1. Ano, owau o Iakoba, ke olelo hou nei au ia oukou, e oʻu mau hoahanau i aloha ia, no keia lala pono aʻu i olelo aku ai.

2. No ka mea, o na olelo hoopomaikai i loaa ia kakou, he mau olelo pomaikai ia kakou mamuli o ke kino; nolaila, e like me ka mea i hoike ia mai iaʻu, e make auanei no he nui o ka kakou poe mamo ma ke kino, no ka hoomaloka, aka hoi, e aloha no ke Akua i kekahi poe he nui loa; a e hoihoi hou ia ka kakou poe mamo, i hiki aku ai lakou i ka mea e haawi ana ia lakou i ka ike oiaio no ko lakou Mea Hoolapanai.

3. Nolaila, e like me ka mea aʻu i olelo aku ai ia oukou, he mea e pono ai no Kristo, (no ka mea, i ka po nei, hai mai la ka anela i kona inoa iaʻu, oia keia,) e hiki mai iwaena o ka poe Iudaio, iwaena o ka poe hewa loa o ke ao nei; a e kau aku lakou ia ia ma ke kea; no ka mea, pela e pono ai ko kakou Akua; aole hoi kekahi lahuikanaka e ae ma ka honua, nana e kau aku i ko lakou Akua ma ke kea.

4. No ka mea, ina e hana ia na hana mana loa mawaena o na lahuikanaka e ae, e mihi no lakou, a e ike o ko lakou Akua no ia;

5. Aka, no ka hana maalea a na kahunapule a me ka hana ino, e hooolea ka poe ma Ierusalema i ko lakou mau ai e ku e ia ia, i kaulia ai oia ma ke kea.

6. Nolaila, no ka lakou hana hewa, e hiki auanei maluna o lakou ka luku ia ana, ka wi, ke ahulau, a me ka hookahe ia ana o ke koko; a o ka poe i anai ole ia, e hoopuehu ia aku lakou iwaena o na lahuikanaka a pau.

7. Aka hoi, penei wahi a ka Haku ke Akua: A hiki mai ka la e manaoio mai ai lakou iaʻu, owau no ke Kristo; alaila, ua hana berita au me ko lakou poe kupuna e hoihoi hou ia lakou ma ke kino, maluna o ka honua, i ko lakou mau aina hooilina.

8. A e hiki mai no keia, e houluulu ia auanei lakou mai ko lakou hoopuehu loihi ia ana mai, mai na mokupuni o ke kai, a mai na kihi eha o ka honua; a e nui auanei na lahuikanaka o ka poe Genetile ma koʻu maka, wahi a ke Akua, i ke kaikai ana ia lakou i ko lakou aina hooilina.

9. Oia, a e lilo na alii o ka poe Genetile i poe makuakane hanai no lakou, a o na alii wahine a lakou i poe makuwahine hanai; nolaila, ua nani na olelo pomaikai a ka Haku i ka poe Genetile, no ka mea, ua olelo mai la oia ia mea, a owai la ka mea hiki ke hoopaapaa aku?

10. Aka hoi, o keia aina, wahi a ke Akua, e lilo ia i aina hooilina nou: a e hoopomaikai ia ka poe Genetile maluna o ka aina.

11. A o keia aina he aina kuokoa auanei ia no ka poe Genetile; aole hoi e hoala ia na alii maluna o keia aina no ka poe Genetile.

12. A e paku aku au i keia aina i na lahuikanaka a pau;

13. A o ka mea nana e kaua mai ia Ziona, e make oia, wahi a ke Akua;

14. No ka mea, o ka mea nana e hoala mai i alii e ku e mai iaʻu, e make oia. No ka mea, owau ka Haku, ke Alii o ka lani, e lilo au i alii no lakou; a he malamalama no au ia lakou a mau loa aku, i ka poe i hoolohe mai i kaʻu mau olelo.

