1. Ano, ke hooki nei au, o Nepai, i kaʻu wanana ana ia oukou, e oʻu poe hoahanau i aloha. A he mau mea kakaikahi wale no kaʻu i hiki ai ke palapala, aʻu i ike ai e hiki io mai ana; a he mau olelo kakaikahi wale no hoi, i hiki iaʻu ke palapala o na olelo a koʻu kaikaina o Iakoba.

2. Nolaila, ea, ua lawa iaʻu na mea aʻu i palapala ai, koe he mau olelo kakaikahi naʻu e olelo aku, no ke ao ana a Kristo; nolaila, e olelo aku au ia oukou me ka maopopo e like me ka maopopo o kaʻu wanana ana.

3. No ka mea, ke hauoli nei koʻu naau iloko o na mea maopopo; a mamuli o keia ano ke hana la ka Haku ke Akua mawaena o na keiki a kanaka. No ka mea, ke haawi mai nei ka Haku ke Akua i malamalama i ka naau; no ka mea, ke olelo mai la oia i na kanaka e like me ka lakou olelo, i ko lakou hoomaopopo ana.

4. Nolaila, ua makemake au e hoomanao oukou ua olelo aku au ia oukou, no kela kaula a ka Haku i hoike mai ai iaʻu, ka mea e bapetizo aku auanei i ke Keikihipa a ke Akua, o ka mea nana e lawe aku i na hewa o ko ke ao nei.

5. Ano, ina he mea e pono ai no ke Keikihipa a ke Akua, a he mea hemolele no hoi ia, ke bapetizo ia me ka wai, e malama ai i ka pono a pau, ea, he nui aku keia mea e pono ai no kakou, he poe hemolele ole, ke bapetizo ia, he oiaio, me ka wai.

6. Ano, ke makemake nei au e niele ia oukou, e koʻu poe hoahanau, ma ka mea hea i malama ai ke Keikihipa a ke Akua i ka pono a pau, i kona bapetizo ia ana me ka wai?

7. Aole anei oukou i ike ua hemolele ia? Aka me kona hemolele no, ke hoike mai la nae oia i na keiki a kanaka, e hoohaahaa ana oia ia ia iho ma ke kino imua o ka Makua, a e hoike ana i ka Makua e hoolohe ana oia ia ia, ma ka malama ana i kona mau kanawai;

8. Nolaila, mahope iho o kona bapetizo ia ana me ka wai, iho iho la ka Uhane Hemolele maluna ona ma ke ano o kahi manu nunu.

9. A, eia hou, e hoike mai ana keia mea i na keiki a kanaka i ka ololi o ke ala, a me ka pilikia o ka puka kahi e komo ai lakou, ua hana oia ia mea i kumu hoohalike imua o lakou.

10. A i aku la oia i na keiki a kanaka, E hahai mai oukou iaʻu. Nolaila, e oʻu poe hoahanau i aloha ia, e hiki anei ia kakou ka hahai ia Iesu, ke ae ole aku kakou e malama i na kauoha a ka Makua?

11. A i mai la ka Makua, E mihi oukou, e mihi oukou, a e bapetizo ia ma ka inoa o ke Keiki punahele.

12. Aia hoi, hiki mai la no hoi ka leo o ke Keiki iaʻu, i ka i ana, O ka mea e bapetizo ia ma koʻu inoa, ia ia e haawi mai ai ka Makua i ka Uhane Hemolele, e like me au nei; no ia mea, e hahai oukou iaʻu, a e hana i na mea a oukou i ike mai ai iaʻu e hana ana.

13. Nolaila, e koʻu poe hoahanau i aloha ia, ua ike au ina e hahai oukou i ke Keiki, me ka manao ikaika o ka naau, e hana ole ana i ka hookamani, aole hoi i ka hoopunipuni imua o ke Akua, aka me ka manao oiaio, e mihi ana i ko oukou mau hala, e hoike ana i ka Makua, e ae ana oukou e lawe maluna iho o oukou i ka inoa o Kristo, ma ka bapetizo ia ana; oiaio, ma ka hahai ana i ko oukou Haku a me ko oukou Mea e Ola ai ilalo iloko o ka wai, e like me kana olelo; aia hoi, alaila e loaa ai ia oukou ka Uhane Hemolele; oiaio, alaila e hiki mai ai ka bapetizo ana o ke ahi a me ka Uhane Hemolele; alaila e hiki ai ia oukou ke olelo aku me ka olelo a na anela, a e hooho i ka hoolea ana i ka Mea Hemolele o ka Iseraela.

