1. Eia hou, i mai la ka olelo a ka Haku iaʻu, E lawe aku oe i kahi palapala owili nui, a e kakau maluna olaila me ko ke kanaka peni no Mahera-sala-hasa-baza.

2. A lawe iho la au i kekahi mau mea pono i mau hoike, ia Uria ke kahuna, a me Zekaria ke keiki a Ieberekia.

3. A hele aku la au ia ke kaula wahine; a hapai mai la oia a hanau mai la he keikikane. Alaila, i mai la ka Haku iaʻu, E kapa aku i kona inoa Mahera-sala-hasa-baza.

4. No ka mea, mamua o ka ike ana o ke keiki e hea aku, E koʻu makuakane, e koʻu makuwahine, e lawe ia aku no ka waiwai o Dameseko a me ka waiwai pio o Samaria imua o ke alii o Asuria.

5. Olelo hou mai la ka Haku iaʻu, i ka i ana,

6. No ka hoole ana o keia poe kanaka i na wai o Siloa e kahe malie ana, a hauoli hoi ma Rezina a me ka Remalia keiki;

7. Nolaila, aia hoi, ke lawe mai la ka Haku maluna o lakou i na wai o ka muliwai, he ikaika a he nui, oia i ke alii o Asuria, a me kona nani a pau; a e hu no ia mawaho o kona auwai a pau, a e kahe maluna o kona mau kapa a pau;

8. A e hele ia mawaena o Iuda; e hu no ia a e holo maluna, e pii no ia a hiki i ka ai; o ka hohola ana o kona mau eheu e hoopiha auanei i ka palahalaha o kou aina, e Imanuela.

9. E hui pu oukou, e na kanaka, a e wawahi liilii ia auanei oukou; a e haliu mai ka pepeiao o oukou a pau e ko na aina ma kahi loihi; e kaei oukou ia oukou iho, a e wawahi liilii ia oukou; e kaei oukou ia oukou iho a e wawahi liilii ia oukou.

10. E kukakuka pu oukou a e lilo auanei ia i mea ole; e hai mai i ka olelo, aole ia e ku; no ka mea, o ke Akua pu me makou.

11. No ka mea, olelo mai la ka Haku iaʻu penei me ka lima ikaika, a ao mai la iaʻu aole e hele ma ka aoao o keia poe kanaka i ka i ana,

12. Mai olelo oukou, he hui pu ana, i ka poe a pau a keia poe kanaka e olelo ai, he hui pu ana; mai makau hoi i ko lakou mea e makau ai, aole hoi e hopohopo.

13. O ka Haku o na Lehulehu, oia ka oukou e hoolaa ai, oia hoi ka oukou e makau ai, oia ka oukou e weliweli ai.

14. A e lilo ia i puuhonua; aka i pohaku e ku ia ai, a i puu hoi e hala ai i ko na hale elua o Iseraela, i pahele a i upiki no ka poe e noho ana ma Ierusalema.

15. A he nui wale mawaena o lakou e okupe, a e hina, a e wawahi ia, a e hoopahele ia, a e hoopaa ia.

16. E hoopaa i ka hoike ana, e sila hoi i ke kanawai iwaena o kaʻu poe haumana.

17. A e kakali no au i ka Haku, ka mea e huna ana i kona maka mai ko ka hale o Iakoba aku, a e nana aku au nona.

18. Aia hoi, owau a me na keiki a ka Haku i haawi mai ai naʻu, he mau hoailona a he mau ouli hoi makou i kau ia maloko o ka Iseraela, mai ka Haku o na Lehulehu mai, ka mea e noho la ma ka Mauna Ziona.

19. A i ka wa a lakou e olelo aku ai ia oukou, E imi i ka poe me na uhane haukae, a i ka poe nana uhane hoi, a namu liilii; aole anei e pono e imi na kanaka i ko lakou Akua? No na mea ola anei e lohe mai na mea make mai?

20. Ma ke kanawai a ma ka hoike ana; a ina olelo ole lakou e like me ia olelo, no ka malamalama ole iloko o lakou ia mea.

21. A e hele aku lakou iwaena o ia mea me ke kaumaha a me ka pololi, a e hiki mai keia, ia lakou e pololi ai, ia lakou iho lakou e huhu ai, a e kuamuamu i ko lakou alii a me ko lakou Akua, a e nana iluna.

22. A e nana lakou i ka honua; aia hoi, he popilikia, a me ka pouli, he pouli o ka ehaeha hoi, a e kipaku ia iloko o ka poeleele.