1. Ano, e oʻu mau hoahanau i aloha ia, ua heluhelu au i keia mau mea, i ike ai oukou no na berita a ka Haku, ana i berita mai ai me ko ka hale a pau o Iseraela;

2. I olelo ia mai la e ia i ka poe Iudaio, ma ka waha o kana poe kaula hemolele, mai kinohou mai, mai kahi hanauna mai i kahi hanauna, a hiki mai ka manawa e hoihoi ia ai lakou i ka ekalesia oiaio a ohana hoi o ke Akua; i ka wa a lakou e houluulu ia ai i ko lakou aina hooilina, a e hookupaa ia ma ko lakou mau aina a pau i hai mua ia ai.

3. Aia hoi, e na hoahanau i aloha ia oʻu, ke olelo aku nei au ia oukou i keia mau mea i hauoli ai oukou, a i hapai ai i ko oukou mau poo no ka wa pau ole, no na mea e pomaikai ai a ka Haku e haawi mai ai auanei maluna o ka oukou poe hua.

4. No ka mea, ua ike au ua imi nui kekahi poe o oukou, e ike i na mea e hiki mai ana; nolaila, ke ike nei au ua ike oukou e mae aku ko kakou io a e make; aka hoi, ma ko kakou mau kino e ike ai kakou i ke Akua.

5. Oiaio, ke ike nei au ua ike oukou, ma ke kino e hoike aku ai oia ia ia iho i ka poe e noho ana ma Ierusalema, mai kahi a kakou i hele mai nei; no ka mea, he mea e pono ai e hiki ia mea iwaena o lakou; no ka mea, he mea pono no ka Mea nui nana i hana i na mea a pau, e hookuu aku ia ia iho e lilo malalo o kanaka ma ka io, a e make no na kanaka a pau, i lilo na kanaka a pau malalo iho ona.

6. No ka mea, e like me ka hooili ia ana o ka make maluna o na kanaka a pau, pela hoi he mana o ke alahouana e pono ai, e hooko i ke kumu-manao aloha o ka Mea nui nana i hana i na mea a pau, a e hiki mai ke alahouana i kanaka e pono ai no ka haule ana; a ua hiki mai ka haule ana no ka lawehala; a no ka haule ana o kanaka, ua hooki ia aku la lakou mai ke alo aku o ka Haku;

7. Nolaila, ea, he kalahala mana loa e pono ai; ke ole he kalahala mana loa, ua hiki ole i keia palaho ke aahu i ka palaho ole. No ia mea la, o ka hoopai mua ana i hiki maluna iho o kanaka, ua mau loa ia maluna ona, ia ao aku ia ao aku. A ina pela, ua moe ilalo no keia io e palaho, a e lilo hou i kona lepo makua, aole ala hou mai.

8. E, ka naauao o ke Akua! Kona aloha a lokomaikai! No ka mea, ina aole e ala hou ka io, e lilo no ko kakou poe uhane malalo iho o kela anela, ka mea i haule iho mai ke alo iho o ke Akua mau loa, a lilo iho la i diabolo, e pii hou ole ai;

9. A ina ua lilo ko kakou poe uhane e like pu me ia, a ina ua lilo kakou i poe diabolo, he poe anela i ke diabolo, e hookuke ia iwaho mai ke alo aku o ko kakou Akua, a e noho pu me ka makua o na wahahee, ma ka poino, e like me ia iho; he oiaio, i kela mea nana i hoowalewale i ko kakou mau kupuna mua; ka mea e hoolilo ana ia ia iho, aneane e like me kahi anela o ka malamalama, a e paipai ana i na naau o na keiki a kanaka ma ka huipumalu ana o ka pepehi kanaka, a i na hana huna o ka pouli o kela ano keia ano.

10. E! Nani ke aloha o ko kakou Akua, nana i hoomakaukau i ala no ko kakou pakele ana, mai ka puliki ana mai o keia mea nui weliweli; he oiaio, kela mea nui weliweli, o ka make a me ka po, aʻu i kapa aku ai i ka make o ke kino, a ka make hoi o ka uhane.