14. Aka hoi, e koʻu poe hoahanau i aloha ia, penei i hiki mai ai ka leo o ke Keiki iaʻu, i ka i ana, Mahope iho o ko oukou mihi ana i ko oukou mau hala, a hoike ana aku i ka Makua e ae ana oukou e malama i kaʻu mau kauoha, ma ka bapetizo ana o ka wai, a loaa ana ka bapetizo ana o ke ahi a me ka Uhane Hemolele, a i hiki ke olelo me ka olelo hou, oiaio, me ka olelo a na anela, a mahope iho o keia ina e hoole mai iaʻu, ua aho ia no oukou, ina ua ike ole oukou iaʻu.

15. A lohe ae la au i kahi leo mai ka Makua mai, i ka i ana, Oiaio, o na olelo a koʻu mea hiwahiwa ua oiaio a ua pololei. O ka mea e hoomau ana a hiki i ka hopena, e hoola ia oia.

16. Ano, e oʻu poe hoahanau i aloha ia, ua ike au ma keia, i ole e hoomau ke kanaka a hiki i ka hopena, i ka hahai ana i ke kumu hoohalike o ke Keiki a ke Akua ola, aole e hiki ia ia ke hoola ia.

17. Nolaila, e hana oukou i na mea aʻu i hai aku ai ia oukou aʻu i ike ai, i na mea a ko oukou Haku, ka Mea Hoolapanai, e hana ai auanei; no ka mea, no keia mea ua hoike ia mai la ia mau mea iaʻu, i ike ai oukou i ka puka kahi a oukou e komo ai. No ka mea, o ka puka kahi a oukou e komo ai, oia no ka mihi, a me ka bapetizo ia ana me ka wai; alaila e hiki mai ai ke kala ia ana o ko oukou mau hala i ke ahi, a i ka Uhane Hemolele hoi.

18. Alaila aia oukou iloko o ke ala ololi a pololei e hiki aku ai i ke ola mau loa; oiaio, ua komo oukou iloko ma ka puka; ua hana oukou e like me na kauoha a ka Makua a me ke Keiki; a ua loaa ia oukou ka Uhane Hemolele, ka mea e hoike ana no ka Makua a me ke Keiki, i ka hooko ana i ka olelo hoopomaikai ana i haawi mai ai, ina e komo oukou ma ke ala, e loaa ai ia oukou.

19. Ano, e na hoahanau i aloha ia oʻu, mahope iho o ko oukou komo ana iloko o keia ala pololei a ololi, ke ninau nei au, Ua pau anei ka hana? Aia hoi, ke i aku nei au ia oukou, aole; aole oukou i hiki i keia wahi, i ole ma o ka olelo la a Kristo, me ka manaoio naueue ole ia ia, e hilinai loa ana maluna iho o na hana maikai a ka Mea mana e ola ai;

20. Nolaila, e holo ikaika oukou e pono ai me ke kupaa iloko o Kristo, me ka nani loa o ka manaolana, a me ke aloha i ke Akua a i na kanaka a pau. Nolaila, ina e holo ikaika oukou e ahaaina ana ma na olelo a Kristo, a hoomau a hiki i ka hopena, aia hoi, wahi a ka Makua, E loaa ia oukou ke ola mau loa.

21. Ano, aia hoi, e na hoahanau i aloha ia oʻu, oia no ke ala; aole kekahi ala e ae, aohe hoi kekahi inoa e ae i haawi ia malalo iho o ka lani, i mea e ola ai ke kanaka iloko o ke aupuni o ke Akua. Ano, aia hoi, o ke ao ana a Kristo no keia, a oia wale no ke ao oiaio ana o ka Makua, a o ke Keiki, a o ka Uhane Hemolele, oia hookahi Akua, me ka hopena ole. Amene.