1. No ka mea, e aloha mai no ka Haku i ka Iakoba, a e wae auanei i ka Iseraela, a e hoonoho ia lakou ma ko lakou aina iho; a e hui pu ia auanei na malihini me lakou, a e hoopili lakou i ko ka hale o Iakoba.

2. A e lawe na lahuikanaka ia lakou, a e hoihoi ia lakou i ko lakou wahi iho; oiaio, mai kahi loihi mai i na welau o ka honua: a e hoi hou no lakou i ko lakou mau aina i hai mua ia ai. A e noho no ko ka hale o ka Iseraela ma ia mau wahi, a o ka aina o ka Haku e lilo ia no na kauwakane a me na kauwawahine; a e lawe pio lakou ia lakou la, i ka poe i hoopio ai ia lakou; a e noho alii lakou maluna o ka poe nana lakou i hookaumaha.

3. Eia kekahi ma ia la, e hoomaha mai ai ka Haku ia oe, mai kou pilikia mai, mai kou makau mai, a mai ka hana kaumaha mai i kau ia maluna ou.

4. A e hiki io mai keia ma ia la, e hapai ai oe i keia olelo ao e ku e i ke alii o Babulona, a e i aku, Nani ka pau ana o ka mea nana i hookaumaha, ka pau ana o ke kulanakauhale gula!

5. Ua uhaki o ka Haku i ke kookoo o ka poe hewa, a i na kookoo alii o na luna.

6. O ka mea nana i hahau i na kanaka me ka huhu a me ka hahau ana hoomaha ole, o ka mea i noho alii maluna o ko na aina me ka huhu, ua hoomaau ia ia, aohe mea e hooki.

7. Ua malu ka honua a pau, ua maha no; ke hookani mai nei lakou i ka olioli.

8. Oiaio, hoaikola na laau kaa ia oe, a me na kedera hoi o Lebanona, i ka i ana, Mai kou wa i moe ai ilalo, aohe mea i pii mai e kua mai ia makou.

9. Ua pihoihoi ka po malalo nou, e halawai me oe i kou hiki ana aku; nou no ia e hoea mai ai i na mea make, oia, i na mea kiekie a pau o ka honua; ua hooku ae la hoi ia iluna i na alii a pau o na lahuikanaka, mai ko lakou noho alii mai.

10. E olelo mai lakou a pau ia oe, a e i ae, Ua lilo anei oe hoi i nawaliwali e like me makou? Ua hoohalike ia anei oe me makou?

11. Ua hoopoho ia kou hanohano ilalo i ka lua kupapau; ua lohe ole ia ke kani ana o kou mau viola; ua hohola ia na ilo malalo iho ou, a ke uhi mai nei no hoi na ilo ia oe.

12. Auwe kou haule ana mai ka lani mai, e Lucifera, ke keiki a ke kakahiaka! Ua kua ia oe ilalo i ka honua, ooe ka mea i hoonawaliwali i ko na aina!

13. No ka mea, ua olelo no oe iloko o kou naau, E pii no wau i ka lani, e hookiekie no wau i koʻu noho alii maluna o na hoku o ke Akua; e noho no wau ma ka mauna o ka halawai ana, ma na aoao o ke kukulu akau;

14. E pii aku no wau maluna o kahi kiekie o na ao; e like ana au me ka Mea kiekie loa.

15. Aka e hoohaahaa ia oe ilalo i ka po, i na aoao o ka lua.

16. O ka poe e ike aku ia oe, e haka pono lakou ia oe, a e makaikai aku no ia oe, a e olelo iho, O keia anei ke kanaka nana i hoonaueue i ka honua, a hooluliluli hoi i na aupuni,

17. Nana i hoolilo i ka honua me he waonahele la, a anai hoi i kona poe kulanakauhale, a wehe ole i ka hale o kona poe pio?

18. O na alii a pau o na aina, oia, o lakou a pau, maloko o ka nani e moe nei, o kela mea keia mea ma kona hale iho.

19. Aka ua hoolei ia aku ka oe mawaho o kou lua kupapau me he lala la i hoopailua ia, a o ke koena o ka poe i pepehi ia, i hou ia i ka pahikaua, i hele ilalo i na pohaku o ka lua; me he kupapau la i hahi ia malalo iho o na kapuai.

20. Aole oe e huipu ia me lakou ma ke kanu ana, no ka mea, ua hooki loa oe i kou aina iho, a luku hoi i kou poe kanaka; aole e kaulana na mamo o ka poe hana hewa a i ke ao pau ole.

21. E hoomakaukau i ka make no kona poe keiki no ka hewa o na makua o lakou; i ole lakou e ku mai, aole hoi e komo i ka aina, i hoopiha ole lakou i ka ili o ke ao nei i na kulanakauhale.

22. Naʻu no e ala ae iluna e ku e ia lakou, wahi a ka Haku o na Lehulehu, a e hooki loa mai Babulona aku i ka inoa, a me ke koena, a me ke keiki, a me ke keikikane o na hoahanau, wahi a ka Haku.

23. E holilo aku hoi au ia wahi no ke kipoda, a no na kiowai; a e kahili au ia ia me ke kahili o ka make, wahi a ka Haku o na Lehulehu.

24. Ua hoohiki mai ka Haku o na Lehulehu, i ka i ana, Me kaʻu i manao ai, pela io no ia; o kaʻu e noonoo ai, oia ke kupaa;

25. I lawe au i ko Asuria i koʻu aina, a maluna o koʻu kuahiwi e hahi au ia ia malalo iho o ke kapuwai; alaila, e haalele kona auamo mai o lakou aku, a e haalele hoi kona mea kaumaha mailuna aku o ko lakou mau poohiwi.

26. Oia ka manao i manao ia ai no ka honua a pau; a oia ka lima i o ia mai maluna o na lahuikanaka a pau.

27. No ka mea, ua holo ka manao o ka Haku o na Lehulehu, a owai la ka mea hiki ke hoole? Ua o ia mai kona lima, a owai la ka mea e hoihoi aku ia mea?

28. I ka makahiki i make ai o ke alii o Ahaza keia wanana.

29. Mai olioli oe, e Palesetina a pau, no ka haki ia ana o ka laau i hahau ia oe; no ka mea, mailoko mai o ke aa o ka nahesa e puka mai ai ka moopepeiaohao, a o kana hua hoi he moolele ia.

30. A e ai no ka makahiapo o ka poe hune, a e moe no ilalo ka poe nele me ka maluhia; a e hoomake no au i kou aa me ka wi, a e luku oia i kou koena.

31. E aoa, e ka pukapa; e uwe aku, e ke kulanakauhale; ua hehee oe, e Palesetina a pau; no ka mea, e hele mai auanei he uwahi mai ka akau mai, aole kekahi mea i hele oia wale i kona manawa koho ia.

32. Heaha la e pane aku ai ia manawa na elele o ko na aina? Ua hookumu o ka Haku ia Ziona, a e paulele no ka poe hune o kona poe kanaka iloko ona.