1. Aka hoi, he nui loa ka poe ma ua la la, iaʻu e hoomaka ai e hana i kekahi hana kupanaha iwaena o lakou, i hoomanao ai au i na berita aʻu i hana aku ai i na keiki a kanaka, i hohola hou ai au i koʻu lima i ka lua o ka manawa e hoola i koʻu poe kanaka, o ko ka hale o Iseraela;

2. A i hoomanao ai no hoi au i na olelo hoopomaikai aʻu i hana aku ai ia oe, e Nepai, a i kou makuakane no hoi, naʻu e hoomanao i ka oukou hua; a e puka aku no na olelo a ka oukou hua noloko aku o koʻu waha i ka oukou hua. A e ha aku na olelo aʻu i na kihi o ka honua, i hae no koʻu poe kanaka, o ko ka hale o Iseraela.

3. A no ka ha ana aku o na olelo aʻu, e olelo aku no he nui o ka poe Genetile, He baibala, he baibala, he baibala no ko makou, aole i hiki mai i baibala hou.

4. Aka penei wahi a ka Haku, ke Akua: E na mea naaupo, e loaa no ia lakou he baibala; a e puka aku ia mai ka poe Iudaio ae, koʻu poe kanaka berita kahiko. A heaha ka hoomaikai a lakou i hoomaikai aku ai i ka poe Iudaio no ka baibala a lakou i loaa ai mai o lakou mai? Oiaio, heaha la ke ano o ka ka poe Genetile? Ke hoomanao nei anei lakou i ka hele ana, a i ka luhi, a i na eha o ka poe Iudaio, a me ko lakou molowa ole iaʻu, i ka hoopuka ana aku i ke ola i ka poe Genetile?

5. E, oukou ka poe Genetile e, ua hoomanao anei oukou i ka poe Iudaio, koʻu poe kanaka berita kahiko? Aole; aka ua hoomainoino aku oukou ia lakou, a ua inaina aku oukou ia lakou, aole hoi oukou i imi e hoihoi ia lakou. Aka hoi, e hoihoi no au i keia mau mea a pau maluna o ko oukou mau poo iho; no ka mea, owau ka Haku, aole au i hoopoina i koʻu poe kanaka.

6. E ka mea naaupo, e i mai auanei, He baibala, he baibala no ko makou, aole pono e loaa hou he baibala. Ua loaa anei ia oukou he baibala, ke ole ia ma o ka poe Iudaio la!

7. Aole anei oukou i ike he nui ae na lahuikanaka, aole hookahi wale no? Aole anei oukou i ike ua hana owau ka Haku ko oukou Akua, i na kanaka a pau, a ke hoomanao nei au i ka poe e noho ana maluna o na mokupuni o ke kai; a ke noho alii nei au ma na lani iluna, a ma ka honua ilalo; a ke hoopuka nei au i kaʻu olelo i na keiki a kanaka, oiaio, maluna iho o na lahuikanaka a pau o ka honua?

8. Nolaila, no ke aha la oukou e ohumu nei, no ka loaa hou ana ae kaʻu olelo ia oukou? Aole anei oukou i ike o ka olelo hoike a na lahuikanaka elua, he hoike ia ia oukou noʻu, owau no ke Akua, a ke hoomanao nei no hoi au i kekahi lahui e like me kekahi? No ia mea, ke olelo nei au i na olelo like i kekahi lahui me kekahi. A ia laua e holo like ai, e holo like no hoi ka laua hoike ana.

9. A ke hana nei au i keia i hooiaio aku ai au i na kanaka he nui loa, oia mau no au, inehinei, a i keia la, a i ka wa pau ole; a e olelo aku au i kaʻu mau olelo e like me koʻu makemake iho. A no kaʻu olelo ana aku i kekahi olelo, aole o oukou pono e manao ua hiki ole iaʻu ke olelo hou i kekahi; no ka mea, aole i pau kaʻu hana i keia manawa; aole hoi e pau auanei, a hiki i ka hope o kanaka; aole hoi mai ia manawa aku a mau loa aku.

10. Nolaila, no ko oukou loaa ana he baibala, mai manao oukou eia iloko ona kaʻu mau olelo a pau; mai manao hoi oukou ua kauoha ole au i na mea hou e palapala ia ai;

11. No ka mea, ke kauoha aku nei au i na kanaka a pau, ma ka hikina, a ma ke komohana, a ma ka akau, a ma ka hema, a ma na mokupuni o ke kai, e palapala lakou i na olelo aʻu e olelo aku ai ia lakou; no ka mea, noloko mai o na buke e palapala ia, e hookolokolo no au i ko ke ao, i kela kanaka i keia kanaka e like me kana hana, e like me ka mea i palapala ia.

12. No ka mea, aia hoi, e olelo aku au i ka poe Iudaio, a e kakau lakou ia mea; a e olelo aku no hoi au i ko Nepai poe, a e kakau no lakou ia mea; a e olelo no hoi au i na ohana e ae o ka hale o Iseraela, aʻu i alakai aku ai, a e kakau no lakou ia mea; a e olelo aku au i na lahuikanaka a pau o ka honua, a e kakau no lakou ia mea.

13. A e loaa no i ka poe Iudaio na olelo a ko Nepai poe, a e loaa i ko Nepai poe na olelo a ka poe Iudaio; a o ko Nepai poe a me ka poe Iudaio e loaa no ia lakou na olelo a na ohana nalowale o ka Iseraela; a e loaa no i na ohana nalowale o ka Iseraela na olelo a ko Nepai poe a me ka poe Iudaio.

14. Eia kekahi, e houluulu ia koʻu poe kanaka o ka hale o Iseraela, i ko lakou wahi i ko lakou aina hooilina; a e houluulu ia no hoi kaʻu olelo i hookahi. A e hoike no au ia lakou, i ka poe i paio i kaʻu olelo a i koʻu poe kanaka o ko ka hale o Iseraela, owau no nei ke Akua, a ua berita no au me Aberahama, e hoomanao i kana hua a mau loa aku.