1. Eia kekahi, mahope iho o kaʻu olelo ana aku i koʻu mau hoahanau, aia hoi, i mai la lakou iaʻu, Ua hai mai la oe i na mea paakiki ia makou, i hiki ole ai ia makou ke hoomaopopo.

2. A i aku la au ia lakou, Ua ike au, ua olelo aku la au i na mea paakiki i ku e i ka poe hewa, e like me ka oiaio; a ua hoopono au i ka poe pono, a hoike aku la e hookiekie ia lakou ma ka la hope; no ia mea e manao ana ka poe hewa he mea paakiki ka oiaio, no ka mea, e hou ana ia iloko loa o lakou.

3. A, ano, e koʻu mau hoahanau, ina ua pono oukou a ua ae aku e hoolohe i ka oiaio, a e malama pono ia mea, i hiki ia oukou ke hele me ka pololei imua o ke Akua, alaila, aole oukou e ohumu no ka oiaio, aole hoi e i mai, ke olelo mai nei oe i na mea paakiki i ku e ia makou.

4. A kauleo aku la au, o Nepai, i na hoahanau oʻu, me ka ikaika, e malama pono i na kauoha a ka Haku.

5. Eia kekahi, ua hoohaahaa lakou ia lakou iho imua o ka Haku; a ua loaa iaʻu ka hauoli a me ka lana nui o ka manao no lakou, e hele paha lakou ma na ala o ka pono.

6. Ano, ua olelo ia a ua hana ia keia mau mea a pau, oiai koʻu makuakane i noho ai i ka halelewa, ma ke awawa ana i kapa ai o Lemuela.

7. Eia kekahi, lawe mai la wau, o Nepai, i kekahi o na kaikamahine a Isemaela i wahine naʻu; a lawe ae la no hoi koʻu mau hoahanau i na kaikamahine a Isemaela i mau wahine na lakou; a lawe ae la no hoi o Zorama i ke kaikamahine hanau mua a Isemaela i wahine nana.

8. A pela i hooko ai koʻu makuakane i na kauoha a pau a ka Haku, na kauoha i haawi ia mai ia ia. A owau no hoi, o Nepai, ua hoopomaikai nui loa ia mai au e ka Haku.

9. A eia kekahi, olelo mai la ka leo o ka Haku i koʻu makuakane, ma ka po, a kauoha mai la ia ia, e hele aku ma kona hele ana iloko o ka waonahele, ia la ae.

10. Eia kekahi, i ke ala ana ae o koʻu makuakane i kakahiaka, a hele aku la i ka puka o ka halelewa, ike aku la oia ma ka honua me ke kahaha nui, i kekahi mea poepoe, i hana ia me ke akamai; a he keleawe maikai no ia. A iloko o ua mea poepoe nei kekahi mau manamana elua: a e kuhikuhi ana kekahi i ke ala e hele aku ai makou iloko o ka waonahele.

11. Eia kekahi, ua hoiliili mai la makou i na mea e pono ai no makou e halihali iloko o ka waonahele, a me ke koena o ka makou ai a ka Haku i haawi mai ai ia makou; a ua lawe aku la makou i ka hua o kela ano keia ano, i hiki ia makou ke halihali iloko o ka waonahele.

12. A lawe aku la makou i ko makou mau halelewa, a hele iloko o ka waonahele, i kela aoao o ke kahawai o Lamana.

13. Hele aku la makou no na la eha, ma ka ihu e kokoke ana i ka hema, hikina hema, a kukulu hou iho la makou i ko makou mau halelewa; a kapa aku la makou i ka inoa o ia wahi o Sazera.

14. Eia kekahi, lalau aku la makou i ka makou mau kakaka a me na pua, a hele aku la i ka waonahele, e pepehi holoholona i ai no na ohana o makou; a mahope iho o ko makou pepehi ana i na holoholona i ai no na ohana o makou, hoi hou aku la makou i ko makou mau ohana i ka waonahele, i kahi o Sazera. A hele hou aku la makou i ka waonahele ma ka ihu e like me mamua, e hele ana ma na wahi momona loa o ka waonahele, ma na palena kokoke i ke Kai Ula.