11. A no ke ala o ko kakou Akua, ka Mea Hemolele o ka Iseraela, e pakele ai, o keia make, aʻu i olelo ai, oia ko ke kino make, e haawi mai ia i kona poe i make; a o ua make nei oia no ka lua kupapau.

12. A o keia make aʻu i olelo ai, o ko ka uhane make ia, e haawi mai no auanei ia i kona poe make; a o ua make nei oia no ka po; nolaila, e haawi mai no ka make me ka po i ko laua poe i make e pono ai, a e haawi mai ka po i kona poe uhane i pio, a e haawi mai ka lua kupapau i kona poe kino i pio, a e hoihoi hou pu ia na kino a me na uhane o kanaka, kekahi i kekahi; a ma o ka mana la o ke alahouana o ka Mea Hemolele o ka Iseraela ia mea.

13. E! Nani ke kumu-manao o ko kakou Akua! No ka mea, eia hoi, e haawi mai ka paradaiso o ke Akua i na uhane o ka poe pono e pono ai, a o ka lua kupapau hoi e haawi mai ia i na kino o ka poe pono; a e hui pu hou ia ka uhane a me ke kino, a e lilo na kanaka a pau i palaho ole, a i make ole, a he poe kino-uhane ola lakou, i loaa ka ike paka e like me kakou nei, ma ke kino; eia ka like ole, e akaka lea loa auanei ko kakou ike ia manawa;

14. Nolaila, e loaa ia kakou ka ike lea no ko kakou mau hewa a pau, a me ko kakou haumia, a me ko kakou kohana; a e loaa i ka poe pono ka ike lea no ko lakou pomaikai, a me ko lakou pono, i aahu ia me ka hemolele, he oiaio, me ka aahu o ka pono.

15. Eia kekahi, i ka wa i hele aku ai na kanaka a pau mai keia make mua aku i ke ola, i ko lakou lilo ana i ka make ole, e ku no auanei lakou imua o ka noho hookolokolo o ka Mea Hemolele o ka Iseraela; alaila e hiki mai ka hooponopono ana, a, alaila e hookolokolo ia lakou e like me ka hooponopono hemolele ana o ke Akua.

16. A oiaio iho la, ma ke ola ana o ka Haku, no ka mea, ua olelo mai ka Haku ke Akua ia mea, a o kana olelo mau loa ia, i hiki ole ke haule wale; a o ka poe i pono, e mau no ko lakou pono, a o ka poe i paumaele, e mau no ko lakou paumaele; nolaila, o ka poe i paumaele, oia no ke diabolo a me kona poe anela; a e hele aku no lakou i ke ahi pio ole, i hoomakaukau ia no lakou; a o ko lakou ehaeha me he loko ahi la a me ke kukae pele ia, a o kona lapalapa e pii ana ia, ia ao aku ia ao aku, aohe ona hopena.

17. E, ka nani a me ka pololei o ko kakou Akua! No ka mea, e hooko ana oia i kana mau olelo a pau, a ua hele aku la ia mau mea mailoko mai o kona waha, a e hooko ia kona mau kanawai.

18. Aka, aia hoi, o ka poe pono, ka poe hoano o ka Mea Hemolele o ka Iseraela, o ka poe i manaoio i ka Mea Hemolele o ka Iseraela, o ka poe i hoomanawanui i na mea keakea o ko ke ao nei, a i hoowahawaha i ka hoohilahila mai ona; e loaa auanei ia lakou ke aupuni o ke Akua, i hoomakaukau ia no lakou mai ka hookumu ia ana mai o ke ao nei, a e piha auanei lakou i ka hauoli no ka wa pau ole.

