1. Ka wanana no Babulona, a Isaia ke keiki a Amosa i ike ai.

2. E kau aku oukou i ka hae ma ka mauna kiekie, e hookiekie i ka leo ia lakou, e peahi ka lima, i komo lakou maloko o na pukapa o na alii.

3. Ua kauoha aku au i koʻu poe i hoomaemae ia, ua hea aku hoi i koʻu poe kaulana, no ka mea, aole o kuu ukiuki maluna o na mea e olioli ana ma kuu hanohano.

4. Ka hooho a ka poe ma na mauna e like me ko ka lahuikanaka nui: he wawa nui o na aupuni o ko na aina i hoakoakoa ia: o ka Haku o na Lehulehu e hoolalelale ana ia i na lehulehu o ke kaua.

5. E hele mai ana lakou mai ka aina mamao mai, mai ka welau mai o ka lani, oiaio, o ka Haku, a me na mea hoopai o kona ukiuki, e anai i ka aina a pau.

6. E aoa oukou; no ka mea, ua kokoke mai ka la o ka Haku; e hiki mai ia e like me he luku la mai ka Mea Mana loa mai.

7. Nolaila, e nawaliwali na lima a pau, e maule no na naau a pau o kanaka;

8. A e makau auanei lakou; e loohia lakou i ka eha nui a me ka nahu huakoko; e kahaha no lakou kekahi i kekahi; e like ana ko lakou maka me ka lapalapa ahi.

9. Aia hoi, ka la o ka Haku ke hele mai la, weliweli me ka ukiuki a me ka inaina nui, e hoolilo i ka aina i auakua; a e anai aku oia i ka poe hewa ona a pau loa.

10. No ka mea, o na hoku o ka lani a me na huihui ona, aole e haawi mai i ka malamalama; e hoopoeleele ia ka la i kona hele ana, aole hoi e hoomalamalama mai ka mahina.

11. A e hoopai aku au i ko ke ao nei no ka hewa, a i ka poe lawehala hoi no ko lakou hala; e hooki aku au i ka manao kiekie o ka poe hookano, a e hoohaahaa au i ka haakei o ka poe weliweli.

12. E hana aku au a minamina loa he kanaka mamua o ke gula maemae; oia, he kanaka mamua o ka pauku gula o Opira.

13. Nolaila, e hoonaueue au i na lani, a e neenee aku ka honua mai kona wahi aku, no ka inaina o ka Haku o na Lehulehu, a i ka la o kona ukiuki wela.

14. A e like auanei ia me ke dia i hahai ia, a me he hipa la hoi aohe kanaka e hapai ae; e huli kela mea keia mea i kona poe kanaka iho, a e holo no kela mea keia mea i kona aina iho.

15. E hou ia kela mea hookano keia mea hookano; oiaio, a e haule ma o ka pahikaua la, kela mea keia mea i hui pu ia me ka poe hewa.

16. E ulupa ia hoi ka lakou poe keiki imua o ko lakou mau maka; e hao ia ko lakou mau hale, a e moe wale ia ka lakou mau wahine.

17. Aia hoi, e hoala no au i ko Media e ku e ia lakou, i ka poe manao ole i ke kala a me ke gula, aole hoi lakou e lealea ma ia mea.

18. Na ko lakou mau kakaka e ulupa i na kanaka ui, aole lakou e aloha i ka hua o ka opu; aole e menemene na maka i na keiki uuku.

19. A o Babulona, ka nani o na aupuni, ka nani hoi o ko Kaledea hanohano, e like auanei ia me ka wa a ke Akua i hookahuli ai ia Sodoma a me Gomora.

20. E kanaka ole ana ia mai ia wa aku, aole hoi e noho ia mai ia hanauna aku ia hanauna aku; aole hoi e kukulu ka Arabia i halelewa malaila; aole hoi e hoomoe na kahuhipa i ko lakou poe hipa malaila;

21. Aka malaila no e moe ai na holoholona hihiu o ka waonahele; a e piha ko lakou mau hale i na holoholona aoa; a e noho no na pueo malaila, a e haa wale na mea ino malaila.

22. A e uwo na holoholona hihiu o na mokupuni ma ko lakou mau hale neoneo, a me na moo ma ko lakou mau hale alii nani; ua kokoke mai no kona manawa, aole hoi e hooloihi ia kona la. No ka mea, e luku koke aku au ia ia; oiaio, e aloha au i koʻu poe kanaka aka e make loa ka poe hewa.