15. A hele aku la makou no na la he nui, me ka pepehi ana i na holoholona i ai ma ke ala, me ka makou mau kakaka a me na pua a makou, a me na ala a me na maa a makou;

16. A hahai aku la makou i ke kuhikuhi ana o ka mea poepoe, a kuhikuhi ia ia makou ma na wahi momona o ka waonahele.

17. A mahope iho o ka makou hele ana i na la he nui loa, kukulu iho la makou i ko makou mau halelewa no kekahi manawa, i hiki ia makou ke hoomaha hou ia makou iho, a e loaa i ai no ko makou mau ohana.

18. Eia kekahi, i koʻu hele ana ae e pepehi holoholona i mea ai, aia hoi, hai iho la au i kaʻu kakaka, i hana ia ai noloko mai o ke kila maikai: a mahope o ka hai ana i kaʻu kakaka, aia hoi, huhu mai la koʻu mau hoahanau iaʻu, no ka haki ana o kaʻu kakaka, no ka mea, aole i loaa ka ai na makou.

19. A hoi hou aku la makou me ka ai ole i ko makou mau ohana. A no ka luhi loa o lakou ma ka hele ana, ua nui ko lakou popilikia no ka nele i ka ai.

20. Eia kekahi, hoomaka iho la o Lamana laua me Lemuela, a me na keikikane a Isemaela, e ohumu nui loa, no ka eha a me na popilikia o lakou ma ka waonahele: a hoomaka iho la no hoi koʻu makuakane e ohumu i ka Haku kona Akua; he oiaio, a ua kaumaha nui loa iho la lakou a pau, a ohumu aku la lakou i ka Haku.

21. Eia kekahi, ua hoopilikia pu ia wau, o Nepai, me koʻu mau hoahanau, no ka haki ana o kaʻu kakaka; a ikaika ole iho la ka lakou mau kakaka, a hoomaka iho la ka popilikia nui, he oiaio, i hiki ole ai ia makou ke loaa ka ai.

22. A olelo aku la au, o Nepai, i koʻu mau hoahanau, no ko lakou hoopaakiki hou ana i ko lakou mau naau, i ka hoohewa ana i ka Haku i ko lakou Akua.

23. Eia kekahi, hana iho la au i kekahi laau i kakaka, a i kekahi laau pololei i pua; nolaila, kahiko iho la au iaʻu iho me ke kakaka a me ka pua, me ka maa a me na ala. A i aku la au i koʻu makuakane, Ihea la wau e hele aku ai, e loaa ka ai?

24. A ninau aku la oia i ka Haku, no ka mea, ua hoohaahaa iho la lakou ia lakou iho no kaʻu olelo; no ka mea, ua olelo aku la au ia lakou i na mea nui ma ka ikaika o koʻu uhane.

25. Eia kekahi, hiki mai la ka leo o ka Haku i koʻu makuakane; a ua ao io ia oia no kona ohumu ana i ka Haku, a ua hoohaahaa ia oia ilalo iloko o ke kaumaha nui.

26. A i mai la ka leo o ka Haku ia ia, E nana aku oe i ka mea poepoe a e ike i na mea i kakau ia ai.

27. A i ka wa a koʻu makuakane i ike ai i na mea i kakau ia maluna o ka mea poepoe, makau iho la ia a haalulu nui iho la; a me koʻu mau hoahanau no hoi, a me na keikikane a Isemaela a me ka makou mau wahine.

28. A ike aku la owau, o Nepai, i na mea kuhikuhi iloko o ka mea poepoe, ua holo laua mamuli o ka manaoio, a me ka hooikaika, a hoolohe a makou i haawi aku ai ia laua.