19. E, ka nani o ka lokomaikai o ko kakou Akua, ka Mea Hemolele o ka Iseraela! No ka mea, ke hoopakele mai la oia i kona poe hoano mai kela mea ino weliwelimai o ke diabolo, a me ka make a me ka po no hoi, a me kela loko ahi a me ke kukae pele, oia no ka ehaeha pau ole.

20. E! Nani loa ka hemolele o ko kakou Akua! No ka mea, ke ike nei oia i na mea a pau, aohe kekahi mea, i ike ole ia e ia.

21. A e hele mai ana oia i ke ao nei i hiki ia ia ke hoola i na kanaka a pau, ke hoolohe lakou i kona leo; no ka mea, aia hoi, e loaa ana ia ia na eha o na kanaka a pau; he oiaio, na eha o kela mea ola o keia mea ola, o na kane, na wahine, a me na keiki, e pili ana i ka ohana a Adamu.

22. A e loaa keia ia ia, i loaa i na kanaka a pau ke alahouana, e hiki ia lakou a pau ke ku imua ona, ma ka la hookolokolo nui.

23. A ke kauoha mai la oia i na kanaka a pau, e mihi lakou e pono ai, a e bapetizo ia ma kona inoa, me ka manaoio ikaika i ka Mea Hemolele o ka Iseraela, i ole ia, e hiki ole ai ia lakou ke hoola ia iloko o ke aupuni o ke Akua.

24. A ina aole lakou e mihi a e manaoio aku i kona inoa, a e bapetizo ia ma kona inoa, a e hoomau a hiki i ka hopena, e hoohewa ia lakou e pono ai; no ka mea, ua olelo mai la ka Haku ke Akua, ka Mea Hemolele o ka Iseraela, ia mea;

25. Nolaila, ua haawi mai la oia i kanawai; a ma kahi i haawi ole ia i kanawai, aohe he hoopai ana; a ma kahi o ka hoopai ole ana, aohe he hoohewa ana; a ma kahi o ka hoohewa ole ana, e hoomalu ana na mea aloha o ka Mea Hemolele o ka Iseraela maluna o lakou, no ke kalahala ana; no ka mea, ua hoopakele ia lakou e ka mana ona;

26. No ka mea, e hooluolu ana ke kalahala i ka hooko ia ana o kona hoopai maluna o ka poe a pau i haawi ole ia mai ke kanawai ia lakou, a ua hoopakele ia lakou mai kela mea nui weliweli, o ka make a me ka po, a me ke diabolo, a me ka loko ahi a me ke kukae pele, oia ka ehaeha pau ole; a e hoihoi hou ia lakou i kela Akua nana i haawi mai ia lakou i ka hanu, oia ka Mea Hemolele o ka Iseraela.

27. Aka, auwe ka mea i haawi ia mai ke kanawai ia ia; he oiaio, ka mea i loaa na kauoha a pau a ke Akua, e like me kakou nei, a e ae maluna o ia mau mea, a e hoomaunauna ana i na la o kona noho hoao ia ana; no ka mea, ua weliweli kona noho ana!

28. E, ka hana maalea o ka mea ino! E, ka haaheo, a me ka nawaliwali, a me ka lapuwale o kanaka! Ia lakou i ao ia ai, manao iho la lakou ua naauao, aole lakou e hoolohe i ka olelo ao a ke Akua, no ka mea, waiho wale lakou ia mea e kuhi ana ua ike lakou no lakou iho. Nolaila, ua lapuwale ko lakou ike, aole ia he mea e pono ai lakou. A e make no lakou.

29. Aka, ua maikai ke aoia, ke hoolohe lakou i na olelo ao a ke Akua.

30. Aka, auwe ka poe waiwai, ka poe i waiwai ma na mea o ke ao nei. No ko lakou waiwai, ke hoowahawaha nei lakou i ka poe hune, a hoomaau no lakou i ka poe akahai, a ua kau ia ko lakou mau naau maluna o ko lakou waiwai; nolaila, o ko lakou waiwai he Akua ia no lakou. Aia hoi, e make pu auanei ko lakou waiwai me lakou hoi.

