1. A ano, aia hoi, e na hoahanau oʻu, ua olelo aku la au ia oukou, e like me ke koi ana o ka uhane iaʻu; nolaila, ke ike nei au e ko io ana auanei ia mau mea e pono ai.

2. O na mea i palapala ia noloko mai o ka buke, he nui auanei ka pomaikai o ia mau mea i na keiki a kanaka, a e nui ae i na hua a kakou, he koena lakou o ko ka hale o Iseraela.

3. No ka mea, eia kekahi ma ia la, o na ekalesia i kukulu ia, aole hoi i ka Haku, ia lakou e olelo aku ai kekahi i kekahi, Aia hoi, owau, owau no ko ka Haku; a e olelo kekahi, Owau, owau no ko ka Haku. A pela e i mai kela mea keia mea, i kukulu i na ekalesia, aole no i ka Haku;

4. A e paio lakou kekahi me kekahi; e paio aku ko lakou poe kahuna kekahi me kekahi a e ao aku lakou me ko lakou ike, a e hoole i ka Uhane Hemolele, nana i haawi mai i ka olelo.

5. A ke hoole nei lakou i ka mana o ke Akua, ka Mea Hemolele o ka Iseraela; a ke i aku nei lakou i na kanaka, E hoolohe mai oukou ia makou, a e hoolohe oukou i ka makou kauoha; no ka mea, aia hoi, aole he Akua i keia la, no ka mea, ua hana ka Haku ka Mea e ola ai, a ua pau kana hana, a ua haawi mai oia i kona mana i kanaka.

6. Aia hoi, e hoolohe oukou i kuu kauoha; ina e olelo mai lakou ua hana ia kekahi hana mana, e ka lima o ka Haku, mai manaoio oukou ia mea; no ka mea, o keia la aole oia he Akua o na hana mana; ua hoopau oia i kana hana.

7. Oiaio, a e i mai kekahi poe he nui, E ai, e inu, a e lealea, no ka mea, i ka la apopo e make ai kakou; a e pomaikai no auanei kakou.

8. A e i mai hoi kekahi poe e he nui, E ai, e inu, a e lealea; e makau nae i ke Akua, e hoapono mai no ia i ka hana hewa uuku; oiaio, e wahahee uuku, e imi pomaikai ma o kekahi la mamuli o kana mau olelo, e eli i lua no kou hoalauna; aole hewa ma keia. A e hana i keia mau mea a pau, no ka mea, i ka la apopo e make ai kakou; a ina ua hewa kakou, e hahau uuku ia kakou e ke Akua, a ma ka hope e hoola ia kakou ma ke aupuni o ke Akua.

9. Oiaio, a e ao mai na kanaka he nui loa mamuli o keia ano, i ke ao hoopunipuni ana, a lapuwale, a naaupo, a e hookiekie ia lakou ma ko lakou naau, a e imi hohonu e huna i ko lakou kuka ana mai ka Haku aku; a aia ma ka pouli ka lakou hana ana;

10. A e hea mai ke koko o ka poe hoano mai ka lepo ae e ku e ia lakou.

11. Oiaio, ua hele aku la lakou a pau mai ke ala aku; ua haumia iho la lakou.

12. No ka haaheo, a no na kumu wahahee, a no ke ao hoopunipuni ana, ua haumia na ekalesia o lakou; a ua hookiekie ia na ekalesia o lakou; no ka haaheo, ua haakei lakou.

13. Ke hao nei lakou i ka poe ilihune, no na halepule nani o lakou; a ke hao nei lakou i ka poe ilihune, no ko lakou kapa nani; a ke hoomaau nei lakou i ka poe akahai, a me ka poe haahaa ma ka naau; no ko lakou haaheo, ua kiekie lakou.

14. Ke hele nei lakou me na ai oolea, a me na poo kiekie; oiaio, a no ka haaheo, a no ka hewa, a no na mea hoopailua, a no ka moekolohe ana, ua lalau aku la lakou, kakaikahi wale no i koe, o lakou nei he poe hahai haahaa ia Kristo; aka hoi, ua alakai ia lakou nei, i lalau lakou nei ma na mea he nui, no ka mea, ua ao ia lakou nei e na kauoha a kanaka.

15. Auwe ka poe naauao, a me ka poe akamai, a me ka poe waiwai, i kiekie i ka haaheo o ko lakou mau naau, a me ka poe a pau e hai aku ana i na ao wahahee ana, a me ka poe a pau e moekolohe ana, a e kapae ana i ka aoao pololei o ka Haku; Auwe, auwe, auwe lakou, wahi a ka Haku ke Akua Mana loa, no ka mea, e hahao ia auanei lakou ilalo i gehena.

16. Auwe ka poe e hookapae ae i ka mea pono no ka mea ole, a e hoino i na mea maikai, a e i aku, He mea ole keia; no ka mea, e hiki mai ana auanei ka la e hele wikiwiki mai ai no ka Haku ke Akua, i na kanaka o ka honua nei; a ma ia la o lakou e oo loa ai i ka hana ino, e make no lakou.