29. A ua kakau ia no hoi maluna o laua, he palapala hou, a ua maopopo i ka heluhelu aku, e haawi mai ana ia makou i ka ike no na aoao o ka Haku; a ua kakau ia a ua hoololi ia i kela manawa i keia manawa, e like me ka manaoio a me ka hooikaika ana o makou ia ia. A pela kakou e ike nei, ma o na mea uuku la, ua hiki i ka Haku ke hana i na mea nui.

30. Eia kekahi, hele aku la wau, o Nepai, i ka piko o ka mauna, e like me ke kuhikuhi ana i haawi ia mai maluna o ka mea poepoe.

31. A pepehi aku la au i na holoholona hihiu, a loaa iho la ka ai no na ohana o makou.

32. A hoi hou aku la au i ko makou mau halelewa, me ka haawe ana i na holoholona aʻu i pepehi ai; ano la, ia lakou i ike mai ai ua loaa mai iaʻu ka ai, nani wale ko lakou hauoli. A hoohaahaa iho la lakou ia lakou iho imua o ka Haku, a haawi aku la i ke aloha ia ia.

33. Eia kekahi, hele hou aku la makou, e hele ana me ke ala aneane like me kinohou: a mahope iho o ko makou hele ana i kekahi mau la he nui, kukulu hou iho la makou i ko makou mau halelewa, i hiki ia makou ke noho no kekahi manawa.

34. Eia kekahi, make iho la o Isemaela, a ua kanu ia ma kahi i kapa ia ai o Nahoma.

35. A uwe nui iho la na kaikamahine a Isemaela no ka make ana o ko lakou makuakane, a no ko lakou mau popilikia ma ka waonahele, a ohumu aku la lakou me ke ku e i koʻu makuakane, no kona lawe ana ia lakou mailoko mai o ka aina o Ierusalema, me ka i ana, Ua make iho la ko makou makuakane; he oiaio, a ua auwana nui makou ma ka waonahele, a ua loohia makou i ka popilikia nui, ka pololi, ka makewai, a me ka luhi; a mahope iho o keia mau mea eha a pau, e make io auanei makou ma ka waonahele i ka pololi.

36. A pela lakou i ohumu mai ai me ke ku e i koʻu makuakane, a iaʻu no hoi, a ua makemake lakou e hoi hou i Ierusalema.

37. A i ae la o Lamana ia Lemuela, a i na keiki a Isemaela no hoi, Aia hoi, e pepehi kakou i ko kakou makuakane, a me ko kakou hoahanau o Nepai no hoi, ka mea i lawe maluna ona e lilo i luna no kakou, a i kumu ao no hoi ia kakou, i kona mau kaikuaana:

38. Ano, ke i mai nei oia ua olelo pu ka Haku me ia, a ua lawelawe ae la na anela ia ia. Aka hoi, ua ike kakou ke wahahee la oia ia kakou; a ke hai mai la oia i keia mau mea ia kakou, a ke hana mai la oia i na mea nui ma kana hana maalea, i hiki ia ia ke hoopunipuni i ko kakou mau maka, e manao ana paha e hiki ia ia ke alakai aku ia kakou i kekahi waonahele e ae; a mahope iho o kona alakai ana aku ia kakou, ua manao iho la oia e hoolilo ia ia iho i alii a i luna maluna iho o kakou, i hiki ia ia ke hana me kakou e like me kona manao a me kona makemake. A mamuli o keia ano i hooeueu ai koʻu kaikuaana, o Lamana, i ko lakou mau naau ma ka huhu.

39. Eia kekahi, o ka Haku oia pu kekahi me makou, he oiaio, pae mai la ka leo o ka Haku, a olelo mai la i na olelo he nui loa ia lakou, a paipai nui loa mai la ia lakou; a mahope iho o ko lakou paipai ia ana e ka leo o ka Haku, ua pale ae la lakou i ko lakou huhu, a mihi iho la i ko lakou mau hewa, a hoopomaikai hou mai la ka Haku ia makou me ka ai, i ole makou i make.