31. A, auwe ka poe hookuli, e hoolohe ole mai ana; no ka mea, e make no lakou.

32. Auwe ka poe makapo, e nana ole mai ana; no ka mea, e make no hoi lakou.

33. Auwe ka poe i okipoepoe ole ia ma ka naau; no ka mea, e hoowalania ka ike o ka lakou hana ino ia lakou ma ka la hope.

34. Auwe ka mea wahahee; no ka mea, e hahao ia oia ilalo i gehena.

35. Auwe ka mea pepehi kanaka, nana i pepehi me ka noonoo e; no ka mea, e make ia.

36. Auwe ka poe e moekolohe ana; no ka mea, e hahao ia lakou ilalo i gehena.

37. Oiaio, auwe ka poe i hoomana i na kii; no ka mea, e lealea ana ke diabolo o na diabolo a pau ia lakou.

38. A, eia hoi, auwe ka poe a pau i make iloko o ko lakou mau hewa; no ka mea, e hoi hou no lakou i ke Akua la, a e ike i kona maka, a e noho mau no iloko o ko lakou mau hala.

39. Ea, e na hoahanau i aloha ia oʻu, e hoomanao i ka weliweli o ka hana ino ana i kela Akua Hemolele, a me ka weliweli no hoi o ka ae wale ana aku i ka hoowalewale ana o kela mea maalea. E hoomanao, o ka manao ma ke kino, he make ia, a o ka manao ma ka uhane he ola mau loa ia.

40. E! E oʻu mau hoahanau i aloha ia, e haliu mai ka pepeiao i kaʻu olelo. E hoomanao i ka nani o ka Mea Hemolele o ka Iseraela. Mai olelo iho ua olelo aku la au i na mea paakiki e ku e ia oukou; no ka mea, ina paha e olelo oukou pela, e hoino no oukou i ka oiaio; no ka mea, ua olelo aku la au i na olelo a ko oukou Mea nana i hana. Ua ike au ua paakiki na olelo o ka oiaio e ku e ana i ka paumaele a pau; aka, aole ka poe pono i makau ia mau mea, no ka mea, e makemake ana lakou i ka oiaio, aole hoi i hoonaueue ia.

41. E! E oʻu mau hoahanau i aloha ia, e hele mai i ka Haku, ka Mea Hemolele. E hoomanao ua pololei kona mau aoao. Aia hoi, ua ololi ke ala no kanaka, aka ua moe ia me ka pololei imua ona, a o ka mea kiai puka oia ka Mea Hemolele o ka Iseraela; aole oia e hoonoho ana i kekahi kauwa malaila; aole hoi kekahi ala e ae, ma ka puka wale no, no ka mea, ua hiki ole ia ia ke hoopunipuni ia; no ka mea, o ka Haku ke Akua kona inoa.

42. A o ka mea kikeke, e wehe no oia ia ia; a o ka poe naauao, a me ka poe i aoia, a o ka poe waiwai, i hoohaakei ia no ko lakou ike, a no ko lakou naauao, a no ko lakou waiwai; he oiaio, oia ka poe ana i hoowahawaha mai ai; a ke hoolei ole lakou i keia mau mea mai o lakou aku, a e manao lakou he poe naaupo lakou imua o ke Akua, a e hele mai me ka haahaa loa, aole oia e wehe no lakou.

43. Aka e huna ia na mea o ka poe naauao a me ka poe akamai, mai o lakou aku no ka wa pau ole; he oiaio, o kela pomaikai i hoomakaukau ia no ka poe hoano.

