ka lole maikai, a me na wahine hookamakama, oia ka makemake o ua ekalesia nui a ino loa nei;

9. No ka olelo hoomaikai a ko ke ao nei, i luku ai lakou i ka poe hoano o ke Akua, a lawe ia lakou ilalo ma ka noho pio ana.

10. Eia kekahi, nana aku la au a ike aku la i na kai he nui wale; a hookowa ae la lakou i ka poe Genetile mai ka hua aku a koʻu mau hoahanau.

11. Eia kekahi, i mai la ka anela iaʻu, E nana aku aia no ka inaina o ke Akua maluna o na hua a kou mau hoahanau!

12. A nana aku la au a ike aku la i kekahi kanaka mawaena o ka poe Genetile, ka poe i hookowa ia ai mai na hua aku a koʻu mau hoahanau e na kai he nui loa; a ike aku la au i ka Uhane o ke Akua, ua iho mai la ilalo a hooikaika iho la maluna o ke kanaka; a holo aku la ia maluna o na kai nui, a hiki aku i na hua a koʻu mau hoahanau, ka poe e noho ana iloko o ka aina i olelo mua ia ai.

13. Eia kekahi, ike aku la au i ka Uhane o ke Akua, e hooikaika ana ia maluna o na mea e ae o ka poe Genetile; a holo aku la lakou mailoko ae o ka noho pio ana, maluna o na kai nui.

14. Eia kekahi, ike aku la au i na kanaka he nui loa o ka poe Genetile maluna o ka aina i olelo mua ia ai; a ike aku la au i ka inaina o ke Akua, ua kau ia maluna o na hua a koʻu mau hoahanau; a ua hoopuehu ia lakou imua o ka poe Genetile, a ua hahau ia.

15. A ike aku la au i ka Uhane o ka Haku, maluna ia o ka poe Genetile; a ua hoopomaikai ia lakou, a loaa iho la ia lakou ka aina i hooilina no lakou; a ike aku la au ua keokeo lakou, a nani loa a maikai, e like me koʻu poe kanaka, mamua o ko lakou pepehi ia ana.

16. Eia kekahi, ike aku la owau, o Nepai, i ka poe Genetile, ka poe i hele aku mailoko ae o ka noho pio ana, ua hoohaahaa no lakou ia lakou iho imua o ka Haku; a o ka mana o ka Haku oia pu me lakou;

17. A ike aku la au ua houluulu ia ko lakou poe makua Genetile maluna o ke kai, a maluna o ka aina no hoi, e kaua ku e ia lakou;

18. A ike aku la au o ka mana o ke Akua oia pu me lakou; a o ka inaina o ke Akua maluna no hoi ia o ka poe a pau i houluulu ia aku e kaua ia lakou.

19. A ike aku la wau, o Nepai, ua hoopakele ia aku la ka poe Genetile, ka poe i hele aku mailoko ae o ka noho pio ana, e ka mana o ke Akua, mailoko aku o na lima o na aupuni e ae a pau.

20. Eia kekahi, ike aku la au, o Nepai, ua hoopomaikai ia lakou ma ka aina; a ike aku la au i kekahi buke, a ua halihali ia aku ia iwaena o lakou.

21. A i mai la ka anela iaʻu, Ke ike nei anei oe i ke ano o ka buke?

22. A i aku la au ia ia, Aole au i ike.

23. A i mai la oia, Aia hoi, e puka ana no ia mailoko ae o ka waha o kekahi Iudaio. A ike aku la wau, o Nepai, ia buke; a i mai la oia iaʻu, O ka buke au e ike nei, he mooolelo ia o ka poe Iudaio, a iloko ona i kakau ia ai na berita a ka Haku, ana i hana ai i ko ka hale o Iseraela; a iloko ona no hoi i kakau ia ai na wanana he nui wale a ka poe kaula hemolele; a he mooolelo ia e like me na mea i kahakaha ia maluna iho o na papa keleawe, aka, aole nae he nui e like me ko na papa; ua kakau ia nae iloko ona na berita a ka Haku, ana i hana aku ai i ko ka hale o Iseraela; nolaila, ua nui ka maikai o ia mau mea i ka poe Genetile.

