1. No ka mea, eia kekahi, olelo mai la ka Haku i koʻu makuakane, iloko o ka moe uhane, a i mai la ia ia, Ua pomaikai no oe, e Lehi, no na mea au i hana ai; a no ka mea, ua kupaa oe, a ua hai aku oe i keia poe kanaka i na mea aʻu i kauoha aku ai ia oe, aia hoi, ke imi nei lakou e lawe aku i kou ola.

2. Eia kekahi, kauoha mai la ka Haku i koʻu makuakane, iloko o ka moe uhane, e lawe aku i kona ohana, a e hele aku iloko o ka waonahele.

3. Eia kekahi, hoolohe io iho la kela i ka olelo a ka Haku, no ia mea, hana no ia e like me ka ka Haku kauoha ia ia.

4. Eia kekahi, hele aku la ia i ka waonahele. A haalele iho la oia i kona hale, a me kona aina hooilina, a me kona gula, a me kona kala, a me kona mau mea maikai, aole ia i lawe aku i kekahi mea me ia, o kona ohana wale no, a me ka ai, a me na halelewa, a hele aku la i ka waonahele;

5. A iho mai la oia ma na palena kokoke i ke kahakai o ke Kai Ula; a hele aku la oia i ka waonahele ma na palena e kokoke ana i ke Kai Ula; a hele aku la no ia i ka waonahele me kona ohana, oia no koʻu makuwahine, o Saria, a me na kaikuaana oʻu, o Lamana, o Lemuela, a me Sama.

6. Eia kekahi, ia makou i hele ai i na la ekolu ma ka waonahele, kukulu iho la oia i kona halelewa ma kekahi awawa ma kapa o kekahi muliwai.

7. Eia kekahi, kukulu iho la ia i kuahu pohaku, a kaumaha aku la ia i mohai i ka Haku, a haawi aku la i ke aloha i ka Haku, i ko kakou Akua.

8. A eia kekahi, kapa aku la oia i ka inoa o ka muliwai o Lamana, a ua kahe aku la ia iloko o ke Kai Ula; a o ke awawa ma na kapa ia e kokoke ana i ka nuku o ua muliwai la

9. A i ka ike ana aku o koʻu makuakane i na wai o ka muliwai e kahe ana ia i ke kumu o ke Kai Ula, olelo mai la oia ia Lamana, i ka i ana, Ina e like oe me keia muliwai e kahe mau ana iloko o ke kumu o ka pono a pau.

10. A olelo aku la no hoi oia ia Lemuela: Ina e like oe me keia awawa, he naueue ole, a ku paa mau i ka malama ana i na kauoha a ka Haku.

11. No ka mea, olelo aku la oia pela no ka ai oolea o Lamana laua me Lemuela; no ka mea, ohumu iho la laua ma na mea he nui e ku e ana i ko laua makuakane, no ka mea, he kanaka ike hihio no ia, a ua alakai mai la ia laua mailoko mai o ka aina o Ierusalema, e haalele aku i ko laua aina hooilina, a me ko laua gula, a me ko laua kala, a me ko laua mau mea maikai, e make ma ka waonahele. A, ua hana no ia i keia, wahi a laua, no na manao lapuwale o kona naau.

12. A pela i ohumu ai o Lamana laua me Lemuela—o laua na keiki mua—e ku e ana i ko laua makuakane. A ua ohumu laua, no ka mea, aole laua i ike i ka hana ana a kela Akua nana laua i hana.

13. Aole hoi i manaoio laua e hiki ke hoopau ia o Ierusalema, kela kulanakauhale nui, e like me na olelo a na kaula. A ua like laua me ka poe Iudaio, e noho ana ma Ierusalema, ka poe i imi e lawe aku i ke ola o koʻu makuakane.

14. Eia kekahi, olelo aku la koʻu makuakane ia laua ma ke awawa o Lemuela, me ka mana, i hoopiha ia me ka Uhane, a haalulu iho la ko laua mau kino imua ona. A hoohilahila aku la oia ia laua, a no ka makau, aole i hiki ia laua ke olelo ku e aku ia ia, no ia mea, hana iho la no laua e like me kana kauoha ia laua.

15. A noho iho la koʻu makuakane iloko o kahi halelewa.

16. Eia kekahi, owau, o Nepai, ua opiopio loa no, ua nui nae ke kino, ua iini ikaika no hoi au e ike i na mea pohihihi o ke Akua, nolaila, ua kahea aku au i ka Haku; eia hoi, ua hele mai la ia ioʻu la, a ua hoopalupalu mai la i koʻu naau, i manaoio au i na olelo a pau i olelo ia mai e koʻu makuakane; nolaila, aole au i ku e aku ia ia e like me oʻu mau kaikuaana.

17. A olelo aku la au ia Sama, e hoike aku ana ia ia i na mea a ka Haku i hoike mai ai iaʻu, ma kona Uhane Hemolele. A ua manaoio oia i kaʻu mau olelo;

18. Aka hoi, aole i hoolohe mai o Lamana laua me Lemuela i kaʻu mau olelo; a kaumaha iho la au no ka paakiki o ko laua mau naau, a ua kahea aku la au i ka Haku no laua.

19. Eia kekahi, olelo mai la ka Haku iaʻu, i ka i ana: Pomaikai no oe, e Nepai, no kou manaoio, ua imi ikaika mai oe iaʻu me ka haahaa o ka naau.

20. A ina e malama pono oe i na kauoha aʻu, e hoopomaikai ia oe, a e alakai ia oe i kekahi aina i olelo mua ia ai; he oiaio, he aina aʻu i hoomakaukau ai no oukou; he oiaio, he aina i makemake ia mamua o na aina e ae a pau.

21. A ina e kipi mai kou mau hoahanau ia oe, alaila e hooki ia aku lakou mai ke alo aku o ka Haku.

22. A ina e malama pono oe i kaʻu mau kauoha, e hoolilo ia auanei oe i luna a i kumu maluna iho o kou mau hoahanau.

23. No ka mea, aia hoi, i ka la a lakou e kipi mai ai iaʻu, e hoopai aku no au ia lakou me kekahi poino nui, a e loaa ole ia lakou ka mana maluna iho o kau hua, ke ole lakou e kipi mai no hoi iaʻu.

24. A ina e kipi mai lakou iaʻu, e lilo auanei lakou la i mea e hahau ai i kau hua, e hooeueu ae ia lakou i ka hoomanao ana iaʻu.