1. Ia la la, e lalau aku ai na wahine ehiku i ke kanaka hookahi, i ka i ana, E ai no makou i ka makou ai iho, a e komo i ko makou lole iho; e ae mai oe i keia wale no, e kapa ia mai makou ma kou inoa i mea e pau ai ko makou hoino ia.

2. Ia la la he nani a he hanohano ka lala o ka Haku; e nani io a e maikai no ka hua o ka honua i ka poe i pakele o ka Iseraela.

3. A e hiki mai keia, o na mea i koe ma Ziona, a o na mea i waiho ia ma Ierusalema, e kapa ia auanei he hemolele, o na mea a pau i kakau pu ia me ka poe e ola ana ma Ierusalema;

4. I ka wa a ka Haku e holoi ai i ka pelapela o na kaikamahine o Ziona, a e hoohemo ai i ke koko o Ierusalema, maiwaena aku ona, ma ka uhane o ka hoopono, a me ka uhane o ke aa ana.

5. A e hana no ka Haku maluna o na wahi noho a pau o ka mauna Ziona, a maluna o na aha halawai ona, i ao a me ka uahi i ka la, a i ka malamalama o ke ahi lapalapa i ka po; no ka mea, e kau mai no ka malu maluna o na mea nani a pau o Ziona.

6. He halelewa no e malu ai i ke ao no ka wela, he puuhonua a he wahi malu hoi, no ka ino a me ka ua.