44. E na hoahanau aloha ia oʻu, e hoomanao i kaʻu mau olelo; e nana mai, ke wehe nei au i koʻu mau aahu, a ke lulu nei au ia mau mea imua o oukou; ke pule nei au i ke Akua o koʻu ola e nana mai oia iaʻu me kona maka ike lea; nolaila, e ike no oukou ma ka la mahope, i ka wa a na kanaka a pau e hookolokolo ia ai no ka lakou mau hana, ua ike ke Akua o ka Iseraela ua lulu aku au i ka oukou mau hana ino mai koʻu uhane aku, a ke ku nei au me ka huali imua ona, a ua maemae au mai ko oukou koko mai.

45. E na hoahanau i aloha ia oʻu, e huli ae oukou mai ko oukou mau hewa ae; e lulu aku oukou i na kaula hao o ka mea e makemake ana e nakinaki ia oukou a paa; e hele mai i ua Akua la, oia ka pohaku o ko oukou ola.

46. E hoomakaukau oukou i ko oukou mau uhane no kela la nani, i ka wa e haawi ia mai ai ka uku pono i ka poe pono; oia ka la hookolokolo, i hopepe ole iho ai oukou me ka makau weliweli; i ole oukou e hoomanao i ko oukou hewa weliweli iwaena o ka hemolele, a e koi ia e hooho aku, Hemolele, hemolele kou hoopai ana, e ka Haku ke Akua mana loa. Aka, ke ike nei au i kuu hewa, ua ae aku la au maluna o kou kanawai, a o koʻu lawehala ana noʻu no ia, a ua loaa au i ke diabolo, i pio au i kona poino weliweli.

47. Aka hoi, e oʻu mau hoahanau, he mea e pono ai anei e hoala aku au ia oukou i ka ike maopopo weliweli i keia mau mea? E hoowalania anei au i ko oukou mau uhane, ina i maemae ko oukou mau naau? E olelo maopopo aku anei au ia oukou, e like me ka maopopo ana o ka oiaio, ina ua maemae oukou mai ka hewa ae?

48. Aia hoi, ina ua hemolele oukou, e olelo au ia oukou no ka hemolele; aka, no ko oukou hemolele ole, a ke nana mai nei oukou iaʻu me he kumu la, he mea pono iaʻu ke ao aku ia oukou i ka hopena o ka hewa.

49. Aia hoi, ke hoopailua nei no koʻu uhane i ka hewa, a ke hauoli nei kuu naau i ka pono; a e hoolea no au i ka inoa hoano o koʻu Akua.

50. E hele mai, e oʻu mau hoahanau, kela mea keia mea i makewai, e hele mai oukou i na wai; a o ka mea kala ole, e hele mai hoi e kuai no a e ai iho; oia, e hele mai e kuai i ka waina a me ka waiu me ke kala ole a me ke kumukuai ole.

51. Nolaila, mai hoomaunauna i ko oukou kala no ka mea lapuwale, i ka oukou hana hoi no ka mea i hoomaona ole. E hoolohe pono mai oukou iaʻu, a e hoomanao i na olelo aʻu i olelo aku ai, a e hele mai i ka Mea Hemolele o ka Iseraela, a e ai a maona i ka mea e make ole ana, aole hoi hiki ke hoopalaho ia, a e olioli hoi ko oukou uhane ma ka momona.

52. Aia hoi, e na hoahanau oʻu, e hoomanao i na olelo a ko oukou Akua; e pule mau ia ia ma ke ao, a e hoolea aku i kona inoa hoano ma ka po. E olioli ko oukou mau naau.

53. A e ike i ka nui o na berita a ka Haku, a me ka nui hoi o kona manao haahaa i na keiki a kanaka; a no kona nani, a me kona lokomaikai a aloha, ua olelo paa mai oia ia kakou aole e luku loa ia ka kakou poe hua, mamuli o ke kino, aka nana no e malama ia lakou; a ma na hanauna e aku, e lilo lakou i lala pono o ko ka hale o Iseraela.

54. Ano, e oʻu mau hoahanau, ua makemake au e olelo hou aku ia oukou; ma ka la apopo e hai ai au ia oukou i ke koena o kaʻu mau olelo. Amene.