1. No ka mea, aia hoi, o ka Haku, ka Haku o na Lehulehu, e lawe ana ia i na kookoo a pau mai ko Ierusalema aku, a mai ko Iuda aku, i ke kookoo a pau o ka ai, a me ke kookoo a pau o ka wai,

2. I ka mea ikaika, a me ke kanaka koa, i ka lunakanawai, a me ke kaula, i ka mea akamai, a me ka mea kahiko,

3. I ka lunakanalima, a me ke kanaka koikoi, i ke kakaolelo, a me ka mea i ike i na hana, i ka mea no hoi i akamai ma ka olelo.

4. E haawi no au i na kamalii ia lakou e lilo i na alii no lakou, e noho alii no na keiki ai waiu maluna o lakou.

5. E hookaumaha ia na kanaka, kekahi e kekahi, a kela mea keia mea hoi e kona hoa; e hookiekie no ke keiki maluna o ka mea kahiko, a me ka mea i hoowahawaha ia maluna o ka mea hanohano.

6. I ka wa a ke kanaka e lalau ai i kona hoahanau o ka hale o kona makuakane, a e i aku, ea, he aahu no kou, e noho alii oe maluna o makou, a e hiki ole mai hoi keia poino malalo iho o kou lima;

7. Ia la la, e hoohiki ai oia, i ka i ana, Aole au e noho i mea hoola; no ka mea, aohe ai ma koʻu hale, aole hoi he mea aahu; mai hoonoho iaʻu i alii maluna o na kanaka.

8. No ka mea, ua poino o Ierusalema, a ua haule o Iuda; no ke ku e o ko lakou alelo a me ka lakou hana i ka Haku, e hoonaukiuki aku i na maka o kona nani.

9. O ka hoike ia ana o ko lakou mau helehelena ka i hoike kue ia lakou, a ke hai aku nei no hoi lakou i ko lakou hewa e like me Sodoma, a ua hiki ole ia lakou ke huna ia mea. Auwe ko lakou poe uhane! No ka mea, ua haawi lakou i ka hewa i uku no lakou iho.

10. E olelo aku i ka poe pono pono, e pomaikai lakou; no ka mea, e ai no lakou i ka hua o ka lakou hana ana.

11. Auwe ka poe hewa! No ka mea, e make no lakou; no ka mea, maluna o lakou ka uku o ko lakou mau lima.

12. A o koʻu poe kanaka, o na kamalii ko lakou poe hooluhi a o na wahine ka i noho alii maluna o lakou. E kuu poe kanaka, o ka poe na lakou oe i alakai, ke hoolalau nei ia oe, a ke hoopau nei lakou i kou mau alanui.

13. Ke ku nei o ka Haku e hoakaka mai, a ke ku nei iluna e hookolokolo i na kanaka.

14. E hele mai ana no ka Haku e hookolokolo i na mea kahiko o kona poe kanaka, a me ko lakou poe alii; no ka mea, ua ai a pau oukou i ka pawaina, aia hoi, ma ko oukou hale ka waiwai kaili wale ia o ka poe hune.

15. Pehea la ke ano o ka oukou hana? Ke okaoka liilii nei oukou i koʻu poe kanaka, a kui a wale i na maka o ka poe hune, wahi a ka Haku, ke Akua o na Lehulehu.

16. Eia hoi, ua olelo mai la ka Haku, no ka lanahaakei o na kaikamahine o Ziona, a hele me ka oeoe o na ai a me ka makaleho hilahila ole, he hele hooioi ko lakou hele, a e kanikani ana me ko lakou mau wawae;

17. Nolaila, e hahau no ka Haku i na pikopoo o na kaikamahine o Ziona me ka eha, a e hoike no ka Haku i ko lakou wahi huna.

18. Ia la la e lawe aku ai no ka Haku i ka maikai o ko lakou mau mea kanikani e nani ai, a me na upena papale oho, a me na lei i poepoe e like me ka mahina,

19. I na kaula nani a me na kupee lima, a me na pale nahinahi,

20. A i na papale, a me na kaula kupee wawae, i na kaei poo, a i na papa iki a me na pepeiao gula,

21. I na komolima, a i na gula ihu,

22. I na aahu kuai nui, a me na holoku, i na kalukalu nui, a me na hao i owili ai i ke oho,

23. I na aniani nana, a me ka ie nani, i na mea no ke poo, a me na pale poo.

24. A e hiki mai keia, ma kahi o ke aala, ilaila he pilau; ma kahi o ke kaei, he wahi nahae; ma kahi o ke oho owili, he ohule; a ma kahi o ka pa-u hanohano, he kaei inoino; paawela ma kahi o ka maikai.

25. E haule no kou poe kanaka i ka pahikaua, a o kou poe ikaika ma ke kaua.

26. E uwe a e u kona mau puakapa; a e neoneo auanei oia, a e noho ilalo ma ka lepo.