17. Aka hoi, ina e mihi na kanaka o ka honua i ka lakou hana hewa a i na mea hoopailua, aole lakou e luku ia, wahi a ka Haku o na Lehulehu.

18. Aka hoi, o kela ekalesia nui a ino loa, o ka wahine hookamakama o ka honua a pau, e hiolo oia i ka honua e pono ai; a e nani wale ka hiolo ana ona;

19. No ka mea, e haalulu no auanei ke aupuni o ke diabolo, a o ka poe o ua aupuni la e paipai ia lakou i ka mihi e pono ai, a i ole ia, e puliki ke diabolo ia lakou me na kaula hao mau loa ona, a e hooeueu ia lakou i ka huhu a make loa;

20. No ka mea, ma ia la e huhu ai no ia iloko o na naau o na keiki a kanaka, a e hoeueu ia lakou e huhu ku e i ka mea pono;

21. A e hoona oia i kekahi poe e ae, a e hoohiamoe ia lakou iloko o ko ke kino maluhia, a e i aku lakou, Ua maluhia na mea a pau ma Ziona; oiaio, ua pomaikai o Ziona, ua maluhia na mea a pau; a pela hoi e hoopunipuni mai la ke diabolo i ko lakou poe uhane, a ke alakai aku la ia lakou me ke akahele ilalo i gehena.

22. Aia hoi, ke hoomalimali mai la oia i kekahi poe e ae, a ke hai aku la oia ia lakou, Aole he gehena; a ke i mai la oia ia lakou, Aole au he diabolo, no ka mea, aole diabolo; a pela e hawanawana ai oia iloko o na pepeiao o lakou, a, hiki ia ia ke puliki ia lakou me na kaula hoa weliweli ona, mailaila aku aole kahi e pakele ai.

23. Oiaio, ua puliki ia ae la lakou e ka make, a e gehena; a o ka make, a me gehena, a me ke diabolo, a me ka poe a pau i hopu ia e lakou, e ku no lakou e pono ai imua o ka noho alii o ke Akua, a e hookolokolo ia e like me ka lakou mau hana, mailaila aku e hele ai lakou i kahi i hoomakaukau ia ai no lakou, oiaio, i kahi loko ahi a me ke kukae pele, oia ka ehaeha pau ole.

24. Nolaila, auwe ia, ka mea e noho ana me ka nanea ma Ziona.

25. Auwe ia, ka mea e kahea ana, Ua maluhia na mea a pau;

26. Oiaio, auwe ka mea e hoolohe ana i na kauoha a kanaka, a e hoole ana i ka mana o ke Akua a me ka haawina o ka Uhane Hemolele.

27. Oiaio, auwe ka mea e olelo ana, Ua loaa ia makou, aole pono no makou e loaa hou mai.

28. Eia hou, auwe ka poe a pau e haalulu ana, a e huhu ana no ka oiaio o ke Akua. No ka mea, aia hoi, o ka mea i kukulu ia maluna o ka pohaku, e hookipa ana oia ia mea me ka olioli; a o ka mea i kukulu ia maluna o ke kahua one, e haalulu ana oia, o hina.

29. Auwe ka mea nana e olelo, Ua loaa ia makou ka olelo a ke Akua, aole pono e loaa hou ka olelo a ke Akua, no ka mea, ua lawa makou.

30. No ka mea, penei wahi a ka Haku, ke Akua, E haawi no au i na keiki a kanaka i lalani maluna o ka lalani, i kauoha maluna o ke kauoha, he uuku ma kela wahi, a he uuku ma keia wahi; a pomaikai ka poe a pau e hoolohe i kaʻu mau kauoha, a haawi i ka pepeiao i kaʻu olelo ao, no ka mea e loaa no ia lakou ka ike; no ka mea, i ka mea i loaa ai, e haawi hou no au; a mai ka poe mai e olelo ana, Ua lawa makou, e kaili ia aku mai o lakou aku na mea a lakou i loaa ai.

31. E poino ana ke kanaka i hilinai i ke kanaka, a e manao iho i ka io i ikaika nona, a e hoolohe i na kauoha a kanaka, ke haawi ole ia ka lakou mau kauoha e ka mana o ka Uhane Hemolele.

32. Auwe ka poe Genetile, wahi a ka Haku, ke Akua o na Lehulehu; no ka mea, e kikoo no au i koʻu lima ia lakou ia la aku ia la aku, e hoole nae lakou iaʻu; aka hoi, e aloha no au ia lakou, wahi a ka Haku, ke Akua, ke mihi lakou, a e hele ioʻu nei; no ka mea, ua kikoo aku la koʻu lima i ka la a pau, wahi a ka Haku, ke Akua o na Lehulehu.