1. Auwe ka poe hooholo i na kanawai hewa, a i kakau i ka hookaumaha a lakou i kau mai ai;

2. E kipaku ae i ka poe nele mai ka hoopono ia aku, a e kaili aku i ka pono mai ka poe hune aku o koʻu poe kanaka, i lilo ai na wahinekanemake i waiwai pio na lakou, a e hao wale hoi i na mea makua ole!

3. A heaha la ka oukou e hana ai i ka la o ka hoopai ana, a i ka neoneo ana e hiki mai ana mai kahi loihi mai? Ia wai la oukou e hele ai no ke kokua ia mai? Mahea oukou e waiho ai i ko oukou nani?

4. Ke ole au, e kulou no lakou ilalo o na mea pio, a e hina no ilalo o na mea i luku ia. Aole nae i huli aku kona huhu no keia mau mea a pau, aka ua o ia no kona lima i keia manawa.

5. E ko Asuria, ka laau hahau o kuu ukiuki, a o ke kookoo ma ko lakou lima o ko lakou inaina ia.

6. E hoouna aku au ia ia e ku e i kahi lahuikanaka hookamani, a e ku e i ka lahuikanaka aʻu i huhu ai e kauoha no au ia ia, e hao i ka waiwai pio, a e lawe aku i ka mea pio, a e hahi ia lakou ilao e like me ka lepo o na alanui.

7. Aka hoi, aole pela kona manao, aole i noonoo kona naau pela; aka o ka luku no ka mea iloko o kona naau e anai aku i na lahuikanaka aole he uuku.

8. No ka mea, i mai la oia, Aole anei he poe alii nui wale no koʻu poe alii?

9. Aole anei i like o Kaleno me Karekemisa? A o Hamata hoi me Arepada? Aole anei i like o Samaria me Dameseko?

10. E like me ka hookumu ana o kuu lima i na aupuni o na akua kii, a o ko lakou akua kii i oi aku mamua o ko Ierusalema a mamua hoi o ko Samaria;

11. Me au i hana aku ai ia Samaria a me kona poe akua kii, aole anei au e hana pela ia Ierusalema a me kona poe akua kii?

12. Nolaila, e hiki mai keia, i ka Haku e hana aku ai i kana hana a pau maluna o ka mauna o Ziona a maluna hoi o Ierusalema, alaila wau e hoopai aku ai i ka hua o ka naau kiekie o ke alii o Asuria, a me ka hookano o kona maka hookiekie.

13. No ka mea, ua olelo mai ia, Ma ka ikaika o koʻu lima a ma kuu akamai ua hana au i keia mau mea; no ka mea, ua maalea au; naʻu no i hooneenee i na mokuna o na kanaka, a ua hao aku hoi i ko lakou waiwai, a ua hoohaahaa i ka poe e noho ana e like me ke kanaka koa;

14. Me he punana la i loaa ai i kuu lima ka waiwai o na kanaka; a e like me ka hoiliili ana o kekahi i na hua manu i haalele ia, pela no au i hoiliili ai i ko ka honua a pau; aohe mea i upoi i ka eheu, aohe mea i hamama ka waha, aohe mea i piopio.

15. E hookiekie anei ke koilipi maluna o ka mea nana e kalai me ia? E haanui anei ka pahiolo maluna o ka mea nana ia e oloolo? Me he laau la i wiliwili ia ia iho e ku e i na mea e hapai ana ia ia, e like me ke kookoo hoi i hoala ia ia iho me he laau ole la.

16. Nolaila, e hoouna mai ai ka Haku, ka Haku o na Lehulehu, i ka wiwi iwaena o kona poe puipui; a malalo iho o kona nani e puhi ai oia i ka mea aa e like me ke aa ana o ke ahi.

17. A e lilo ka malamalama o ka Iseraela i ahi, a o kona Mea Hemolele hoi i lapalapa ahi, a e puhi no ia a e hoopau i kona nahele ooi, a me kona laau kalakala hoi ma ka la hookahi;

18. A e hoopau loa i ka nani o kona ululaau, a o kona mahinaai hua nui, i ka uhane pu me ke kino; e like auanei lakou me ka mea hapai hae, ia ia i maule ai.

19. A he kakaikahi ke koena o kona ululaau, e hiki no i ke keiki uuku ke palapala ia lakou.

20. A e hiki mai ia la, o ke koena o ka Iseraela, a me ka poe hoi i pakele o ko ka hale o Iakoba, aole lakou e hilinai hou maluna o ka mea nana lakou i pepehi; aka e hilinai no maluna o ka Haku, ka Mea Hemolele o ka Iseraela ma ka oiaio.

21. E hoi mai auanei he koena, oiaio, ke koena o Iakoba, i ke Akua mana loa.

22. No ka mea, ina ua like kou poe kanaka o Iseraela me ke one o ke kai, e hoi mai no nae he koena o lakou; o ka hoopau ana i kau ia e hu auanei ia me ka pololei.

23. He oiaio no, ua holo ka olelo, e hana mai no auanei ka Haku ke Akua o na Lehulehu i ka hoopau ana mawaena konu o ka aina a pau.

24. Nolaila, penai wahi a ka Haku ke Akua o na Lehulehu, E koʻu poe kanaka e noho la ma Ziona, mai makau oukou i ko Asuria; e hahau mai no oia ia oe me ka laau hahau, a e hapai no hoi i kona kookoo ia oe, e like me ka hana ana a Aigupita.

25. Aka he wahi manawa uuku e koe, a e kaa koʻu inaina, a me koʻu ukiuki hoi ma ko lakou anai ia ana aku.

26. Na ka Haku o na Lehulehu e hoeueu i laau hahau nona e like me ka luku ana i ko Midiana ma ka pohaku o Oreba; a me ka laau ona maluna o ke kai, pela no ia e hapai ai e like me ka hana ana i ko Aigupita.

27. A e hiki mai ma ia la, e lawe ia aku kona mea kaumaha mai kou poohiwi aku, a o kona auamo hoi mai kou ai aku, a e haki ia auanei ka auamo no ka poni ia ana.

28. Ua hele mai oia i Aiata, ua hala aku la i Migerona; ua waiho oia i kona mau kaa ma Mikemasa;

29. Ua hele mai lakou ma kela aoao o ke ahua; aia ma Giba ko lakou wahi e moe ai; ua makau ko Rama; ua holo ko Gibea o Saula.

30. E hookiekie i kou leo, e ke kaikamahine o Galima; e hoolono aku ia mea ia Laisa, e Anatota poino.

31. Ua hoonee ia aku la o Mademena; ua hoakoakoa ia lakou iho, ka poe i noho ma Gebima, e hee.

32. O keia manawa e noho oia ma Noba ia la; e lulu no oia i kona lima e ku e i ka mauna o ke kaikamahine o Ziona, ka puu o Ierusalema.

33. Aia hoi, na ka Haku, na ka Haku o na Lehulehu e okioki i ka lala me ka mana weliweli; a e kua ia ilalo na mea kiekie loa; a e hoohaahaa ia na mea hookano.

34. A e kua ilalo oia i na ululaau paapu me ka hao, a e hoohaule ia o Lebanona e kekahi mea mana.