24. A i mai la ka anela o ka Haku iaʻu, Ua ike aku la oe ua puka mai la ka buke mai ka waha mai o kekahi Iudaio; a ia ia i puka mai ai mai ka waha mai o kekahi Iudaio, ua kakau ia iloko ona ka euanelio o ka Haku me ka maopopo, ka mea a na aposetolo he umikumamalua i hoike aku ai; a hoike aku la lakou e like me ka oiaio iloko o ke Keikihipa a ke Akua;

25. Nolaila, puka aku la keia mau mea me ka pololei loa mai ka poe Iudaio aku i ka poe Genetile, e like me ka oiaio iloko o ke Akua;

26. A mahope iho o ka puka ana aku o ia mau mea ma o ka lima la o ka poe aposetolo he umikumamalua a ke Keikihipa, mai ka poe Iudaio aku i ka poe Genetile, ke ike nei oe i ke kahua o kekahi ekalesia nui a ino loa, i hoopailua loa ia mamua o na ekalesia e ae a pau; no ka mea, aia hoi, ua lawe aku la lakou mai ka euanelio aku o ke Keikihipa, i na mea he nui i moakaka a maikai loa; a me na berita no hoi he nui a ka Haku, ka lakou i lawe aku ai;

27. A ua hana iho la lakou i keia mau mea a pau, e hiki ia lakou ke hookahuli ae i na aoao pololei o ka Haku; a e hiki ia lakou ke hoomakapo a ke hoopaakiki i na naau o na keiki a kanaka;

28. Nolaila, ke ike nei oe a mahope iho o ka hiki ana aku o ka buke mawaena o na lima o ka ekalesia nui a ino loa, he nui wale na mea moakaka a maikai loa i lawe ia aku mai ka buke aku, oia ka buke o ke Keikihipa a ke Akua;

29. A pau keia mau mea moakaka a maikai loa i ka lawe ia aku, puka aku la ia i na lahuikanaka a pau o ka poe Genetile; a mahope iho o kona puka ana aku i na aupuni a pau o ka poe Genetile, he oiaio, i kela aoao o na kai nui au i ike ai me ka poe Genetile i holo aku ai mai ka noho pio ana; ke ike nei oe no ka nui o na mea moakaka a maikai i lawe ia aku mailoko aku o ka buke, na mea akaka i ka hoomaopopo ana i na keiki a kanaka, e like me ka moakaka iloko o ke Keikihipa a ke Akua; no keia mau mea i lawe ia aku ai mailoko aku o ka euanelio o ke Keikihipa, he nui loa ka poe i hina, he oiaio, a no ia mea, ua nui loa ko Satana mana maluna iho o lakou;

30. Aka hoi, ke ike nei oe o ka poe Genetile i hele ae mai ka noho pio ana, a i kookiekie ia iluna e ka mana o ke Akua, maluna iho o na lahuikanaka e ae a pau e noho ana ma ka aina i maikai mamua o na aina e ae a pau, oia ka aina a ka Haku ke Akua i berita ai me kou makuakane, e loaa auanei i kona poe hua i aina hooilina no lakou, aole no lakou la e luku loa i ke koena o kau poe hua i hui ia mawaena o kou mau hoahanau;

31. Aole no hoi e ae aku oia i ka poe Genetile e anai loa i na hua a kou mau hoahanau;

32. Aole hoi e ae aku ka Haku ke Akua e noho mau loa ka poe Genetile iloko o ua noho weliweli ana la o ka pouli au e ike nei ia lakou iloko, no ka huna ia ana o na mea moakaka a maikai loa o ka euanelio o ka Keikihipa e ua ekalesia ino loa la, ka mea nona ke kukulu ia ana au i ike ai.

33. Nolaila, wahi a ke Keikihipa a ke Akua, e aloha auanei au i ka poe Genetile, ma ka hoopai ana i ke koena o ko ka hale o Iseraela iloko o ka hoopai nui.

