1. A e kupu mai no ka lala mailoko mai o ke kumu o Iesea, e hua nui mai kekahi oha o kana aa;

2. A maluna ona e kau ai ka Uhane o ka Haku, ka uhane naauao a me ka hoomaopopo ana, ka uhane ao a me ka mana, ka uhane ike a me ka makau i ka Haku;

3. A e hana mai ia ia me ka naau makaukau ma ka malama i ka Haku; aole ia e hoopono ma ka nana ana o kona maka, aole hoi hoopai ma ka lohe o kona mau pepeiao;

4. Aka me ka pololei e hooponopono oia i ka poe hune, a e hoopai me ka pono no ka poe akahai; a e hahau no oia i ka honua me ka laau o kona waha, a e luku no oia i ka poe hewa me ka ha ana o kona mau lehelehe.

5. O ka pono no ke kaei o kona puhaka, a o ka oiaio hoi ke kakoo o kona kikala.

6. E noho pu hoi ka iliohae me ke keikihipa, a e moe pu no ka leopadi me ke keiki kao; o ke keikibipi, a me ka liona hou, a me ka mea i kupalu ia ma kahi hookahi; na ke keiki uuku lakou e alakai.

7. A e ai pu ka bipi wahine me ka bea; a e moe pu ka laua mau keiki; a e ai ka liona i ka mauu maloo me he bipi la.

8. A e paani no ke keiki omo waiu ma ka lua o ka moomake a e kau no ke keiki i ukuhi ia i kona lima ma ka lua o ka moopepeiaohao.

9. Aole lakou e hoeha, aole hoi e luku ma koʻu mauna hoano a pau, no ka mea, e piha auanei ka honua i ka ike i ka Haku, e like me ka moana i uhi ia i ke kai.

10. A ma ia la e puka mai ai kekahi aa no Iese, a e ku auanei ia i hae no na lahuikanaka; a e imi no ka poe Genetile ia ia; a he nani hoi kona hoomaha.

11. A e hiki mai keia i kela la, e hohola hou mai ka Haku i kona lima no ka lua o ka manawa, e hoola i ke koena o kona poe kanaka, i ka poe koe mai Asuria mai, a mai Aigupita mai, a mai Paterosa mai, a mai Kusa mai, a mai Elama mai, a mai Sinari mai, a mai Hamata mai, a mai na mokupuni mai o ke kai.

12. A e kau no oia i hae no na lahuikanaka, a e hoiliili hoi i ka poe aea o ka Iseraela, a e hoakoakoa mai i na mea puehu o ka Iuda mai na kihi eha mai o ka honua.

13. E haalele no ka huahua i ka Eperaima, a e hooki ia aku na enemi o ka Iuda; aole e huahua ka Eperaima i ka Iuda, aole hoi e hoomaau ka Iuda i ka Eperaima.

14. Aka e lele no lakou maluna o na poohiwi o ko Pilisetia i ke komohana; e hao pu no lakou i ka poe o ka hikina; e kau no lakou i ko lakou lima maluna o Edoma a me Moaba; a e hookauwa na keiki a Amona na lakou.

15. A e hoomaloo loa ka Haku i ke kaikuono o ke kai o Aigupita; a me kona makani ikaika e lulu oia i kona lima maluna o ka muliwai, a e hahau no ia ma na kahawai ehiku, a e hele na kanaka i kela aoao me na kamaa maloo.

16. A e hoomakaukau ia he alanui no ke koena o kona poe kanaka, ka poe i koe mai Asuria mai, e like me ka mea i ka Iseraela ma ka la ana i hele mai ai mai ka aina o Aigupita mai.