1. Ano, e Iakoba, ke olelo aku nei au ia oe: Ooe no kaʻu hanau mua ma na la o koʻu popilikia iloko o ka waonahele. Aia hoi ua loohia oe i kou wa kamalii i ka popilikia a me ke kaumaha nui, no ke kolohe o kou mau hoahanau.

2. Aka hoi, e Iakoba, kaʻu hanau mua iloko o ka waonahele, ke ike nei oe i ka nani o ke Akua; a e hoolaa oia i kou pilikia i mea nou e pomaikai ai.

3. Nolaila, e hoopomaikai ia kou uhane, a e noho maluhia pu oe me kou kaikuaana, o Nepai; a e hoolilo ia aku kou mau la ma ka hana a kou Akua. Nolaila, ke ike nei au ua hoolapanai ia oe no ka pono o kou Mea Hoolapanai; no ka mea, ua ike oe e hele mai ana oia i ka manawa ku pono, e lawe mai i ke ola i kanaka.

4. A ua ike hoi oe i kona nani ma kou wa opiopio; no ia mea, ua hoopomaikai ia oe e like me ka poe ana e lawelawe mai ai ma ke kino: no ka mea, oia mau no ka Uhane, inehinei, i keia la, a mau loa aku. A ua hoomakaukau ia ke ala mai ka haule ana mai o ke kanaka, a ua haawi ia mai ke ola mau loa me ka uku ole aku.

5. A ua lawa na kanaka i ke ao ia mai, i ike lakou i ka pono a me ka hewa. A ua haawi ia mai ke kanawai i kanaka. A ma ke kanawai aole i hoapono ia kekahi mea; oia hoi, ma ke kanawai, ua hooki ia aku na kanaka. Oiaio, ma ko ke kino kanawai, ua hooki ia aku; a ma ko ka uhane kanawai hoi e make ana lakou mai ka pono aku, a lilo lakou i poe poino a mau loa aku.

6. Nolaila, ke hele mai la ka hoolapanai ana iloko o ka Mesia Hemolele a ma o na la no hoi; no ka mea, ua piha oia i ka lokomaikai a me ka oiaio.

7. Aia hoi, ke haawi mai la oia ia ia iho i mohai no ka hewa, e hooko i ka hana a ke kanawai, i ka poe a pau me ka naau palupalu a me ka uhane mihi; aole loa e hooko ia ka hana a ke kanawai i kekahi mea e ae.

8. Nolaila, he mea nui e hoomaopopo aku i keia mau mea i ko ke ao nei, i ike lakou aole e hiki i ka io ke noho pu ma ke alo o ke Akua, ke ole wale no ma ka pono, a me ke aloha, a me ka lokomaikai o ka Mesia Hemolele, nana e waiho aku ilalo i kona ola mamuli o ke kino, a e lawe hou ia mea ma ka mana o ka Uhane, i hiki ia ia ke lawe mai i ke alahou ana o ka poe make, oia no ka mea mua e ala mai ai.

9. Nolaila, oia no ka hua mau i ke Akua, no ka mea, nana e uwao no na keiki a pau a kanaka; a o ka poe a pau e manaoio ia ia e hoola ia lakou.

10. A no ka uwao ia ana no na mea a pau, e hiki aku ana na kanaka a pau i ke Akua la; nolaila, e ku ana lakou ma ke alo ona; e hookolokolo ia e ia, e like me ka oiaio a me ka hemolele iloko ona. Nolaila, o ka hope o ke kanawai a ka Mea Hemolele i haawi mai ai, i ka hoopai ana i ka uku hoopai i kau ia mai, a e kuee ana ua uku hoopai nei i kau ia mai, i ka pomaikai i kau ia mai, e hooko i ka hope o ke kalahala;

11. No ka mea, ma na mea a pau e kuee ana kekahi aoao i kekahi e pono ai. Ina aole pela, e kaʻu hanau mua ma ka waonahele, he mea i hiki ole i ka pono ke hana ia; aole hoi i ka hewa; aole i ka hemolele aole hoi i ka poino; aole i ka maikai aole hoi i ka ino. No ia mea, ina pela e hui pu ia na mea a pau i hookahi; nolaila, ina hookahi kino ia, e waiho ia me he mea make la e pono ai, aole ola aole hoi make, aole palaho aole palaho ole, aole pomaikai aole hoi poino, aole ike aole hoi ike ole.

12. Nolaila, ina pela, ua hana ia mai la ia i mea ole; no ia mea, aole kumu io no ka hana ia ana o ia mea. Nolaila, e hoopau no keia mea i ka naauao o ke Akua, a me kona mau manao paa mau loa, a i ka mana, a i ke aloha, a me ka hoopono ana o ke Akua no hoi.

13. A ina e i aku oukou aole he kanawai, e i no hoi oukou aole he hewa. A ina e olelo oukou aole he hewa, e olelo no hoi oukou aole no he pono. A ina aole he pono, aole hoi he pomaikai. A ina aole he pono, aole hoi he pomaikai, alaila, aole he hoopai aole hoi he poino. A ina aole keia mau mea, aole he Akua. A ina aole he Akua, aole o kakou, aole hoi ka honua; no ka mea, aole i hiki ke hana ia kekahi mea, aole e hana aku, aole hoi e hana ia mai; nolaila, ina ua nalowale iho na mea a pau.