15. No ia mea, i ko ai kaʻu mau berita, aʻu i hana aku ai i na keiki a kanaka, o na mea aʻu e hana aku ai ia lakou ma ke kino, he mea e pono ai naʻu e anai aku i na hana malu o ka pouli, o ka pepehi kanaka, a o na mea hoopailua;

16. Nolaila, o ka mea e kaua ana ia Ziona, o ka Iudaio, o ka Genetile paha, o ke kauwa a me ke kauwa ole, o ke kane a me ka wahine, e make loa lakou; no ka mea, o lakou no ka wahine hookamakama o ka honua nei a pau; no ka mea, o ka poe aole noʻu, e ku e ana lakou iaʻu, wahi a ko kakou Akua.

17. No ka mea, e hooko no au i kaʻu mau olelo hoopomaikai aʻu i hai aku ai i na keiki a kanaka, no na mea aʻu e hana ai no lakou, ia lakou e noho ai ma ke kino.

18. Nolaila, e koʻu poe hoahanau i aloha ia, penei wahi a ko kakou Akua: E hoeha no au i kau hua ma o ka lima la o ka poe Genetile; aka hoi, e hoopalupalu no au i na naau o ka poe Genetile, i lilo lakou e like me he makuakane la ia lakou; nolaila, e hoopomaikai ia auanei ka poe Genetile a e helu pu ia mawaena o ko ka hale o Iseraela.

19. Nolaila, e hoolaa mau loa aku no au i keia aina i kau hua, a i ka poe hoi e helu pu ia auanei mawaena o kau hua, i aina hooilina no lakou; no ka mea, he aina maikai loa ia, wahi a ke Akua iaʻu, mamua o na aina e ae a pau; nolaila, iloko oʻu ka manao, no na kanaka a pau e noho ana maluna ona, e hoomana mai iaʻu, wahi a ke Akua.

20. Ano, e oʻu mau hoahanau i aloha ia, i ko kakou ike ana ua haawi mai ko kakou Akua aloha i keia ike nui no keia mau mea, e hoomanao kakou ia ia, a e waiho wale aku i ko kakou mau hewa, aole hoi e kulou ko kakou mau poo, no ka mea, aole i hoolei ia aku kakou; aka hoi, ua kipaku ia mai la kakou mailoko mai o ko kakou aina hooilina; aka ua alakai ia mai la kakou i kahi aina maikai ae; no ka mea, ua hana mai la ka Haku i ke kai i alanui no kakou, a maluna no kakou o kahi mokupuni o ke kai.

21. Aka, nani na olelo hoopomaikai a ka Haku i ka poe e noho ana maluna o na mokupuni o ke kai; nolaila, i kona i ana mai i na mokupuni o ke kai, ke ike nei au aole o keia mokupuni wale no, aka he nui ae; a e noho ana hoi na hoahanau o kakou maluna o lakou.

22. No ka mea, ua alakai ae la ka Haku ke Akua ia lakou, ia manawa aku ia manawa aku, mai ko ka hale o Iseraela ae, e like me kona manao a makemake. Ano, aia hoi, ke hoomanao nei no ka Haku i ka poe a pau i haihai ia mai; nolaila, ke hoomanao nei oia ia kakou hoi.

23. Nolaila, e hoolana i ko oukou mau naau, a e hoomanao ua kuokoa oukou e hana no oukou iho; e koho i ka aoao o ka make mau loa, a i ole ia, i ka aoao o ke ola mau loa.

24. No ia mea, e oʻu mau hoahanau i aloha ia, e hoolaulea oukou ia oukou iho i ka makemake o ke Akua, aole i ka makemake o ke diabolo a me ke kino; a e hoomanao mahope iho o ko oukou hoolaulea ia ana i ke Akua, ma o ka lokomaikai la o ke Akua wale no e hoola ia ai oukou.

25. Nolaila, na ke Akua e hoala mai ia oukou mai ka make mai, ma o ka mana la o ke alahouana; a mai ka make mau loa mai no hoi, ma o ka mana la o ke kalahala, i hiki ai ia oukou ke hookipa ia iloko o ke aupuni mau loa o ke Akua, i hiki ai ia oukou ke hoolea ia ia ma o ka lokomaikai la ona. Amene.