34. Eia kekahi, olelo mai la ka anela o ka Haku iaʻu, i ka i ana, Aia hoi, wahi a ke Keikihipa a ke Akua, mahope iho o koʻu hoopai ana i ke koena o ko ka hale o Iseraela, a o ua koena nei aʻu i olelo ai, oia na hua a kou makuakane; no ia mea, mahope iho o koʻu hoopai ana ia lakou i ka hoopai, a hahau ia aku lakou e ka lima o ka poe Genetile; a mahope iho o ko ka poe Genetile hina nui loa ana, no na mea akaka lea a maikai o ka euanelio o ke Keikihipa i huna ia e ua ekalesia ino loa la, oia ka makuwahine o na wahine hookamakama, wahi a ke Keikihipa; e aloha aku no au i ka poe Genetile i kela la, a no ia mea e hoopuka aku no au ia lakou ma o koʻu mana iho, he nui o koʻu euanelio i akaka a i maikai, wahi a ke Keikihipa;

35. No ka mea, aia hoi, i mai la ke Keikihipa, e hoike aku auanei au iaʻu iho i kau poe hua, a e kakau auanei lakou i na mea he nui aʻu e hana aku ai ia lakou, na mea maopopo a maikai; a mahope iho o ka luku ia ana o kau poe hua a me ka emi ana iloko o ka hoomaloka, a o na hua no hoi a kou mau hoahanau; aia hoi, e huna ia auanei keia mau mea, e puka aku ai i ka poe Genetile, a ma ka haawina a me ka mana o ke Keikihipa e puka aku ai;

36. A iloko o ia mau mea e kakau ia ai koʻu euanelio, wahi a ke Keikihipa, a me koʻu pohaku a me koʻu ola;

37. A pomaikai lakou ka poe e imi ana e hoopuka i koʻu Ziona ma ua la la, no ka mea, ia lakou no auanei ka haawina a me ka mana o ka Uhane Hemolele; a ina e hoomau lakou a hiki i ka hopena, e hookiekie ia ae auanei lakou ma ka la hope, a e hoola ia iloko o ke aupuni mau loa o ke Keikihipa; a o ka mea nana e hoolaha auanei i ka malu, he oiaio, i na olelo o ka hauoli nui, nani wale auanei lakou maluna o na mauna.

38. Eia kekahi, ike aku la au i ke koena o ka hua a koʻu mau hoahanau, a i ka buke no hoi o ke Keikihipa a ke Akua, ka mea i puka mai, mai ka waha mai o ka Iudaio, a ua hele mai la ia mai ka poe Genetile mai, i ke koena o na hua a koʻu mau hoahanau;

39. A mahope iho o ka puka ana mai o ka buke ia lakou, ike aku la au i na buke e ae, i puka mai ai ma ka mana o ke Keikihipa, mai ka poe Genetile mai ia lakou, i ka hoomaopopo ia ana o ka poe Genetile, a me ke koena o na hua a koʻu mau hoahanau, a me ka poe Iudaio no hoi, i hoopuehu ia ai maluna o ka ili a pau o ka honua, ua oiaio na mooolelo hoike a na kaula a o na aposetolo he umikumamalua a ke Keikihipa.

40. A olelo mai la ka anela iaʻu, i ka i ana, E hooiaio auanei keia mau mooolelo hope au i ike ai mawaena o ka poe Genetile, i ka oiaio o na mea mua, oia hoi ka na aposetolo he umikumamalua a ke Keikihipa, a e hoike aku auanei i na mea maopopo a maikai i lawe ia aku mai o ua mau mea aku la; a e hoike aku auanei i na ohana, a me na olelo, a me na lahuikanaka, o ke Keikihipa a ke Akua oia ke Keiki a ka Makua mau loa, a o ka Mea e Ola ai no hoi o ko ke ao nei; a he mea e pono ai no na kanaka a pau e hele mai io na la, i ole, aole e hiki ia lakou ke hoola ia.

41. A he mea e pono ai e hele mai lakou e like me na olelo e hookupaa ia ana e ka waha o ke Keikihipa: a e hoike ia aku auanei na olelo a ke Keikihipa iloko o na mooolelo o kau poe hua, a iloko no hoi o na mooolelo o ka poe aposetolo he umikumamalua a ke Keikihipa; nolaila, e hookupaa ia laua a elua i hookahi; no ka mea, aia no hookahi Akua a hookahi Kahuhipa maluna iho o ka honua a pau;

42. E hiki mai ana ka manawa e hoike aku ai oia ia ia iho i na lahuikanaka a pau, i ka poe Iudaio, a i ka poe Genetile no hoi; a mahope iho o kona hoike ana aku ia ia iho i ka poe Iudaio, a i ka poe Genetile no hoi, alaila, e hoike aku oia ia ia iho i ka poe Genetile, a i ka poe Iudaio no hoi, a e lilo ka poe hope i mua, a o ka poe mua i hope.