14. Ano, e kaʻu mau keiki, ke olelo aku nei au i keia mau mea, no ko oukou pomaikai a hoonaauao ia ana; no ka mea, aia no he Akua, a ua hana mai la oia i na mea a pau, ma ka lani a ma ka honua no hoi, a me na mea a pau oloko; o na mea e hana aku, a me na mea e hana ia mai;

15. A no ka hooko ana i kona manao mau loa i ka hana ana i kanaka, mahope iho o kana hana ana i ko kakou mau kupuna mua, a me na holoholona o ke kula a me na manu o ka lewa, a me na mea a pau i hana ia, he mea pono ke kau ia mai he mau mea kuee; oia ka hua i papa ia e kuee ana i ka laau o ke ola; o kekahi he ono ia, a o kekahi he awaawa;

16. Nolaila, haawi mai la ke Akua i kanaka, i hiki ia ia ke hana e like me kona manao iho. Nolaila, ua hiki ole i ke kanaka ke hana e like me kona manao iho, ke hoowalewale ole ia oia e kela, a i ole ia, e keia.

17. A ke manao nei au, o Lehi, e like me na mea aʻu i heluhelu ai, ua haule kekahi anela o ke Akua, mai ka lani mai, e like me ka mea i palapala ia; nolaila, lilo iho la oia i diabolo, no kona imi ana i ka mea hewa imua o ke Akua.

18. A no kona haule ana mai ka lani mai, a lilo ana i mea poino no ka wa pau ole, imi iho la no hoi oia, i ka poino o na kanaka a pau. Nolaila, i ae la oia, o kela nahesa kahiko, oia ke diabolo, oia hoi ka makuakane o na mea wahahee a pau, ia Ewa; nolaila, i ae la oia, E ai i ka hua i papa ia, aole olua e make, aka e like auanei olua me ke Akua, i ka ike ana i ka pono a me ka hewa.

19. A mahope iho o ko Adamu laua me Ewa ai ana i ka hua i papa ia, ua kipaku ia aku la laua iwaho o ka mahinaai o Edena, e mahi i ka honua.

20. A ua hanau mai la laua i na keiki; he oiaio, i ka ohana o ko ke ao nei a pau.

21. A ua hooloihi ia na la o na keiki a kanaka, e like me ka makemake o ke Akua, i hiki ia lakou ke mihi oiai lakou ma ke kino; nolaila, lilo mai la ko lakou noho ana i noho ana e hoao ia ai, a ua hooloihi ia ko lakou manawa, e like me na kauoha a ke Akua i haawi mai ai i na keiki a kanaka. No ka mea, haawi mai la oia i kauoha no na kanaka a pau e mihi lakou e pono ai; a hoike mai la no hoi oia i na keiki a kanaka a pau ua lilo aku la lakou, no ka hala o na kupuna mua o lakou.

22. Ano, aia hoi, ina aole o Adamu i hana i ka hala, ina aole oia i haule; aka, ina no ua noho oia ma ka mahinaai o Edena; a ina ua oia mau na mea a pau i hana ia ai, ma ko lakou ano mua, mahope mai o ko lakou hana ia ana; a ina ua waiho ia mai la lakou a mau loa aku, aole hoi hopena.

23. Aole hoi laua e hanau i na keiki: nolaila, ua noho laua i ka noho hala ole ana, aole hauoli, no ka mea, aole o laua i ike i ka poino; aole e hana ana i ka pono, no ka mea, aole o laua i ike i ka hewa.

24. Aka hoi, ua hana ia mai la na mea a pau ma ka naauao o ka mea nana i ike i na mea a pau loa.

25. Haule iho la o Adamu, i loaa ai na kanaka; a ke ola nei na kanaka, i loaa ai ia lakou ka olioli.

26. Ke hele mai la ka Mesia i ka manawa ku pono, e hiki ia ia ke hoola i na keiki a kanaka mai ka haule ana mai. A no ko lakou hoola ia ana mai ka haule ana mai, ua lilo lakou i poe kuokoa a mau loa aku, e ike ana i ka pono a me ka hewa; e hana no lakou iho, aole e hana ia mai, ma ka hoopai ana o ke kanawai wale no, ma ka la nui mahope, e like me na kauoha a ke Akua i haawi mai ai.

27. Nolaila, mamuli o ke kino ua kuokoa na kanaka; a ua haawi ia mai la na mea a pau ia lakou i ku pono i kanaka. A ua noa lakou e koho aku i ka noho pio ole a me ke ola mau loa, ma o ka Mea Uwao nui la o na kanaka a pau; a i ole ia, e koho i ka noho pio a me ka make, e like me ka noho pio ana a me ka mana o ke diabolo; no ka mea, ke imi nei oia i poino pu na kanaka a pau e like me ia iho.

28. Ano, e kaʻu mau keiki, ke makemake nei au e nana oukou i ka Mea Uwao nui, a e hoolohe i kana mau kauoha nui; a e malama pono i kana mau olelo, a e koho aku i ke ola mau loa, e like me ka makemake o kona Uhane Hemolele.

29. Aole e koho aku i ka make mau loa, e like me ka makemake o ke kino a me ka hewa koloko, oia na mea e haawi aku ana i ka uhane o ke diabolo i ka mana e hoopio, a e lawe ia oukou ilalo i gehena, i hiki ia ia ke noho alii maluna o oukou iloko o kona aupuni.

30. Ua olelo aku au i keia mau olelo kakaikahi ia oukou a pau, e aʻu mau keiki, ma na la hope o kuu hoao ia ana; a ua koho au i ka mea e pono ai, e like me na olelo a ke kaula. A o koʻu manao wale no, o ke ola mau loa no ia o ko oukou mau uhane. Amene.