1. E hoolohe mai iaʻu, e oukou ka poe hahai i ka pono: E nana oukou ma ka pohaku kahi a oukou i kalai ia ai, a i ka lua hoi o ke ana kahi a oukou i kohi ia ai.

2. E nana oukou ia Aberahama, ko oukou kupuna, a ia Sara hoi, i ka mea nana oukou i hanau; no ka mea, oia hookahi kaʻu i hea aku ai, a hoopomaikai ia ia.

3. No ka mea, e hooluolu mai ka Haku ia Ziona, e hooluolu mai oia i kona mau wahi neoneo a pau; e hana no oia i kona waonahele e like me Edena, a i kona waoakua e like me ka mahinaai o ka Haku. Maloko olaila, e loaa ai ka olioli a me ka hauoli, ka hoolea ana a me ka leo o ke oli.

4. E hoolohe mai iaʻu, e koʻu poe kanaka, a e haliu mai ka pepeiao iaʻu, e oʻu lahuikanaka; no ka mea, e laha aku no ke kanawai mai oʻu aku nei, a e hoolilo au i koʻu hoopono ana e kau i malamalama no na kanaka.

5. Ua kokoke mai no koʻu pono; ua hele aku koʻu ola, na kuu lima e hookolokolo i kanaka. E kali no na mokupuni iaʻu, a ma koʻu lima lakou e hilinai ai.

6. E alawa ae i ko oukou mau maka iluna a i ka lani, a e nana ma ka honua malalo; no ka mea e holo aku auanei na lani e like me ka uahi, a e apulu no hoi ka honua me he lole la; pela no e make ai ka poe e noho ana maluna iho. Aka, e oia mau ana no koʻu ola, aole e hoopau ia koʻu pono.

7. E hoolohe mai iaʻu, e oukou ka poe ike i ka pono, na kanaka iloko o na naau o lakou wau i kakau ai i koʻu kanawai; mai makau oukou i ka hoowahawaha o kanaka; mai weliweli hoi i ka lakou olelo hoino ana;

8. No ka mea, e ai no ka mu ia lakou me he lole la, a e ai hoi ka huhu ia lakou e like me ka hulu hipa. Aka, e mau loa ana koʻu pono a i ke ao pau ole; a me koʻu ola hoi mai keia hanauna aku a ia hanauna aku.

9. E ala, e ala! E aahu oe i ka ikaika, e ka lima o ka Haku e; e ala e like me ia i na la kahiko. Aole anei oe ka mea nana i okioki ia Rahaba, a hoeha hoi i ka moonui?

10. Aole anei oe ka mea nana i hoomaloo i ke kai, i na wai o ka hohonu nui; i hoolilo hoi i na hohonu o ke kai i alanui e hele ai ka poe hoolapanai ia?

11. Nolaila, e hoi mai no auanei ko ka Haku poe i hoolapanai ia, e hele mai no lakou i Ziona me ke oli; he hauoli a he hemolele mau loa maluna o ko lakou mau poo; a e loaa no ia lakou ka olioli a me ka hauoli; e hee loa aku no ke kaumaha a me ke kaniuhu.

12. Owau, oiaio, owau no ka mea nana oukou e hoomaha aku. Aia hoi, owai la oe, i makau aku ai oe i ke kanaka, i ka mea e make ana, a i ke keiki a ke kanaka hoi, e lilo ana auanei me he mauu la;

13. A hoopoina hoi i ka Haku i kou mea nana oe i hana, i hohola ae la hoi i na lani, a i hookumu i ka honua; a ua makau mau loa i na la a pau, no ka inaina o ka mea hooluhi, ina paha ia e makaukau e luku iho? A auhea la ka inaina o ka mea hooluhi?

14. Wikiwiki ae la ke pio kulou, i wehe ia ai oia, i ole ia e make iloko o ka lua, i pau ole hoi kona berena.

15. Aka owau no ka Haku, kou Akua, nana na ale i haalulu; ka Haku o na Lehulehu koʻu inoa.

16. A ua hahao no au i koʻu mau huaolelo iloko o kou waha, a ua uhi aku ia oe i ke aka o koʻu lima, i makia aku ai au i na lani a e hookumu i ka honua, a e olelo aku ia Ziona, Aia hoi, ooe no koʻu poe kanaka.

17. E ala, e ala, e ku iluna, e Ierusalema, ka mea i inu ma ka lima o ka Haku i ke kiaha o kona inaina; ua inu oe i ka maku o ke kiaha o ka haalulu i wili ia;

18. Aohe mea e alakai ia ia iwaena o na keikikane a pau ana i hanau ai; aohe hoi mea i lalau i kona lima, iwaena o na keikikane a pau ana i hanai ai a nui.

19. Ua hiki mai keia mau keikikane elua ia oe; na laua e minamina nou; a me kou neoneo a luku ia ana, a me ka wi a me ka pahikaua: A ma o wai la au e hoomaha ia oe?

20. Ua maule kau mau keikikane, koe wale no keia mau mea elua; ke kaa nei no lakou ma na poo o na alanui a pau, e like me ka bipi hihiu maloko o ka upena; ua piha lakou i ka inaina o ka Haku, i ka paipai ana o kou Akua.

21. Nolaila, e hoolohe mai oe i keia, e ka mea popilikia, a ona hoi, aole nae i ka waina;

22. Penei wahi a ka Haku, ke kokua nei ka Haku kou Akua i ka aoao o kona poe kanaka; Aia hoi, ua lawe aku la au i ke kiaha o ka haalulu, i ka maku o ke kiaha o koʻu inaina, mai kou lima aku; aole oe e inu hou.

23. Aka e waiho aku ia mea iloko o ka lima o ka poe i hookaumaha ia oe; o ka poe i olelo i kou uhane, E moe ilalo, i hele aku makou maluna ae; a ua hoomoe oe i kou kino e like me ka lepo, a me he alanui la hoi i ka poe i hele ae maluna.

24. E ala, e ala, e aahu i kou ikaika, e Ziona; e komo i kou lole nani, e Ierusalema, ke kulanakauhale laa; no ka mea, ma keia wa aku aole e hele hou ia oe, ka mea i okipoepoe ole ia a me na haumia.

25. E lulu oe ia oe iho mai ka lepo ae; e ku iluna, a e noho ilalo, e Ierusalema; e wehe oe i na mea paa o kou ai, e ke kaikamahine pio o Ziona.